Read dyu Yirali 17 Bible Online

Yirali 17 - dyu bible

Yirali 17

¹ O tuma na, mɛlɛkɛ wolonwula minw tun be ni dagaw ye u bolo, olu kelen gwɛrɛla k'a fɔ ne ye ko: «Kakalamuso min tɔgɔ bɔra kosɔbɛ n'a siginin be baaw cɛma, ale bena tɔɔrɔ cogo min na a ka kojugu kosɔn, na yan n bena o yira i la.

² Masaw jɛnna n'ale lo ye ka kakalaya kɛ. A y'a kɛ diɲɛ mɔgɔw bɛɛ kɛra kakalaw ye.»

³ O tuma na, Nii Senuman jigira ne kan, mɛlɛkɛ ye ne ta ka taga ni ne ye fɔɔ kongokolon dɔ la. O yɔrɔ la, ne ye muso dɔ siginin ye sogo wuleman dɔ kan. Sɛbɛli tun b'a yɔrɔ bɛɛ la, minw ye Ala tɔgɔcɛn kuma ye. A kuun tun ye wolonwula ye, gɔɔn tan.

⁴ Fani wuleman dɔ tun be muso nin kaan na min ka ɲi kosɔbɛ. A masirinin tun be ni sanu ye, ni kabakuru sifa dɔ ye i n'a fɔ luluu, ani kɔnɔkisɛ sɔngɔgwɛlɛnw. Filen sanulaman dɔ tun b'a bolo, o fanin tun be fɛnjuguw la, a ka kakalaya tɔnɔ.

⁵Tɔgɔ dɔ sɛbɛnnin tun b'a teen na min kɔrɔ dogonin lo. A sɛbɛnnin tun be ko: «Babilɔni duguba, kakalaw ni diɲɛ kɔnɔ ɲamaɲamaw bamuso.»

⁶Ne y'a ye ko muso nin tun fanin lo Ala ka mɔgɔw ni Yezu seerew joli la. O tun ye ne kabakoya fɔɔ ka tɛmɛ.

⁷Nga, mɛlɛkɛ y'a fɔ ne ye ko: «Mun na i kabakoyanin lo ten? N bena muso nin ka koo kɔrɔ fɔ i ye. A yɛlɛnin bɛ sogo min kan, n'o kungolo ye wolonwula ye, ani gɔɔn tan, n bena o fana kɔrɔ fɔ i ye.

⁸ I ye sogo min ye, a tun be yen fɔlɔ la, nga sisan a te yen tugu, A bena na bɔ dingɛjugu la ka taga halakiyɔrɔ. Kabini diɲɛ dantuma, adamaden minw tɔgɔ te Ala ka sɛbɛ kɔnɔ, olu bɛɛ bena sogo nin ye, ka kabakoya a ka koo la, bari a tun be yen fɔlɔ la, nga sisan a te yen tugu. O n'a ta bɛɛ, a bena na tugu.

⁹«Fɔɔ i ka kɛ hakilitigi ni lɔnnikɛla ye yan. Sogo nin kuun wolonwula nunu kelen kelen bɛɛ ye kuluw ye, muso nin siginin b'o minw kan. Masa wolonwula lo fana.

¹⁰O masa nunu na, duuru benna, wɔɔrɔnan b'a ka masaya la, wolonwulanan ma sigi fɔlɔ. Nga n'ale sigira tuma min na, a tena mɛn a ka masaya la.

¹¹Sogo min tun be yen fɔlɔ la n'a te yen tugu, o ye masa nunu seeginan ye, nga a jatinin be masa wolonwula nunu cɛma. A be tagara halakiyɔrɔ le.

¹² «I ye gɔɔn tan minw ye, olu ye waati wɛrɛ masaw ye. Sogo nin bena masaya d'u ma. U bena masaya dumu waati dɔɔni dɔrɔn ni sogo nin ye.

¹³O masa nunu ka ŋaniya bɛɛ ye kelen ye, ka se k'u ka sebagaya, n'u fanga kɛ ɲɔgɔn kan ka baara kɛ sogo nin ye.

¹⁴U bena Sagaden nin kɛlɛ. Nga Sagaden bena se u kɔrɔ, bari ale ye matigiw ka Matigi ye, ani masaw ka Masa. Sagaden n'a ka mɔgɔ weleninw, n'a ka wolomaninw, ni kantigiw, u bɛɛ bena see sɔrɔ.»

¹⁵Mɛlɛkɛ y'a fɔ n ye tugu ko: «Kakalamuso nin siginin be jii min kan, o ye jamanaw n'u kɔnɔna siyaw ye.

¹⁶Sogo nin, ani a gɔɔn tan nunu bena wili kakalamuso nin kama k'a kɔniya. U ben'a walaka k'a to lakolon, u ben'a sogo ɲimi. A tɔɔ min bena to, u bena o jɛni.

¹⁷Bari, Ala le ye ŋaniya kelen d'u ma waasa u k'u ka fanga fara ɲɔgɔn kan ka baara kɛ sogo nin ye fɔɔ Ala ka kuma fɔnin bɛɛ ka dafa.

¹⁸«Ayiwa, i ye muso min ye, o ye duguba nin ye, ale min be dugukolo masaw bɛɛ kunna.»