Read dyu Uruti ka kitabu 3 Bible Online

Uruti ka kitabu 3 - dyu bible

Uruti ka kitabu 3

¹Loon dɔ, Nawomi y'a fɔ a biranmuso ye ko: «Ne denmuso, ne man kan ka sigiyɔrɔɲuman ɲini i ye wa, janko i ka nisɔndiya?

²I ye baara kɛ ni Boozi min ka baaraden musomanw ye, ale te an baden ye wa? Ayiwa, a ben'a ka suman gosinin fiyɛ bii sufɛ.

³Wili ka tulu mɔ i yɛrɛ la ani k'i ka fani ɲanamanw don ka taga sumangosikɛnɛ na. I kan'a to a b'i ye, fɔɔ n'a ye dumuni kɛ ka minni kɛ ka ban tuma min na.

⁴N'a lara tuma min na, i k'a layɔrɔ kɔlɔsi. O kɔ, i ka tag'a ka birifani bɔ a seen kan [1] ka la o yɔrɔ la. E ka kan ka fɛɛn min kɛ, a bena o fɔ i ye.»

⁵Uruti y'a fɔ ko: «I ye min fɔ, n bena o bɛɛ kɛ.»

⁶A tagara sumangosikɛnɛ na. A biranmuso ye koo min bɛɛ fɔ a ye, a y'o bɛɛ kɛ.

⁷Boozi ye dumuni ni minni kɛ, a nisɔndiyara kosɔbɛ. A wilila ka taga la suman gɛrɛfɛ. Uruti taamana dɔɔni dɔɔni ka ta'a ka birifani bɔ a seen na ka la.

⁸Dugutilama, Boozi barila ka kunun, a ko a b'a yɛrɛ kuru, a y'a ye ko muso dɔ lanin be a seen kɔrɔ.

⁹A y'a fɔ ko: «Jɔn lo?» Uruti y'a jaabi ko: «I ka baaraden Uruti lo. N ta k'i janto n na, bari e ka kan n'o ye.» [2]

¹⁰Boozi ko: «Masaba k'i ta ɲa, ne denmuso! I ye fɛɛn min kɛ, o be i ka mɔgɔsɔbɛya yira ka tɛmɛ fɔlɔta kan. I ma tugu kanbelen si kɔ, a fantan walima nafolotigi.

¹¹Sisan ne denmuso, i kana siran. I mana fɛɛn o fɛɛn ɲini, ne bena o kɛ i ye, bari ne ka mɔgɔw bɛɛ y'a lɔn ko i ye musoɲuman ye.

¹² Tiɲɛ lo, ne ka kan ka janto i la, nga mɔgɔ wɛrɛ be yen min ka kan k'a kɛ ka tɛmɛ ne kan.

¹³La yan ka dugu gwɛ, ni dugu gwɛra, n'a bena se k'i ta ka janto i la, a k'o kɛ. Nga n'a ma diya a ye k'i ta fana, ne bena i ta Masaba kosɔn! La yan fɔɔ sɔgɔma.»

¹⁴O la, Uruti lara Boozi seen kɔrɔ fɔɔ sɔgɔma. Nga a wilila joona ni dugu ma gwɛ kosɔbɛ, mɔgɔ tun te se ka ɲɔgɔn lɔn waati min na, bari Boozi tun t'a fɛ mɔgɔ k'a lɔn ko a tun nana sumangosikɛnɛ na.

¹⁵A y'a fɔ Uruti ye ko: «Fani min birinin be i kaan na, o bɔ k'o minɛ ka ɲa.» Uruti y'a minɛ ka ɲa. A ye sumankisɛ sinsin ɲaa kelen di a ma. O kɔ, a tagara dugu kɔnɔ.

¹⁶Uruti kɔsegira ka na a biranmuso fɛ, Nawomi y'a ɲininga ko: «N denmuso, a kɛra cogo di?» Cɛɛ nin ye fɛɛn o fɛɛn kɛ Uruti ye, a y'o bɛɛ lakali Nawomi ye.

¹⁷A ko: «A ye sumankisɛ sinsin ɲaa kelen nin di ne ma k'a fɔ ko ne man kan ka segi n biranmuso fɛ bolo lakolon.»

¹⁸Nawomi ko: «Ne denmuso, i hakili sigi ka to yɔrɔ kelen na, koo nin bena laban cogo min na, i k'o lɔn. Cɛɛ nin tena lafiɲɛ n'a ma koo nin ɲanabɔ bii yɛrɛ.»