Read dyu Yirali 22 Bible Online

Yirali 22 - dyu bible

Yirali 22

¹ O kɔ, mɛlɛkɛ ye baji dɔ yira ne la min be nii don mɔgɔ la. A tun be manamana i n'a fɔ luluu. A tun be woyora ka bɔ Ala ni Sagaden ka masasigilan yɔrɔ la,

² ka dugu nin siraba cɛmancɛ ta. Yiri min be nii di mɔgɔ ma, o tun be baa nin daa faan bɛɛ la. O yiri nin be deen kɛ siɲɛ tan ni fila saan kɔnɔ, denko kelen kalo o kalo. A furaburuw be kɛ ka adamadenw furakɛ.

³ Mɔgɔ danganin tena kɛ dugu nin kɔnɔ. Ala ni Sagaden ka sigiyɔrɔ bena to dugu nin kɔnɔ, Ala batobagaw ben'a bato.

⁴U bena Ala ye n'u ɲaa ye, a tɔgɔ bena sɛbɛn u teen na.

⁵ Suu tena ko yen tugu. Olu mako tena kɛ fitinɛ na, walima tile la, bari Matigi Ala ben'a ka yeelen bɔ u ye. U bena to masaya la tuma bɛɛ.

⁶O kɔ, mɛlɛkɛ y'a fɔ ne ye ko: «Kuma nunu ye tiɲɛ kuma ye, mɔgɔ ka kan k'a jigi la min kan. Koo minw bena kɛ sisan sisan, Matigi Ala min be lɔnniya di a ka kiraw ma, ale lo y'a ka mɛlɛkɛ ci ka na o koow yira a ka baarakɛlaw la.»

⁷Yezu ko: «N be na yanni dɔɔni. Kirayakuma min be kitabu nin kɔnɔ, ni mɔgɔ min y'o bato, o tigi bena dagamu!»

⁸Ne Zan le tulo ye kuma nunu mɛn, ani k'a koow bɛɛ ye ni n ɲaa ye. Ne y'o bɛɛ mɛn k'o ye tuma min na, mɛlɛkɛ min y'o yira ne la, ne ye n kunbiri gwan a kɔrɔ ko n b'a bato.

⁹Nga a y'a fɔ ne ye ko: «Ayi! Kana o kɛ, ne fana ye Ala ka baarakɛla le ye i n'a fɔ e n'i tɔɲɔgɔn kiraw, ani minw bɛɛ be kitabu nin kɔnɔna kuma bato. I ka kan ka Ala le bato.»

¹⁰A y'a fɔ ne ye tugu ko: «Kana kitabu nin kɔnɔna kuma kɛ gundoko ye dɛ, bari a koow kɛtuma surunyana ka ban.

¹¹ Ayiwa, mɔgɔ min ye tilenbali ye, o ka jija ka to a ka tilenbaliya la. Mɔgɔ min nɔgɔlen be, o ka taga ɲa ka yɛrɛ nɔgɔ. Mɔgɔ min be ɲumanya kɛ, o tigi ka dɔ fara o kan. Mɔgɔ min y'a yɛrɛ di Ala ma, o tigi ka jija ka nɔrɔ Ala la.

¹² Ayiwa, n be na yanni dɔɔni. N be na ni bɛɛ ka sara ye n bolo, ka mɔgɔ kelen kelen bɛɛ sara ka kɛɲɛ n'u ka baara ye.

¹³ Ne le ye Alifa ni Omega ye, [1] fɔlɔ ani laban. Ne le ye koo bɛɛ daminɛ n'a laban ye.»

¹⁴ Mɔgɔ minw b'u ka faniw ko, janko u ka don dugu nin kɔnɔ n'a dondaw ye, ka niyɔrɔ sɔrɔ yiri la, min be nii di mɔgɔ ma, olu bena dagamu.

¹⁵Nga mɔgɔkolonw, ni lagwɛlikɛlaw, ni kakalaw, ni mɔgɔfagalaw, ni josɔnlaw ani galontigɛlaw, olu kɔni bena to dugu kɔɔ fɛ.

¹⁶ «Ne Yezu ye n ka mɛlɛkɛ ci ka na koo nunu bɛɛ fɔ Ala ka jama ye. Ne Dawuda dencɛ lo. Loloba min be manamana dugugwɛdafɛ, ne lo.»

¹⁷ Nii Senuman ni Krista ka jama min ye Krista ka maminɛmuso ye, olu ko: «Na.» Ni mɔgɔ min ye nin mɛn, o tigi k'a fɔ ko: «Na.» Ni minnɔgɔ be min na, o tigi ka na. Jii min be nii don mɔgɔ la, ne bena o d'a tigi ma a te foyi sara.

¹⁸Ayiwa, kirayakuma minw be kitabu nin kɔnɔ, mɔgɔ minw b'o lamɛnna, ne Zan be kangari la olu ye ko: Ni mɔgɔ o mɔgɔ ye dɔ fara o kan, tɔɔrɔ minw koo fɔra kitabu nin kɔnɔ, Ala bena o la a tigi kun.

¹⁹ Ni min ye dɔ bɔ a la, o tigi tena don dugu senuman nin kɔnɔ, yiri min be nii di mɔgɔ ma, a tena o deen nɛnɛ fana, minw koo fɔnin be kitabu nin kɔnɔ.

²⁰Min b'a yira ko kuma nunu bɛɛ ye tiɲɛ ye, ale ko: «Tiɲɛ na, n be na yanni dɔɔni.» Amiina! Na Matigi Yezu.

²¹An Matigi Yezu ka nɛɛma kɛ aw bɛɛ ye.