Read dyu Yirali 8 Bible Online

Yirali 8 - dyu bible

Yirali 8

¹Sagaden ye taamasiɲɛ wolonwulanan bɔ tuma min na, arijana bɛɛ sumana, fɔɔ ka taga se lɛrɛ tilancɛ ɲɔgɔn ma.

²Ne ye mɛlɛkɛ wolonwula ye minw be lɔ Ala ɲafɛ, buru fiyɛta wolonwula dira u ma.

³ Mɛlɛkɛ wɛrɛ nana lɔ sarakabɔyɔrɔ gɛrɛfɛ. Wusulandaga sanulaman tun b'ale bolo. U ye wusulan caaman d'a ma, waasa a k'o ni Krista ka jama ka daaliliw jɛn k'u kɛ saraka ye sarakabɔyɔrɔ sanulaman kan, min be masasigilan ɲafɛ.

⁴Mɛlɛkɛ ye wusulan min jɛni, o sisi wilila ni Ala ka jama ka daaliliw ye Ala ɲakɔrɔ.

⁵ O kɔ, mɛlɛkɛ ye wusulandaga nin fa takami na sarakabɔyɔrɔ kan, k'a fili ka jigi dugukolo kan. Saan daminɛna ka pɛrɛn, ka manamana, mankan cayara, dugukolo yɛrɛyɛrɛla.

⁶Buruw tun be mɛlɛkɛ wolonwula minw bolo, u y'u yɛrɛw labɛn waasa k'u fiyɛ.

⁷ Fɔlɔ nin y'a ta fiyɛ, sanbɛrɛ ni takami, ni joli ɲagaminin bɔra ka bɔn dugukolo kan. Dugukolo tilan sabanan jɛnina, yiriw tilan sabanan fana jɛnina, ani binkɛnɛ bɛɛ.

⁸Filanan nin y'a ta fiyɛ. O tuma na, fɛɛn dɔ min be i n'a fɔ kulu belebeleba tasumalaman bɔra ka jigi kɔgɔji kɔnɔ. Kɔgɔji tilan sabanan yɛlɛmana ka kɛ joli ye.

⁹Jii kɔnɔ fɛɛnw tilan sabanan jɛnina, kurunw tilan sabanan halakira.

¹⁰ Mɛlɛkɛ sabanan y'a ta fiyɛ, lolo belebeleba dɔ benna baji kɔnɔ ani jii bɔyɔrɔw kan k'u tilan sabanan minɛ. O lolo nin tun be i n'a fɔ tasuma.

¹¹ A tɔgɔ tun ko Kunanya. Jii bɛɛ tilan sabanan kunanyara. Jii ka kunanya kojugu fɛ, mɔgɔ caaman sara.

¹² Naaninan y'a ta fiyɛ, tile tilan sabanan dibira, ni kalo, ani lolow. O la, yeelen bɛrɛ tun te yen tilefɛ, suu dibira kosɔbɛ.

¹³O tuma na, ne tun be filɛli kɛra, ne ye sɛgɛn dɔ tɛmɛtɔ pɛrɛnkan mɛn fɔɔ sankolo la. A tun b'a fɔra ko: «Mɛlɛkɛ saba minw tora, olu bena buru minw fiyɛ sisan, bɔnɛ! Bɔnɛ! Bɔnɛ ye diɲɛ mɔgɔw ta ye, o buru nunu fiyɛli kama.»