Read dyu Yirali 18 Bible Online

Yirali 18 - dyu bible

Yirali 18

¹O kɔ, ne ye mɛlɛkɛ wɛrɛ jigitɔ ye ka bɔ sankolo la. Sebagayaba tun b'a bolo. A ka nɔɔrɔ ye yeelen bɔ dugukolo faan bɛɛ la.

² A pɛrɛnna ko: «A halakira! Babilɔni duguba nin halakira. A kɛra fɛnnɔgɔninw ka yɔrɔ ye: jinaw, ani kɔnɔw ni sogo minw koo ka go.

³ Bari ale lo kɛra sababu ye, ka siyaw bɛɛ bila kakalaya la. Masaw jɛnna n'ale lo ye ka kakalaya kɛ. Jagokɛlaw kɛra nafolotigiw ye ale ka masirifɛnw sababu la.»

⁴ O kɔ, n ye kumakan wɛrɛ mɛn ka bɔ arijana na ko: «N ka jama, aw ye bɔ dugu nin na janko aw kana fara u kan ka hakɛ kɛ a ka tɔɔrɔ dɔ kana se aw ma.

⁵ Bari a ka hakɛ kɛnin farafarala ɲɔgɔn kan fɔɔ ka se sankolo la. Ala ma ɲinan a ka kɛwalijuguw kɔ.

⁶ A ye aw minɛ cogo min na, aw fana k'a minɛ ten. A ye min kɛ aw la, aw ye o ɲɔgɔn fila kɛ a la. A ye dɔrɔjugu min labɛn aw ye, min ka fari n'o ye siɲɛ fila, aw y'o don a ka dɔrɔfiyɛ la.

⁷A ye fɛnɲumanw ni nafolo kɛ k'a yɛrɛ boɲa cogo min na, aw ka tɔɔrɔ ni dusukasi lase a ma ten. Bari a b'a miiri ko a kɛnin be i n'a fɔ masamuso min cɛɛ be nii na, ko sanga tena bɔ ale fɛ ka ye.

⁸ O kama, dugu mɔgɔw bena tɔɔrɔ dɔw sɔrɔ tile kelen kɔnɔ. U bena banajugu sɔrɔ, sanga bena bɔ u fɛ, kɔngɔ bena don u fɛ. Tasuma bena dugu jɛni. O bɛɛ bena kɛ bari Matigi Ala min b'a ɲaa gwanna, see b'o ye.»

⁹Masa minw nana kakalaya ni nafolotigiya kɛ dugu nin kɔnɔ, ni olu ye dugu sisi wilinin ye tuma min na, u bena kasi kosɔbɛ.

¹⁰ Siranya fɛ, u bena lɔ yɔrɔjan waasa a ka balawu dɔ kana se u ma. U bena to k'a fɔ ko: «Ebe! Bɔnɛ o bɔnɛ! Duguba nin! Babilɔni duguba! Cɛfaridugu! I ɲagwanko ma kɛ baara ye, lɛrɛ kelen dɔrɔn y'o ɲa.»

¹¹ Jagokɛlaw bena kasi a ka bɔnɛ la kosɔbɛ. Mɔgɔ si tena ɲini a ka jagofɛnw na tugu:

¹²sanu, ni warigwɛ, ani luluu, kɔnɔkisɛ sɔngɔgwɛlɛnw, faniwulen sɔngɔgwɛlɛnw, fani sɔngɔgwɛlɛn sifa wɛrɛw, wusulanyiriw, samaɲinw, yiriɲuman be kɛ ka fɛɛn sɔngɔgwɛlɛn minw dilan, ziraw, nigɛw, kabakuru min tɔgɔ ko maaburu,

¹³ kanɛlifara ni kasadimanfɛn dɔ wɛrɛ, tulu kasadiman, wusulanw, duvɛn, tulu, mugu, suman, misiw, sagaw, soow, wotorow, ani jɔɔn feeretaw.

¹⁴ Jagokɛla nunu ben'a fɔ ko: «E tun be bololafɛn minw ɲini, o bɛɛ cɛnna. O nafolo nin, ani dakamanafɛnw bɛɛ tununa i la. I tena o si sɔrɔ tugu fewu.» Dugu nin kɛra sababu ye ka jagokɛla minw kɛ nafolotigiw ye, a ka bɔnɛ siranya fɛ, olu bena lɔ yɔrɔjan ka to ka kasi, ka to ka kaba.

¹⁶U bena to k'a fɔ ko: «Ebe! Bɔnɛ o bɔnɛ! Duguba nin! I do masirinin tun be sa! Ni lɛnfani ye, ni faniwulen sɔngɔgwɛlɛn ye, ni sanu ni luluu, ani kɔnɔkisɛ sɔngɔgwɛlɛnw ye.

¹⁷ Ebe! O nafolo nunu bɛɛ halakiko ma kɛ baara ye fɔɔ lɛrɛ kelen dɔrɔn.» Kurun kuntigiw, ni kurunbolilaw, ni minw bɛɛ be to ka taga o yɔrɔ la, ani minw bɛɛ b'u daradumuni sɔrɔ kɔgɔji kan, olu bɛɛ bena lɔ yɔrɔjan

¹⁸ ka to ka kaba ka dugu nin sisi yɛlɛtɔ filɛ k'a fɔ ko: «Dugu si tun te se ka suma n'o duguba nin ye.»

¹⁹ U bena kule, ka ŋuna, ka buguri kɛ u kuun na dusukasi fɛ, k'a fɔ ko: «Ebe! Bɔnɛ o bɔnɛ! Duguba nin! Min ka dakamanafɛnw tun be kuruntigiw bɛɛ kɛ nafolotigiw ye, e halakiko ma kɛ baara ye, lɛrɛ kelen dama kɔnɔ i kɛra tomo ye!

²⁰ «Arijana mɔgɔw, ni mɔgɔ senumanw, ni Yezu ka cidenw ani kiraw, aw ye nisɔndiya dugu nin ka tɔɔrɔ koo la. Bari Ala y'a ɲaa gwan k'aw mɔnɛ bɔ.»

²¹ O tuma na, mɛlɛkɛ setigi dɔ ye kabakuru dɔ ta min boɲa be wugu belebeleba dɔ bɔ, k'a fili kɔgɔji la k'a fɔ ko: «N ye kabakuru nin bon ni fanga min ye, Babilɔni duguba nin bena bari ka tunu yɔrɔnin kelen ten, a tena ye tugu.

²² Gɔni fɔkan tena mɛn yen. Dɔnkililabagaŋanaw, ni file, ani buru, u si kaan tena mɛn Babilɔni tugu. Bololabaarakɛla si tena sɔrɔ yen. Wugu kaan tena mɛn yen fana.

²³ Fitinɛ yeelen tena bɔ yen, kɔɲɔcɛ n'a muso tena sɔrɔ yen tugu, bari Babilɔni jagokɛlaw le tun ye diɲɛ kɔnɔ mɔgɔbabaw ye. A ka kirisikow ye siyaw bɛɛ lafili.

²⁴ «Kiraw, ni mɔgɔ senumanw, ani mɔgɔ minw bɛɛ fagara dugukolo kan, olu bɛɛ joli bɔnnin yera dugu nin le kɔnɔ.»