Read dyu Yirali 20 Bible Online

Yirali 20 - dyu bible

Yirali 20

¹O kɔ, ne ye mɛlɛkɛ dɔ jigitɔ ye ka bɔ sankolo la ni jɔrɔkɔ barikaman ye, Dingɛjugu konnigɛ b'a bolo.

² A ye Sogojugu nin minɛ, min ye sakɔrɔ nin ye, n'o ye Sutana ye fana. A y'a minɛ ka jɔrɔkɔ kɛ a la, a ka kan ka saan waa kelen kɛ jɔrɔkɔ la.

³Mɛlɛkɛ y'a ta k'a fili Dingɛjugu nin kɔnɔ k'a datugu, k'a sɔgɔ waasa a kana se ka bɔ ka mɔgɔ si lafili ni saan waa kelen nin ma tɛmɛ. N'o tɛmɛna, a bena bɔ ka waati dɔɔni kɛ.

⁴ O kɔ, ne ye masasigilanw ye. Mɔgɔ minw nana sigi u kan, see dira olu ma ka kiti tigɛ. Mɔgɔ minw tun fagara Yezu ni Ala ka kuma kosɔn, ani minw tun banna ka Sogo nin taamasiɲɛ bila u teen, walima u bolo kan, k'a jaa bato, ne ye olu bɛɛ fana kununnin ye, u sigira ni Krista ye masaya la saan waa kelen.

⁵Nga suu tɔw ma se ka kunun fɔɔ saan waa kelen nin ka tɛmɛ. O ye suuw kununko fɔlɔ ye.

⁶Mɔgɔ minw bena kɛ o fɔlɔ mɔgɔw ye, olu bena saniya, u bena dagamu bari saya filanan tena se olu ma. Olu bena kɛ Ala ni Krista ka sarakalasebagaw ye ka sigi masaya la n'a ye saan waa kelen nin kɔnɔ.

⁷Saan waa kelen nin tɛmɛnin kɔ, Sutana bena bila ka bɔ a ka kaso la

⁸ ka taga adamadenw lafili dugukolo faan bɛɛ, o ye Gɔgi ni Magɔgi ye. A ben'a ka kɛlɛdenw lajɛn. U ka ca i n'a fɔ kɔgɔji daa la cɛncɛn.

⁹U bena dugukolo bɛɛ minɛ, ka jama senuman ni Ala ka diyana dugu lamini. Nga tasuma bena bɔ sankolo la k'u bɛɛ halaki.

¹⁰O tuma na, u ye adamadenw lafilibaga minɛ, n'o ye Sutana ye, k'a fili jahanama kɔnɔ, kiribi mananin be min kɔnɔ. A tagara Sogo nin n'a yɛrɛ ka kira sɔrɔ yen. U bena tɔɔrɔ yen tuma bɛɛ, u tena bɔ abada.

¹¹O kɔ, ne ye masasigilan belebeleba gwɛman dɔ ye ka mɔgɔ dɔ siginin ye a kan. Sankolo ni dugukolo bɛɛ ye kɛnɛ minɛ ka tunu.

¹² O kɔ, ne ye suuw ye, u bɛɛ kununna, denmisɛn fara mɔgɔkɔrɔbaw kan, u tagara lɔ masasigilan ɲafɛ. Ayiwa, sɛbɛ dɔw dayɛlɛla. Nii banbali sɛbɛ fana dayɛlɛla. O tuma na, u ye mɔgɔw kiti ka kɛɲɛ n'u ka kɛwaliw ye.

¹³Jii tun ye minw dumu, dugukolo tun ye minw datugu, minw tun be lahara, u bɛɛ le bɔra. U bɛɛ kitira ka kɛɲɛ n'u ka kɛwaliw ye.

¹⁴O tuma na, u ye saya ni lahara fifa ka jigi jahanama kɔnɔ. O le bena kɛ saya filanan ye.

¹⁵Mɔgɔ minw bɛɛ tɔgɔ ma sɔrɔ Ala ka sɛbɛ kɔnɔ, u ye olu bɛɛ fifa ka jigi jahanama kɔnɔ.