Read dyu Yirali 5 Bible Online

Yirali 5 - dyu bible

Yirali 5

¹ O tuma na, min siginin be masasigilan kan, ne ye sɛbɛ melekenin dɔ ye ale kinibolo la. A ɲaa n'a kɔɔ bɛɛ sɛbɛnnin tun lo. A datugunin tun be ni taamasiɲɛ wolonwula ye.

²O kɔ, ne ye mɛlɛkɛ setigi dɔ ye, ale y'a kaan kɔrɔta k'a fɔ ko: «Ka taamasiɲɛ nunu walaka ka sɔrɔ ka sɛbɛ nin dayɛlɛ, jɔn ka kan n'o ye?»

³Mɔgɔ ma sɔrɔ yɔrɔ si la min be se ka sɛbɛ nin yɛlɛ k'a filɛ, sankolo la, ni dugukolo kan, ani dugukolo jukɔrɔ.

⁴Ne kasira kosɔbɛ, bari mɔgɔ si ma sɔrɔ min be se ka sɛbɛ nin yɛlɛ ani k'a filɛ.

⁵ Cɛkɔrɔba nunu kelen y'a kaan to ne ma ko: «I kana kasi. Zuda kɔmɔgɔw ka jara, Dawuda ka dencɛ nin kɛ! Ale lo ye see sɔrɔ. O la, a be se ka sɛbɛ nin yɛlɛ.»

⁶ O tuma na, ne ye Sagaden dɔ ye, a wilila ka lɔ. Nimanfɛn naani nunu ni cɛkɔrɔbaw tun kɛnin be k'a lamini. A kɛra i n'a fɔ a tun fagara. Gɔɔn wolonwula tun b'a la, ani ɲaden wolonwula, minw ye Ala ka Nii wolonwula ye, a be to ka minw ci diɲɛ faan bɛɛ la.

⁷Min tun siginin be masasigilan kan, Sagaden gwɛrɛla ka sɛbɛ nin minɛ ale fɛ.

⁸ A y'a minɛ minkɛ, nimanfɛn naani nunu, ani cɛkɔrɔba mugan ni naani nunu bɛɛ y'u kunbiri gwan a kɔrɔ. Gɔni, ani sanudagaw tun b'u bɛɛ bolo minw fanin tun be wusulan na. O fɛɛn nunu tun ye Ala ka mɔgɔɲumanw ka daaliliw taamasiɲɛ ye.

⁹ U tun be dɔnkilikura dɔ lara ko: «E ni wale, ele le be se ka sɛbɛ nin minɛ k'a taamasiɲɛ nunu walaka. Bari u tun y'i faga. I joli min tun bɔnna, o kɛra sababu ye i ye mɔgɔ dɔw kunmabɔ k'u kɛ Ala taw ye ka bɔ siyaw bɛɛ cɛma, ani jamanaw bɛɛ la.

¹⁰ E y'u kɛ masaw ni sarakalasebagaw ye dugukolo kan Ala ɲakɔrɔ.»

¹¹ Ne tun be filɛli kɛra halibi, ne ye mɛlɛkɛ caaman kaan mɛn, u tun ka ca haali, fɔɔ u te se ka jati ka daa lɔn. U lɔnin tun be ka masasigilan ni nimanfɛnw ni cɛkɔrɔba nunu lamini.

¹²U tun be to k'u kaan kɔrɔta k'a fɔ ko: «U tun ye Sagaden min faga, ale ka kan ni setigiya ye. Nafolotigiya, ani lɔnniya, ni fanga ni kunkɔrɔta ni boɲa, ani tanuli y'a ta ye!»

¹³Sankolo kɔnɔ fɛɛnw, ni dugukolo kan taw, ni dugukolo jukɔrɔ taw, ni jii kɔnɔ fɛɛnw, danfɛnw mumɛ bɛɛ y'a daminɛ ka dɔnkili la ko: «Min siginin be masasigilan kan, ale ni Sagaden tɔgɔ ka tanu. Nɔɔrɔ ni boɲa, ani setigiya ka kɛ u ta ye tuma bɛɛ!»

¹⁴Nimanfɛn naani nunu be to k'u laminɛ ko: «Amiina!» Cɛkɔrɔba nunu be to k'u kunbiri gwan k'u bato.