Read dyu Yirali 14 Bible Online

Yirali 14 - dyu bible

Yirali 14

¹ O kɔ, ne ko n be filɛli kɛ, n ye Sagaden nin lɔnin ye *Siyɔn kulu kan. Mɔgɔ waa kɛmɛ ni bi naani ni naani (144 000) tun be n'a ye. A tɔgɔ, n'a Faa tɔgɔ sɛbɛnnin b'u bɛɛ teen na.

²Kumakan dɔ bɔra sankolo la. Kumakan nin tun bɔnin be jiba woyokan fɛ, walima saan pɛrɛnkan fɛ. Kumakan nin bɔnin tun be gɔnifɔla ka kolonjo kaan fɛ.

³Mɔgɔ nunu tun be masasigilan ɲafɛ, ni nimanfɛn naani nunu, ani cɛkɔrɔbaw ɲafɛ. U tun be dɔnkilikura dɔ lara, mɔgɔ si te min lɔn fɔɔ mɔgɔ waa kɛmɛ ni bi naani ni naani nunu dɔrɔn. Ala tun ye minw kunmabɔ dugukolo kan.

⁴O mɔgɔ nunu tun ma sɔn k'u yɛrɛ nɔgɔ ni musoko ye. Olu kɔni, hakɛ t'u kan. Ni Sagaden tagara yɔrɔ o yɔrɔ, u be tugu a kɔ. Olu kisira ka kɛ saraka fɔlɔw ye adamadenw cɛma ka kɛ Ala ni Sagaden ta ye.

⁵ Galon ma bɔ u daa la ka ye. Olu ye jalakibaliw ye.

⁶O kɔ, ne ye mɛlɛkɛ dɔ tɛmɛtɔ ye fɔɔ sankolo la. Kibaru diman min ye waati bɛɛ ta ye, o b'a bolo k'a lase diɲɛ mɔgɔw bɛɛ ma, jamanaw kɔnɔ siyaw bɛɛ ma. O kibaru nin tena nagasi abada.

⁷Mɛlɛkɛ nin tun be pɛrɛnna ka to k'a fɔ ko: «Aw ye siran Ala ɲa, aw y'a boɲa, bari a ka kiti waati sera. Ale min ye sankolo ni dugukolo dan, ka kɔgɔji ni kɔɔw dan, aw k'ale bato.»

⁸ Mɛlɛkɛ wɛrɛ tugura fɔlɔ nin kɔ, n'a b'a fɔra ko: «A halakira! Babilɔni duguba nin halakira! Ale min kɛra sababu ye ka siyaw bɛɛ bila a ka kakalaya la.»

⁹Mɛlɛkɛ wɛrɛ tugura fila nunu kɔ, n'a be pɛrɛnna k'a fɔ ko: «Mɔgɔ o mɔgɔ be Sogo nin, n'a jaa bato, a ka taamasiɲɛ be mɔgɔ o mɔgɔ teen na, walima a bolo kan,

¹⁰ olu kɔni bena duvɛn jalan min, min ye Ala ka dimi ta ye. U bena tɔɔrɔ kosɔbɛ tasuma ni kiribi kɔnɔ mɛlɛkɛ senumanw ni Sagaden ɲana.

¹¹ U jɛnitasuma tena faga abada. Mɔgɔ minw bɛɛ tun ye Sogo nin n'a jaa bato, ni minw y'a tɔgɔ taamasiɲɛ sɔrɔ, olu si tena lafiɲɛ sɔrɔ sufɛ, walima tilefɛ abada.»

¹²O kama Ala ka mɔgɔ minw b'a ka kuma bato ani k'u jigi to Yezu kan, olu ka jijawaati sera.

¹³O kɔ, kumakan dɔ bɔra sankolo la. A ko ne ma: «A sɛbɛn ko: mɔgɔ minw be sa k'u jigi lanin to Matigi kan kabini sisan, olu dagamunin lo.» Nii Senuman ko: «U bena lafiɲɛ, bari u ye kɛwaliɲumanw kɛ.»

¹⁴ O kɔ, ne ye sankaba gwɛman dɔ ye. Mɔgɔ min tun siginin b'a kan, o bɔnin be mɔgɔ dencɛ fɛ. Masafugulan sanulaman tun b'a kuun na, wɔrɔsɔ dadiman dɔ tun b'a bolo.

¹⁵ Ayiwa, mɛlɛkɛ dɔ wɛrɛ bɔra Alabatosoba kɔnɔ, k'a kaan kɔrɔta k'a fɔ sankaba kan sigibaga ye ko: «Kanni kɛ n'i ka wɔrɔsɔ ye, bari dugukolo suman mɔna, a kantuma sera.»

¹⁶O tuma na, mɔgɔ min siginin tun be sankaba kan, a y'a ka wɔrɔsɔ kɛ ka dugukolo suman bɛɛ kan.

¹⁷O kɔ, mɛlɛkɛ wɛrɛ bɔra arijana Alabatoso kɔnɔ, wɔrɔsɔ dadiman tun b'ale fana bolo.

¹⁸Mɛlɛkɛ wɛrɛ bɔra sarakabɔyɔrɔ gɛrɛfɛ o ye tasumatigi ye. A y'a kaan kɔrɔta k'a fɔ wɔrɔsɔtigi ye ko: «I ka wɔrɔsɔ kɛ ka *ɛrɛzɛn nunu tigɛ, bari u mɔna.»

¹⁹O mɛlɛkɛ nin y'a ka wɔrɔsɔ kɛ ka ɛrɛzɛn nunu bɛɛ tigɛ. A y'a bɛɛ don duvɛn lalagayɔrɔ la. O ye Ala ka dimi ye.

²⁰ U y'a nɔɔni n'u seen ye dugu kɔɔ kan. A jii nin kɛra joli ye ka woyo fɔɔ ka see kilo kɛmɛ saba ma, min duɲa be mɛtɛrɛ kelen ni tilan ɲɔgɔn bɔ.