Read dyu Samuyɛli ka kitabu fɔlɔ 1 Bible Online

Samuyɛli ka kitabu fɔlɔ 1 - dyu bible

Samuyɛli ka kitabu fɔlɔ 1

¹Cɛɛ dɔ tun be Aramatayimusofimu dugu kɔnɔ, Efarayimu mara kuluyɔrɔ la, a tɔgɔ ko Ɛlikana. A facɛ tɔgɔ tun ko Yerowamu, ale fana faa tɔgɔ tun ko Eliwu, Eliwu faa fana tun ye Towu ye, ale faa fana tun ye Sufu ye. Sufu tun ye Efaratika ye.

²A ka musow tun ye fila ye, kelen tɔgɔ ko Annɛ, kelen tɔgɔ ko Penina. Penina tun ye deenw sɔrɔ, nga Annɛ ma foyi sɔrɔ.

³Saan o saan, cɛɛ nin tun be to ka bɔ a ka dugu la, ka taga Silo ka saraka bɔ Masaba, Setigi ye. Eli ka deen fila Ofini ni Pinasi le tun ye Masaba ka sarakalasebagaw ye o yɔrɔ la.

⁴Ni Ɛlikana ye saraka bɔ loon min na, a tun be deli k'a sogo dɔ di Penina n'a dencɛw n'a denmusow bɛɛ ma.

⁵A tun be to ka Penina ta ɲɔgɔn fila di Annɛ ma, bari Annɛ koo le tun ka d'a ye, hali ni Masaba y'a kɛ a te deen sɔrɔla.

⁶Annɛ sinamuso tun be to k'a darabɔ janko a ka dimi, bari Masaba tun y'a kɛ deen sɔrɔbali ye.

⁷Saan o saan, Ɛlikana tun be to k'a kɛ ten. Tuma o tuma ni Annɛ tagara Masaba ka soo, Penina tun be to k'o ɲɔgɔn kɛ a la. Saan dɔ la sa, Annɛ kasira ka ban dumuni na.

⁸A cɛɛ Ɛlikana y'a fɔ a ye ko: «Annɛ, mun na i be kasira? Mun na i te dumuni kɛ? Mun na i dusu cɛnnin lo ten? Ne man fisa ni deen tan ye i fɛ wa?»

⁹Ayiwa, k'u to Silo, u ye dumuni kɛ ka minni kɛ ka ban tuma min na, Annɛ wilila ka taga Alabatoso donda la. O y'a sɔrɔ sarakalasebaga Eli tun siginin be a ka sigilan kan Masaba ka soo daa la.

¹⁰A dusu tun cɛnnin be kosɔbɛ, a ye Masaba daali ni ɲaji ye.

¹¹ A ye dajuru ta Ala ye ko: «Masaba Setigi, ne, i ka jɔnmuso ka makari filɛ, k'i hakili to ne la, n'i hakili ma bɔ i ka jɔnmuso kɔ, n'i sɔnna ka dencɛ di ne ma, n bena deen nin kɔsegi e Masaba ma a k'a sii bɛɛ kɛ e bolo, a kuun tena li abada.»

¹²Annɛ mɛnna Masaba daali la. Eli tun b'a daa kɔlɔsira.

¹³A tun be daali kɛr'a kaan kɔnɔ. A dagolow dama le tun be magamagara, mɔgɔ tun t'a kumakan mɛn. O la, Eli tun b'a miiri ko a fara dɔrɔ la.

¹⁴A y'a fɔ a ye ko: «I bena to i ka dɔrɔtɔya la fɔɔ tuma jumɛn? I ɲamalɔ.»

¹⁵Annɛ y'a fɔ a ye ko: «Ayi ne matigi, ne ye muso dusukasinin ye, ne ma duvɛn min, walima minnifɛn fariman wɛrɛ, ne tun be ne dusuko le yirala Masaba la.

¹⁶Kana i ka jɔnmuso filɛ musokolon ye. Ne ka dusukasi ni n ka nitɔɔrɔ barika le boɲana, o le y'a to ne ye daali kɛ ka mɛn.»

¹⁷Eli y'a fɔ a ye ko: «Taga hɛrɛ la, i ye fɛɛn min ɲini Isirayɛli ka Ala fɛ, a k'o kɛ i ye.»

¹⁸Annɛ y'a fɔ Eli ye ko: «I ka makari i ka jɔnmuso la.» O kɔ, muso nin tagara dumuni kɛ, a ɲada yɛlɛmana.

¹⁹O dugusagwɛ sɔgɔmada joona, u wilila ka Masaba bato. O kɔ, u ye sira minɛ ka taga u fɛ Arama. Ɛlikana jɛnna n'a muso Annɛ ye, Masaba y'a hakili to Annɛ la.

²⁰O saan nin kɔnɔ, Annɛ ye kɔnɔ ta ka dencɛ wolo. A y'a tɔgɔ la ko Samuyɛli, ko bari ale y'a daali Masaba fɛ.

²¹O kɔ, a cɛɛ Ɛlikana tagara Silo n'a ka somɔgɔw bɛɛ ye janko ka saan o saan saraka bɔ Masaba ye, ani k'a ka dajuru sara.

²²Nga Annɛ ma taga. A y'a fɔ a cɛɛ ye ko ale be to fɔɔ ni deen nin daa nana bɔ siin na tuma min na, k'o tuma na, ale bena taga n'a ye Masaba ɲakɔrɔ a ka to yen tuma bɛɛ.

²³A cɛɛ Ɛlikana y'a fɔ a ye ko ni min ka d'a ye, a k'o kɛ, ko a ka to yen fɔɔ deen nin daa ka bɔ siin na. Ko Masaba ye min fɔ, a k'o kɛ dɔrɔn. O la, muso nin tora soo k'a deen balo fɔɔ ka taga se tuma min na a daa bɔra siin na.

²⁴Deen daa bɔra siin na tuma min na, a tagara n'a ye Masaba ka soo Silo ni tura saba ye, ni fiyɛ ɲaa kelen mugu, ani duvɛn ye, foroko kɔnɔ. Deen nin tun ye denfitini ye.

²⁵U ye tura nunu faga, ka deen nin ta ka taga n'a ye Eli fɛ.

²⁶Annɛ y'a fɔ Eli ye ko: «Matigi, hakɛ to, Ala k'i mɛn an kɔrɔ. Muso min tun nana lɔ i gɛrɛfɛ yan ka Masaba daali loon dɔ, ne be tiɲɛ fɔ i ye, ne lo.

²⁷Ne tun ye Masaba daali deen nin le kosɔn, ne tun ye fɛɛn min ɲini a fɛ, a y'o kɛ ne ye.

²⁸Ne fana b'a kalifa Masaba ma, a sii bɛɛ la a bena kɛ Masaba ta ye, ka to k'a bato.» O kɔ, u ye Masaba bato.