Read dyu Yirali 2 Bible Online

Yirali 2 - dyu bible

Yirali 2

¹«Sɛbɛ ci Krista ka jama ka mɛlɛkɛ ma Efɛzi k'a fɔ u ye ko: Lolo wolonwula nunu be min kinibolo la, n'a be taamana sanu fitinɛ wolonwula nunu cɛma, ale ko:

²Ne b'aw taama cogo lɔn. Aw be baara min kɛra, ani aw muɲunin lo cogo min na, ne b'o bɛɛ lɔn. Ne y'a lɔn ko aw te sɔn mɔgɔjuguw ka koo la. Minw k'olu ye cidenw ye k'a sɔrɔ cidenw tɛ, aw ye olu kɔrɔbɔ, k'a ye ko galontigɛlaw lo.

³Aw tɔɔrɔla ne tɔgɔ kosɔn nga aw muɲuna, aw m'aw fari faga.

⁴O n'a ta bɛɛ, ne b'aw jalaki. Bari aw tun be ne kanu cogo min na fɔlɔ la, aw te ne kanu ten tugu.

⁵Aw tun be cogo min na fɔlɔfɔlɔ, ka na yɛlɛma, aw ye miiri o la kosɔbɛ ka nimisa, k'aw ka fɔlɔfɔlɔ kɛwaliw ɲɔgɔn kɛ. N'aw m'o kɛ, ne bena na aw kama, k'aw ka fitinɛ ta ka bɔ a nɔɔ na.

⁶Nga koo kelen b'aw la, o ka di ne ye. Nikola kɔmɔgɔw koo ka go ne ye cogo min na, u koo ka go aw fana ye ten.

⁷ Nii Senuman be min fɔra Krista ka jama ye, ni min b'a fɛ ka faamuli kɛ o la, o tigi k'a tulo malɔ a fɛ ka ɲa. Ni min ye see sɔrɔ, yiri min be arijana na, n'a be nii don mɔgɔ la, ne b'o deen dɔ d'a tigi ma k'a dumu.

⁸ «Sɛbɛ ci Krista ka jama ka mɛlɛkɛ ma Simirini k'a fɔ u ye ko: Min ye Fɔlɔ ni Laban ye, min tun sara ka kunun, ale ko:

⁹Ne b'aw ka tɔɔrɔ n'aw ka fantanya lɔn. Nga n b'a fɔ ko aw ye nafolotigiw ye. Minw k'olu ye zuwifuw ye k'a sɔrɔ zuwifuw tɛ, olu be tɔgɔcɛn min lara aw kan, ne b'o lɔn. Olu kɛnin be Sutana kɔmɔgɔw le ye.

¹⁰Tɔɔrɔ min bena aw sɔrɔ, aw kana siran o ɲa. Ayiwa, aw cɛma, mɔgɔ damani bena kaso kɛ Sutana sababu la. A bena o kɛ k'aw kɔrɔbɔ. Aw bena tɔɔrɔ tile tan kɔnɔ. Aw ka kɛ kantigiw ye fɔɔ ka taga se saya ma, n'o kɛra, aw bena nii banbali sɔrɔ ne barika la.

¹¹ Nii Senuman be min fɔra Krista ka jama ye, ni min b'a fɛ ka faamuli kɛ o la, o tigi k'a tulo malɔ a fɛ ka ɲa. Ni min muɲuna ka see sɔrɔ, o tigi tena sini tɔɔrɔ sɔrɔ, min ye saya filanan ye.

¹²«Sɛbɛ ci Krista ka jama ka mɛlɛkɛ ma Pɛrigamu k'a fɔ u ye ko: Murujan be min fɛ n'a daa fila bɛɛ ka di, ale ko:

¹³Aw be dugu min na, ne y'a lɔn ko Sutana ka masasigilan b'o yɔrɔ la. O n'a ta bɛɛ, aw nɔrɔnin bɛ ne la, aw ma tigɛ ne la. U ye ne ka seereɲuman Antipasi faga aw fɛ loon min na, hali o waati la, aw m'aw jigi bɔ ne kan k'aw to Sutana ka sigiyɔrɔ nin na.

