Read dyu Yirali 7 Bible Online

Yirali 7 - dyu bible

Yirali 7

¹ O kɔ, n ye mɛlɛkɛ naani ye. U lɔnin be kelen kelen dugukolo faan naani la. Olu tun ye fɔɲɔ [1] siri ka lɔ waasa fɔɲɔ kana fiyɛ dugukolo ni kɔgɔji, ani yiriw kan.

²N ye mɛlɛkɛ wɛrɛ bɔtɔ ye kɔrɔn fɛ. Nitigi Ala ka taamasiɲɛ tun b'a bolo. See tun dira mɛlɛkɛ naani minw ma k'u ka dugukolo ni kɔgɔji halaki, ale mɛlɛkɛ nin pɛrɛnna k'a fɔ olu ye ko:

³ «Aw kana dugukolo ni kɔgɔji, ani yiriw halaki fɔlɔ. Mɔgɔ minw be an ka Ala sago kɛ, aw k'a to an b'a ka taamasiɲɛ kɛ olu teen na fɔlɔ.»

⁴Taamasiɲɛ kɛra minw teen na, ne y'olu daa mɛn. U tun ye mɔgɔ waa kɛmɛ ni bi naani ni naani (144 000) ye. U bɔra Isirayɛlidenw ka kɔmɔgɔw bɛɛ la.

⁵Zuda kɔmɔgɔw tun ye waa tan ni fila (12 000) ye. Urubɛn kɔmɔgɔw tun ye waa tan ni fila ye. Gadi kɔmɔgɔw tun ye waa tan ni fila ye.

⁶Azɛri kɔmɔgɔw tun ye waa tan ni fila ye. Nɛfutali kɔmɔgɔw tun ye waa tan ni fila ye. Manase kɔmɔgɔw tun ye waa tan ni fila ye.

⁷Simeyɔn kɔmɔgɔw tun ye waa tan ni fila ye. Levi kɔmɔgɔw tun ye waa tan ni fila ye. Isakari kɔmɔgɔw tun ye waa tan ni fila ye.

⁸Zabulɔn kɔmɔgɔw tun ye waa tan ni fila ye. Yusufu kɔmɔgɔw tun ye waa tan ni fila ye. Bɛnzamɛn kɔmɔgɔw ta tun ye waa tan ni fila ye.

⁹O tɛmɛnin kɔ, ne ko n be filɛli kɛ tugu, ne ye jamaba dɔ ye, mɔgɔ si te se ka minw jati k'u daa lɔn. Jamanaw bɛɛ mɔgɔw tun b'a la, ni siya bɛɛ. U lɔnin tun be masasigilan ni Sagaden ɲafɛ. Fanigwɛ tun b'u kaan na, tenfuraburu minɛnin tun b'u bolo la.

¹⁰U tun be to k'u kaan kɔrɔta k'a fɔ ko: «An ka Ala min be masasigilan kan, anw kisira ale ni Sagaden sababu la.»

¹¹Mɛlɛkɛ minw bɛɛ tun be masasigilan lamini na, ni cɛkɔrɔba nunu, ani nimanfɛn naani nunu bɛɛ y'u kunbiri gwan masasigilan ɲafɛ ka Ala bato,

¹²ka to k'a fɔ ko: «Amiina! Tanuli, nɔɔrɔ, ani hakilitigiya, o y'an ka Ala ta ye. Barika ka la a ye. Boɲa ni setigiya ani fangatigiya y'a ta ye tuma bɛɛ la. Amiina!»

¹³O kɔ, cɛkɔrɔba nunu kelen ye ne ɲininga ko: «Fani gwɛman be minw kaan na, jɔnw lo? U bɔra min?»

¹⁴ N y'a jaabi ko: «E le b'o lɔn matigi.» A ko ne ma: «Minw bɔra tɔɔrɔba nin na, n'u y'u ka faniw ko ka gwɛ Sagaden joli la, olu lo.

¹⁵O kama, u lɔnin be Ala ka masasigilan ɲafɛ ka to k'a bato a ka soo kɔnɔ suu ni tile. Ayiwa, min siginin be masasigilan kan, ale bena u tanga.

¹⁶ Kɔngɔ ni minnɔgɔ tena u minɛ tugu, tile tena u jɛni, funteni fana tena u tɔɔrɔ tugu.

¹⁷ Bari Sagaden min be masa ka sigiyɔrɔ cɛmancɛ la, ale lo bena kɛ u dɛndɛbaga ye. A bena taga n'u ye jii ɲanaman yɔrɔw la, u be min. Ala bena u ɲaji bɛɛ cɛ.»