Read dyu Yirali 11 Bible Online

Yirali 11 - dyu bible

Yirali 11

¹ O kɔ, u ye sumanikɛfɛn dɔ don ne bolo, a bɔnin tun be bere fɛ. U y'a fɔ ne ye ko: «Wili ka Alabatosoba ni sarakabɔyɔrɔ suma, Ala batobaga minw be yen, ka olu jati.

² Nga i kana Alabatosoba lukɛnɛ suma, i b'o to yen, bari o yɔrɔ dira siya wɛrɛw ma, minw bena dugu senuman halaki kalo bi naani ni fila kɔnɔ.

³Nga n bena sira di n ka seere fila ma, u bena dusukasifani don u kaan na ka waajuli kɛ tile waa kelen ni kɛmɛ fila ni bi wɔɔrɔ kɔnɔ.»

⁴ O seere nunu ye olivuyiri fila ye, ani fitinɛ fila, minw be dugukolo masacɛ ɲafɛ.

⁵Ni mɔgɔ dɔ b'a fɛ ka kojugu kɛ u la, tasuma bena bɔ u daa la, k'o juguw jɛni. Ayiwa, u ɲinibagaw bɛɛ bena sa ten.

⁶ See b'u ye ka sanji minɛ ka lɔ, waasa sanji kana ben u ka waajuli tuma na. See b'u ye fana ka jii bɛɛ yɛlɛma k'a kɛ joli ye. Ni waati o waati y'u diya, tɔɔrɔ sifa o sifa y'u diya, u be se k'o lase dugukolo mɔgɔw ma.

⁷ N'u tilanna u ka seereya la tuma min na, sogo dɔ bena bɔ Dingɛjugu kɔnɔ k'u kɛlɛ. A bena se u kɔrɔ k'u faga.

⁸ U suuw bena to sirada la dugu kɔnɔ, u tun ye u ka Matigi gwengwen lɔgɔ kan yɔrɔ min yɛrɛ la. U b'o dugu nin wele ni miiriya dɔ ye ko Sodɔmu, walima Ezipiti.

⁹Sira tena sɔrɔ ka di waasa u suuw ka don. Mɔgɔw bena u suuw filɛ fɔɔ tile saba ni tilan. Siya bɛɛ bena sɔrɔ o filɛlikɛla nunu na, ni jamana bɛɛ.

¹⁰Adamadenw nisɔn bena diya u fagako la, fɔɔ u bena to k'u ka bololafɛnw didi ɲɔgɔn ma, bari kira fila nunu tun y'u tɔɔrɔ kosɔbɛ.

¹¹ O kɔ, tile saba ni tilan nunu tɛmɛnin kɔ, n y'a ye Ala ye nii don u la. O tuma na, siranyaba y'u filɛbagaw minɛ.

¹² U ye kumakan dɔ mɛn ka bɔ sankolo la ko: «Aw ye yɛlɛ yan.» U yɛlɛla sankolo la sankaba dɔ kɔnɔ u juguw ɲana.

¹³ O waati yɛrɛ la, dugukolo yɛrɛyɛrɛla kosɔbɛ. Dugu nin tilan tannan benna. Mɔgɔ waa wolonwula nii tora o kabako nin na. Minw ma sɔrɔ ka sa, olu jaa tigɛra kosɔbɛ, u tora ka Ala tanu.

¹⁴Ayiwa, bɔnɛ filanan tɛmɛna, a sabanan le bena na sisan.

¹⁵ Mɛlɛkɛ wolonwulanan y'a ka buru fiyɛ, kumakanbabaw bɔra sankolo la ka to k'a fɔ ko: «Sisan, diɲɛ ka masaya kɛra an Matigi n'a ka Mɔgɔ wolomanin ta ye. A bena to masaya la tuma bɛɛ.»

¹⁶Cɛkɔrɔba mugan ni naani minw siginin be Ala ɲafɛ, olu y'u kunbiri gwan ka Ala bato,

¹⁷n'u b'a fɔ ko: «An be barika la i ye Matigi Ala, Setigi. E min be yen, ani e min tun be yen, bari e y'i ka sebagayaba yira, k'i ka masaya sigi n'o ye.

¹⁸ Siyaw dusu tun dimina. Nga e dimi waati le sera sisan. Suuw kitiwaati sera. E ka kiraw n'i ka mɔgɔw ani minw bɛɛ be siran e ɲa, denmisɛn fara mɔgɔkɔrɔbaw kan, olu saratuma sera. Mɔgɔjuguw halakituma sera.»

¹⁹ O kɔ, Alabatoso dayɛlɛla arijana na, ne ye Ala ka bɛn taamasiɲɛ kɛsu ye o soo nin kɔnɔ. O tuma na, saan tora ka pɛrɛn, ka manamana, kumakanbabaw bɔra. Sanbɛrɛ tora ka jigi ni fanga ye, dugukolo yɛrɛyɛrɛla.