¹⁴ O n'a ta bɛɛ, ne b'aw jalaki koo dɔw la. Bari aw cɛma, dɔw nɔrɔnin be Balamu ka kalan na, ale min tun be Balaki kɔnɔnasu waasa a ka Isirayɛlidenw nigɛ k'u bila josɔnsogo ɲimi na, ani ka kakalaya kɛ.

¹⁵Dɔw b'aw cɛma fana minw sɔnna Nikola kɔmɔgɔw ka kalan ma.

¹⁶Ayiwa, o tuma na, aw ye nimisa ka faran aw ka kojuguw la. N'o tɛ, n be na aw fɛ sisan. Murujan min be ne daa la, n bena o kɛ k'u kɛlɛ.

¹⁷ Nii Senuman be min fɔra Krista ka jama ye, ni min b'a fɛ ka faamuli kɛ o la, o tigi k'a tulo malɔ a fɛ ka ɲa. Ni min muɲuna ka see sɔrɔ, ne bena *maanɛ dogonin dɔ di o tigi ma, ka kabakuru gwɛman dɔ d'a ma fana, tɔgɔ dɔ b'o kan, mɔgɔ si te o tɔgɔkura min lɔn n'o kabakuru sɔrɔbaga tɛ.

¹⁸«Sɛbɛ ci Krista ka jama ka mɛlɛkɛ ma Tiyatiri k'a fɔ u ye ko: Ala Dencɛ, min ɲadenw be i n'a fɔ tasuma, n'a seenw be i n'a fɔ zira konin, ale ko:

¹⁹Aw be min kɛra, ne b'o lɔn. Ne koo ka d'aw ye cogo min na, ani aw jigi be ne kan cogo min na, ne b'o lɔn, n'aw ka baara kɛcogo, ani aw ka muɲuli, ne b'o bɛɛ lɔn. Aw be baara min kɛ sisan, o ka ca ni fɔlɔta ye.

²⁰ O bɛɛ n'a ta, ne b'aw jalaki, bari aw be Zezabɛli ka kɛwaliw diyara a la. O muso nin ko ale ye kira ye, k'a sɔrɔ kira tɛ. A be n ka mɔgɔw lafilila n'a ka kalan ye, k'u bila kojugukɛ ni josɔnsogo ɲimi na.

²¹N y'a to fɔlɔ waasa a k'a sɔɔn yɛlɛma. Nga a do t'a fɛ k'a ka kakalaya dabila.

²²Ayiwa, n ben'a kɛ a be la bana bolo ka tɔɔrɔ. A ni minw jɛnna ka kakalaya kɛ, n bena tɔɔrɔba lase olu fana ma, fɔɔ ni u y'u ka kakalaya dabila.

²³ N bena saya lase a deenw ma, o la Krista ka jama bɛɛ ben'a lɔn ko ne le be mɔgɔ bɛɛ kɔnɔnako n'u ka ŋaniyaw lɔn. N bena aw kelen kelen bɛɛ sara ka kɛɲɛ n'aw ka kɛwaliw ye.

²⁴Aw tɔw, aw minw be Tiyatiri n'aw ma sɔn ka kɛ a kɔmɔgɔw ye, aw minw ma Sutana ka gundo ɲini k'a lɔn, aw kɔni, n tena koo wɛrɛ la aw kan.

²⁵Nga aw y'aw jigi la ne kan cogo min na, aw k'aw yɛrɛ minɛ ka ɲa ten fɔɔ ne ka kɔsegi ka na.

²⁶Ni min y'a yɛrɛ minɛ ka ɲa, ka ne ka fɔtaw bɛɛ kɛ fɔɔ ka se u daan na, ne bena siya wɛrɛw ka kuntigiya di o tigi ma.

²⁷ A bena u mara ni nigɛbere ye k'u ci, i n'a fɔ mɔgɔ be daga ci cogo min na.

²⁸Ne yɛrɛ y'o fanga nin sɔrɔ n Faa fɛ. Loloba min be bɔ dugugwɛdafɛ, ne bena o d'a ma fana.

²⁹Nii Senuman be min fɔra Krista ka jama ye, ni min b'a fɛ ka faamuli kɛ o la, o tigi k'a tulo malɔ a fɛ ka ɲa.