Read dyu Yirali 3 Bible Online

Yirali 3 - dyu bible

Yirali 3

¹«Sɛbɛ ci Krista ka jama ka mɛlɛkɛ ma Saadi k'a fɔ u ye ko: Ala ka Nii wolonwula ni lolo wolonwula be min fɛ, ale ko: Ne b'aw ka kɛwaliw lɔn. U b'a miiri ko aw ɲanaman lo, k'a sɔrɔ aw ye suuw ye Ala ɲana.

²Aw k'aw yɛrɛ minɛ, waasa barika dɔɔni min b'aw la, o fana kana nagasi. Bari aw ka kɛwaliw si ma ne ka Ala ɲaa fa.

³ Aw ye kuma min mɛn ka sɔn a ma, aw k'aw hakili jigi o la, k'aw sɔɔn yɛlɛma k'o kuma nin minɛ ka ɲa. N'o tɛ, ne bena na bari aw la i n'a fɔ soon, aw tena ne natuma lɔn.

⁴Mɔgɔ damani kɔni b'aw fɛ Saadi minw ma nɔgɔ. Olu bena fani gwɛmanw don ka n bila sira, bari u ka kan n'o ye.

⁵ Ayiwa, ni min ye see sɔrɔ, o tigi fana bena fani gwɛman don. N ten'a tɔgɔ jɔsi ka bɔ nii banbali sɛbɛ kɔnɔ. Nga n bena sɔn k'a yira n Faa n'a ka mɛlɛkɛw la, k'o tigi ye ne ta ye.

⁶Nii Senuman be min fɔra Krista ka jama ye, ni min b'a fɛ ka faamuli kɛ o la, o tigi k'a tulo malɔ a fɛ ka ɲa.

⁷ «Sɛbɛ ci Krista ka jama ka mɛlɛkɛ ma Filadɛlifi k'a fɔ u ye ko: Dawuda ka konnigɛ be min bolo, ale ye Senuman ye tigitigi, ale min be daa yɛlɛ ni mɔgɔ si te se k'a tugu, n'a y'a tugu, mɔgɔ si te se k'a yɛlɛ, ale ko:

⁸Ne b'aw ka kɛwaliw lɔn. Ayiwa, ne ye daa dɔ yɛlɛ aw ɲa, mɔgɔ si te se ka min tugu. Fanga bɛrɛ t'aw la, nga aw ye ne ka kuma bato, aw ma bɔ ne kɔ.

⁹ Ayiwa, n bena Sutana batobagaw karaba aw ye, olu minw k'u ye zuwifuw ye k'a sɔrɔ zuwifuw tɛ, galontigɛlaw lo. N bena u wajibiya ka na u kunbiri gwan aw kɔrɔ. O la, u ben'a lɔn ko aw koo ka di ne ye.

¹⁰Aw banbana ka ne ka kuma bato. O la, ne fana bena aw kɔlɔsi tɔɔrɔ tuma na, min bena don diɲɛ mumɛ bɛɛ kɔnɔ ka mɔgɔw kɔrɔbɔ.

¹¹N be na yanni dɔɔni. Aw ye jija k'aw yɛrɛ kɔlɔsi waasa mɔgɔ si kana na aw ka sara bɔsi aw la.

¹² Ni min ye see sɔrɔ, n ben'a kɛ o tigi be to n ka Ala batoso kɔnɔ i n'a fɔ samasen. A bena to yen kudayi. Ne bena n ka Ala n'a ka dugu tɔgɔ sɛbɛn a kan, o dugu nin ye Zeruzalɛmu kura ye min bena jigi ka bɔ Ala fɛ arijana na. Ne bena n tɔgɔkura fana sɛbɛn a kan.

¹³Nii Senuman be min fɔra Krista ka jama ye, ni min b'a fɛ ka faamuli kɛ o la, o tigi k'a tulo malɔ a fɛ ka ɲa.»

¹⁴ «Sɛbɛ ci Krista ka jama ka mɛlɛkɛ ma Lawodise k'a fɔ u ye ko: Min tɔgɔ ko Amiina, ale min ye Seere tilennin tigitigi ye, Ala ka danfɛnw bɛɛ bɔra ale min na, a ko:

¹⁵Ne b'aw ka kɛwaliw lɔn. Aw ma suma i n'a fɔ jisuma, aw gwannin te i n'a fɔ jigwannin. N'aw tun kɛra nunu fila la dɔ ye, o tun ka fisa.

¹⁶Aw gwannin tɛ, aw sumanin tɛ fana, aw walawalanin be, o tuma na ne bena aw fɔɔnɔ.

¹⁷Aw b'a miiri ko aw ye fɛntigiw ye, ko fɛɛn bɛɛ b'aw fɛ, ko aw wasara, k'a sɔrɔ aw m'a lɔn ko aw ye dɛsɛbagatɔw ni makaritɔw, fantanw, ni fiɲɛntɔw ani fɛɛrɛtɔw ye.

¹⁸Ayiwa, ne b'aw ladi. Aw ye na sanu yɛrɛ yɛrɛ san ne fɛ, fɛɛn min b'a to aw be kɛ fɛntigiw ye. Aw ye na fanigwɛ san k'aw ka maloya bɔ, ani ka ɲadimifura minɛ ne fɛ k'aw yɛrɛ furakɛ waasa aw ka yeli kɛ.

¹⁹ Minw koo ka di ne ye, ne be olu ladi k'u kolo. Ayiwa, aw ye jija, ka nimisa ka faran aw ka kojugu la.

²⁰Ne lɔnin be aw ka daaw la ka daa kɔkɔ. Ni min ye n kaan mɛn ka daa yɛlɛ, ne be don o tigi fɛ, an be dumuni kɛ ɲɔgɔn fɛ.

²¹Ni min ye see sɔrɔ, o tigi bena sigi ni ne ye n ka masaya la, i n'a fɔ ne ye see sɔrɔ ka sigi ni n Faa ye a ka masaya la cogo min na.

²²Nii Senuman be min fɔra Krista ka jama ye, ni min b'a fɛ ka faamuli kɛ o la, o tigi k'a tulo malɔ a fɛ ka ɲa.»