Read dyu Yirali 9 Bible Online

Yirali 9 - dyu bible

Yirali 9

¹O kɔ, mɛlɛkɛ duurunan y'a ka buru fiyɛ, n ye lolo dɔ ye min bɔra ka ben dugukolo kan. Dingɛjugu daa konnigɛ dira ale ma.

² A y'a dayɛlɛ, sisiba dɔ bɔra i n'a fɔ waga jɛnitɔ sisi. O sisi nin ye tile ɲaa bɛɛ dibi, ka yɔrɔ bɛɛ fin.

³ Tɔɔnw bɔra o sisi nin na ka dugukolo bɛɛ fa. U ka fariya ni bunteni ta bɛɛ ye kelen ye.

⁴ A fɔra u ye k'u kana maga biin ni yiriw la. Ko fɛɛn o fɛɛn be furaburu bɔ, k'u kana foyi kɛ o si la. Ko Ala ka taamasiɲɛ te mɔgɔ minw teen na, k'u ka sin olu le ma.

⁵A fɔra u ye fana, k'u kana u faga, ko k'u tɔɔrɔ dɔrɔn kalo duuru kɔnɔ. N'u ye mɔgɔ cin, o dimi ni bunteni ta bɛɛ ye kelen ye.

⁶ O waati la, mɔgɔw bena saya ɲini ka dɛsɛ. U bena koo bɛɛ kɛ janko u be sa, nga u tena sa.

⁷ Tɔɔn nunu bɔnin be soow fɛ, u ye minw labɛn kɛlɛ kama. A kɛra i n'a fɔ sanufugulan le b'u kuun na. U ɲada bɔnin be mɔgɔ ta fɛ.

⁸ U kunsigi be i n'a fɔ muso ta. U ɲiin be i n'a fɔ jara ta.

⁹ A kɛra i n'a fɔ nigɛ le donnin be u disi la. U gamanw mankan bɔnin be kɛlɛkɛso caaman bolikan fɛ ni wotorow ye.

¹⁰Kuu b'u la, o kuuw bɔnin be bunteni ta fɛ. Mɔgɔw tɔɔrɔfɛn b'o kuu nunu kɔnɔ, min be se ka tɔɔrɔ lase mɔgɔw ma kalo duuru kɔnɔ.

¹¹Mɛlɛkɛ min ye Dingɛjugu nin kuntigi ye, ale lo y'u ka masacɛ ye. A tɔgɔ ko Abadɔn eburukan na. Girɛkikan na, a tɔgɔ ko Apoliyɔn. O kɔrɔ ko Halakibaga.

¹²Ayiwa, bɔnɛ fɔlɔ tɛmɛna, fila wɛrɛ le bena na sisan.

¹³ O kɔ, mɛlɛkɛ wɔɔrɔnan y'a ka buru fiyɛ. Sarakabɔlan sanulaman min be Ala ɲafɛ, ne ye kumakan dɔ mɛn o nɔnkɔnw na

¹⁴n'a b'a fɔra mɛlɛkɛ nin ye, buru be min bolo ko: «Mɛlɛkɛ naani minw sirinin be Efarati baji daa la, u foni ka bila.»

¹⁵O mɛlɛkɛ nunu tun labɛnna ka bila o waati nin kama, o loon nin na, o kalo kelen nin kɔnɔ, o saan nin na, waasa ka mɔgɔw tilan sabanan faga. U labilara.

¹⁶Ne y'u ka kɛlɛbolo mɔgɔda mɛn, k'u ye sotigi miliyɔn kɛmɛ fila ye.

¹⁷O sotigi nunu ka nigɛkunbɛnnan minw tun be u la, u wulennin tun lo fɔɔ ka kɛ bulaman ni nɛrɛmuguman ye. Soo nunu kungolow tun be i n'a fɔ jara ta, tasuma ni sisi ani kiribi le tun be bɔ u daaw la.

¹⁸Tasuma, ni sisi ani kiribi min tun be bɔ u daaw la, o balawu nunu ye adamadenw tilan sabanan bɛɛ faga.

¹⁹Soo nunu ka sebagaya be bɔ u daaw, n'u kuuw le kɔnɔ. O kuu nunu tun be i n'a fɔ saaw. O b'u kuunw le kɛ ka adamadenw tɔɔrɔ.

²⁰ Mɔgɔ minw tora n'u ma sɔrɔ ka sa balawu nin na, sanni u ka nimisa k'u ka kɛwalijuguw dabila, u tora ka jinaw bato, ka joow sɔn. O joow tun ye sanu ye, dɔw warigwɛ, dɔw zira, dɔw kabakuru, dɔw lɔgɔkuru, k'a sɔrɔ o batofɛn nunu te yeli kɛ, u te mɛnni kɛ, u te se ka taama.

²¹Mɔgɔ nunu ma sɔn k'u ka mɔgɔfaga ni subagaya ani kakalaya ni soɲaliw dabila.