Read dyu Uruti ka kitabu 4 Bible Online

Uruti ka kitabu 4 - dyu bible

Uruti ka kitabu 4

¹Kosɔbɛw be to ka ɲanabɔ dugu donda min gɛrɛfɛ, Boozi tagara sigi o yɔrɔ la. K'a siginin to yen, a tun ye cɛɛ min koo fɔ Uruti ye, ale nana tɛmɛ. Boozi y'a wele ko a ka gwɛrɛ ka na sigi yan, karimasina. Cɛɛ nin gwɛrɛla ka na sigi.

²Boozi ye mɔgɔ tan wele dugu cɛkɔrɔbaw cɛma k'olu ka na sigi, olu sigira.

³O kɔ, cɛɛ min ka kan ka Elimelɛki kɔfɛko ɲanabɔ, a y'a fɔ o ye ko: «I y'a lɔn ko Nawomi bɔra Mowabu jamana na ka na, a b'an baden Elimelɛki ka foro dɔ feerera.

⁴Ne tun ko n ben'a fɔ i ye ko i k'a minɛ, dugu mɔgɔw, ani dugu cɛkɔrɔba nunu ɲana, ni minw siginin be yan. N'i b'a fɛ k'a minɛ, i k'a minɛ, nga n'i t'a fɛ fana, o fɔ ne ye, janko ne k'o lɔn. Bari mɔgɔ wɛrɛ te yen min be se k'a minɛ ni ele tɛ, ne ka sɔrɔ ka tugu.» Cɛɛ nin y'a jaabi ko ale ben'a minɛ.

⁵Boozi y'a fɔ a ye tugu ko: «Loon min na i bena foro nin minɛ Nawomi bolo, i ka Uruti fana minɛ, min bɔra Mowabu jamana na, ale min ye taabaga nin ka muso ye, janko i ka deen sɔrɔ ale ka kɛ a sii ye.»

⁶Cɛɛ nin y'a fɔ Boozi ye ko: «Ne tena se k'a minɛ, bari ne be siran o kana kɛ sababu ye ka ne ka nafolo fana cɛn. O la, i ka ne nɔɔ ta, bari ne yɛrɛ le te se.»

⁷ Fɔlɔfɔlɔ, Isirayɛlidenw fɛ, n'u b'a fɛ k'o koo nin ɲɔgɔn kɛ i n'a fɔ ka janto taabaga kɔfɛko la walima ka fɛɛn dɔ falen ɲɔgɔn fɛ, mɔgɔ kelen tun b'a ka sanbara bɔ k'o di kelen ma. O le tun kɛra u ka taamasiɲɛ ye.

⁸O la, cɛɛ min tun ka kan ka Elimelɛki kɔfɛko ɲanabɔ, ale y'a ka sanbara bɔ a seen na k'o di, k'a fɔ a ye ko a ka ale nɔɔ ta koo nin na.

⁹O kɔ, Boozi y'a fɔ cɛkɔrɔbaw ni jama bɛɛ ye ko: «Aw kɛra ne seerew ye bii, ko ne ye Elimelɛki ni Kiliyɔn ani Malɔn ka fɛɛn bɛɛ minɛ Nawomi bolo.

¹⁰ Uruti ka bɔ Mowabu, ne y'ale fana sɔrɔ k'o kɛ n muso ye, ale min tun ye Malɔn muso ye. A kɛra ten, taabaga ka cɛɛn bena to ani a tɔgɔ kana tunu a badenw n'a ka dugu mɔgɔw cɛma. Aw kɛra ne seerew ye bii.»

¹¹ Jama ni cɛkɔrɔba minw tun be daa la, olu bɛɛ y'a fɔ ko: «An y'e seerew ye. Muso nin min be donna i ka soo, Masaba k'a kɛ i n'a fɔ Arasɛli ni Leya, minw ye Isirayɛli ka soo sii ye! E ka kɛ mɔgɔbaba ye Efarata ka sokala la, i tɔgɔ ka bɔ Bɛtilehɛmu!

¹² O la, Masaba bena kɔmɔgɔ minw d'i ma muso nin fɛ, olu k'i ka soo kɛ i n'a fɔ an bɛma Pɛrɛti ta, Tamari tun ye min wolo Zuda ye.»

¹³Boozi ye Uruti ta k'a furu. U jɛnna ɲɔgɔn fɛ, Masaba y'a hakili to Uruti la, a ye kɔnɔ ta ka dencɛ wolo.

¹⁴O la, musow y'a fɔ Nawomi ye ko: «Masaba tɔgɔ ka tanu, a ye mɔgɔ d'i ma bii min bena janto i la, min tɔgɔ bena fɔ Isirayɛlidenw cɛma.

¹⁵Deen nin bena i dusu saalo, ka kɛ i dɛmɛbaga ye n'i kɔrɔla tuma min na. Bari i biranmuso i koo ka di min ye haali ale ye deen sɔrɔ, o biranmuso nin ka fisa i fɛ ni dencɛ wolonwula ye.»

¹⁶Nawomi ye deen ta k'a la a disi kan, ka kɛ deen nin minɛbaga ye.

¹⁷Nawomi tɔɲɔgɔnw ko dencɛ sɔrɔla Nawomi ye! U y'a tɔgɔ la ko Obɛdi. Ale lo ye Zese [1] facɛ ye, Zese fana ye Dawuda facɛ ye.

¹⁸Pɛrɛti kɔmɔgɔw tɔgɔ filɛ: Pɛrɛti ye Ɛsirɔn wolo,

¹⁹Ɛsirɔn ye Aramu wolo, Aramu ye Aminadabu wolo,

²⁰Aminadabu ye Naasɔn wolo, Naasɔn ye Salima wolo,

²¹Salima ye Boozi wolo, Boozi ye Obɛdi wolo,

²²Obɛdi ye Zese wolo, Zese ye Dawuda wolo.