Read dyu Uruti ka kitabu 2 Bible Online

Uruti ka kitabu 2 - dyu bible

Uruti ka kitabu 2

¹Cɛɛ dɔ tun be Nawomi ka cɛso la. Mɔgɔba tun lo, nafolo tun b'a fɛ, Elimelɛki ka fadenyabolo mɔgɔ tun lo, a tɔgɔ ko Boozi.

² Loon dɔ, Uruti ka bɔ Mowabu y'a fɔ Nawomi ye ko: «N b'i daali ko i ka sira di n ma, n be taga fɛfɛri kɛ mɔgɔ dɔ fɛ, min bena sɔn ka makari n na.» Nawomi y'a jaabi ko: «Taga n denmuso.»

³O la, a tagara don foro dɔ kɔnɔ n'a be fɛfɛri kɛra sumantigɛbagaw kɔfɛ. A donna foro min kɔnɔ fana, o kɛra kunnadiya ye a fɛ. O tun ye Elimelɛki ka fadenyabolo mɔgɔ Boozi ka foro dɔ ye.

⁴Boozi bɔra dugu kɔnɔ ka na foro kɔnɔ, a y'a ka sumantigɛbagaw fo ko: «Masaba k'aw dɛmɛ.» U y'a jaabi ko: «Masaba ka barika don e fana na.»

⁵O kɔ, a y'a ka sumantigɛbagaw ɲamɔgɔ ɲininga ko: «Nin Muso nin bɔra min?»

⁶Baaraden nin y'a jaabi ko: «Nawomi nana ni muso min ye ka bɔ Mowabu jamana na, ale lo.

⁷A nana an daali ko an k'a to ale be fɛfɛri kɛ sumantigɛlaw kɔfɛ. Kabini a nana sɔgɔma, a ma taga lafiɲɛ fɔlɔ. A b'a seen kan halibi.»

⁸Boozi y'a fɔ Uruti ye ko: «Ne denmuso, kana taga foro wɛrɛ la ka fɛfɛri kɛ, i ka to ni ne ka baaraden musoman nunu ye. I y'a mɛn wa?

⁹Sumantigɛlaw be yɔrɔ minw tigɛra, to ka filɛli kɛ o yɔrɔ la ka tugu u kɔ. Ne ye kangari la n ka baaradenw ye i kosɔn. Ni minnɔgɔ y'i minɛ, i ka taga minni kɛ u ka jidaga la.»

¹⁰O la, Uruti y'a kunbiri gwan k'a ɲaa biri duguma Boozi kɔrɔ k'a fɔ a ye ko: «Mun le y'a to i be ne minɛ ka ɲa ten, ani ka ne koo diya e yɛrɛ ye, ne min ye lonanmuso ye?»

¹¹Boozi y'a jaabi ko: «E cɛɛ sanin kɔ, fɔɔ ka na se sisan ma, i y'i biranmuso minɛ cogo min na, u y'o fɔ ne ye, ani e sɔnna k'i faa n'i bamuso an'i ka wolojamana to yen, ka na to siya wɛrɛ fɛ e ma deli ka min lɔn.

¹²Masaba k'i sara, i ka sara ka kɛ fɛɛn ɲanaman ye Masaba fɛ, min ye Isirayɛli ka Ala ye, i nana i yɛrɛ kalifa min ma!»

¹³Uruti ko: «Ne koo ka diya i ye, matigi! Bari i ye kumaɲuman fɔ k'i ka baaraden jigi tugu, ne do t'i ka baaraden bɔ.»

¹⁴Dumuni kɛtuma, Boozi y'a fɔ Uruti ye ko: «Gwɛrɛ ka na dumuni kɛ, i ka lɔgɔma sun naan na.» A tagara sigi sumantigɛlaw gɛrɛfɛ. U ye sumankisɛ yirannin d'a ma, a ye dumuni kɛ ka fa fɔɔ a tɔɔ tora, a y'o mara.

¹⁵O kɔ, a wilila ka taga fɛfɛrikɛyɔrɔ la. Boozi y'a fɔ a ka baaradenw ye k'u k'a to a be fɛfɛri kɛ, hali sumantonw gɛrɛfɛ, k'u kan'a bali.

¹⁶K'u ka suman dɔw to kala sanfɛ a ye, min ka gwɛlɛ, ko u kana kumajugu fɔ a ye.

¹⁷Uruti ye fɛfɛri kɛ fɔɔ ka tile ban foro nin kɔnɔ. O kɔ, a ye fɛfɛri kɛ ka suman min sɔrɔ, a y'o gosi, o kɛra sinsin ɲaa kelen ye.

¹⁸A y'o ta ka taga dugu kɔnɔ k'o yira a biranmuso la. A y'a ka dumuni tɔɔ fana bɔ k'o di a biranmuso ma.

¹⁹Ale y'a ɲininga ko: «I tagara fɛfɛri kɛ jɔn le fɛ bii? I tagara baara kɛ jɔn ka foro la? Mɔgɔ min y'i minɛ ka ɲa, Ala ka barika don o tigi la.» Uruti ye baara kɛ mɔgɔ min ka foro kɔnɔ, a y'o tigi fɔ a ye. A ko ale ye baara kɛ Boozi ka foro le kɔnɔ.

²⁰ Nawomi y'a fɔ a biranmuso ye ko: «Masaba min be hinɛ taabagaw n'u kɔmɔgɔw la, ale ka barika don cɛɛ nin na. An baden yɛrɛ lo. Mɔgɔ minw ka kan ka janto an na, olu dɔ lo.»

²¹Uruti y'a fɔ tugu ko cɛɛ nin ko ale ka to n'a ka baaradenw ye fɔɔ sumantigɛ ka ban.

²²Nawomi y'a fɔ a biranmuso Uruti ye ko: «N denmuso, a ka fisa i ka to ka taga ni olu ye, janko u kana i bugɔ foro wɛrɛ kɔnɔ.»

²³O la, Uruti tora ka taga ni Boozi ka baaradenw ye fɔɔ ka *orizi ni *bile tigɛ ban, ka to n'a biranmuso ye.