Read dyu Samuyɛli ka kitabu fɔlɔ 10 Bible Online

Samuyɛli ka kitabu fɔlɔ 10 - dyu bible

Samuyɛli ka kitabu fɔlɔ 10

¹Samuyɛli ye daganin dɔ bɔ tulu tun be min kɔnɔ. A ye tulu nin yɛlɛma Sayuli kuun na. O kɔ, a y'a bolo meleke a la k'a fɔ a ye ko: «Masaba y'i woloma ka kɛ a yɛrɛ ka jama ɲamɔgɔ ye. [1]

²N'i bɔra ne fɛ bii, i bena mɔgɔ fila dɔ kunbɛn Sɛlisa, Arasɛli ka kaburu gɛrɛfɛ, Bɛnzamɛn kɔmɔgɔw ka mara daan na. I be fali minw ɲinina, olu ben'a fɔ i ye ko u yera, ko i facɛ ɲinɛna ni fali nunu koo ye, sisan a be hami aw le ka koo la, k'a fɔ ko ale ka kan ka mun le kɛ a deen kosɔn.

³N'i bɔra o yɔrɔ la ka taga ɲafɛ fana, i bena se Tabɔri ka joyiri kɔrɔ. O yɔrɔ la, i bena mɔgɔ saba kunbɛn n'u be tagara Alabatoyɔrɔ la Betɛli. Baden saba be mɔgɔ kelen bolo, burukun saba fana be filanan fɛ, duvɛn be sabanan fɛ foroko kɔnɔ.

⁴U bena i fo, o kɔ, u bena burukun fila d'i ma. I k'o minɛ.

⁵O kɔ, i bena tɛmɛ ka se Ala ka Gibeya, filisiw ka lasigidenw siginin be yɔrɔ min na. N'i be donna dugu kɔnɔ tuma min na, i bena kiraw ka jɛnkulu dɔ kunbɛn n'u be bɔra sarakabɔyɔrɔ la. Kolonjo, ni dundun ani filen ni gɔnifɔbagaw b'u ɲafɛ, n'u yɛrɛ be kirayakuma fɔra.

⁶Masaba ka Nii bena don i la, e bena fara u kan ka kirayakuma fɔ fana. O la, i cogo bena yɛlɛma.

⁷Ni o taamasiɲɛ nunu kɛra ka ban tuma min na, i be se ka fɛɛn min kɛ, i k'o kɛ, bari Ala b'i fɛ.

⁸I bena taga ne ɲa Giligali, ne bena na i sɔrɔ yen, ka saraka jɛnitaw ni jɛnɲɔgɔnya sarakaw bɔ. I bena kɔnɔni kɛ tile wolonwula fɔɔ ne ka na i sɔrɔ. O waati la, e bena fɛɛn min kɛ, ne bena o fɔ i ye.»

⁹Sayuli bɔra Samuyɛli kɔrɔ dɔrɔn, Ala ye Sayuli cogo yɛlɛma. Taamasiɲɛ nunu bɛɛ kɛra o loon kelen na.

¹⁰U sera Gibeya tuma min na, kiraw ka jɛnkulu dɔ nan'a kunbɛn. Ala ka Nii donn'a la, a y'a daminɛ ka kirayakuma fɔ fana u cɛma.

¹¹Mɔgɔ minw bɛɛ tun b'a lɔn ka kɔrɔ, olu y'a ye n'a be kirayakuma fɔra dɔrɔn, u tora ka ɲɔgɔn ɲininga ko: «Mun le kɛra Kisi dencɛ la? Sayuli fana ye kira ye wa?»

¹² Gibeyakaw dɔ y'a fɔ ko: «U faa ye jɔn ye? Sayuli fana ye kira ye wa?» A kɛra talen ye ten.

¹³Sayuli ye kirayakuma fɔ ka ban tuma min na, a tagara sarakabɔyɔrɔ la.

¹⁴A facɛfitini y'a fɔ a n'a ka baaraden ye ko: «Aw tun tagara min?» Sayuli y'a jaabi ko: «An tun tagara faliw ɲiniyɔrɔ la, nga an ma u ye, an tagara Samuyɛli fɛ.»

¹⁵A y'a fɔ Sayuli ye ko Samuyɛli ye fɛɛn min fɔ a ye, ko a k'o fɔ ale ye.

¹⁶Sayuli y'a jaabi ko: «A y'a fɔ an ye ko fali nunu yera.» Samuyɛli ye koo min fɔ a ye masaya koo la, a ma o fɔ a ye.

¹⁷Samuyɛli ye Isirayɛli jama wele ka na Misipa, Masaba ɲakɔrɔ,

¹⁸k'a fɔ u ye ko: «Masaba, Isirayɛli ka Ala y'a fɔ ko ale ye Isirayɛlidenw bɔ Ezipiti jamana na, k'u bɔsi Ezipitikaw bolo, ni masacɛw bolo, minw bɛɛ tun be u tɔɔrɔ.

¹⁹Bii aw banna aw ka Ala la, ale min ye aw kisi aw ka tɔɔrɔw, n'aw ka sigɛn bɛɛ ma. Aw y'a fɔ a ye ko a ka masacɛ di aw ma. Ayiwa, sisan aw ye na Masaba ɲakɔrɔ sokala sokala ani fadenyabolo fadenyabolo.»

²⁰Samuyɛli y'a kɛ Isirayɛlidenw kɔmɔgɔw bɛɛ gwɛrɛla, Bɛnzamɛn kɔmɔgɔw wolomana.

²¹A y'a kɛ Bɛnzamɛn kɔmɔgɔw gwɛrɛla fadenyabolo fadenyabolo. Matiri ta wolomana. O kɔ, Kisi dencɛ Sayuli wolomana. U y'a ɲini, u m'a ye.

²²U tilara ka Masaba daali tugu ko: «Mɔgɔ dɔwɛrɛ be yan tugu wa?» Masaba ko: «A dogonin be minanw jukɔrɔ.»

²³U bolila ka ta'a wele yen. A nana jama cɛma. A tun ka jan kosɔbɛ, a kuun tun tɛmɛna bɛɛ kan.

²⁴Samuyɛli y'a fɔ jama bɛɛ ye ko: «Masaba ye mɔgɔ min woloma, aw m'a ye wa? Mɔgɔ si te jama cɛma min b'a bɔ.» Jama pɛrɛnna ko: «Masacɛ ka sii sɔrɔ!»

²⁵Masacɛ ka kɛta ye min ye, Samuyɛli y'o fɔ jama ye, ka tila k'o sɛbɛn sɛbɛ dɔ kɔnɔ k'a bila Masaba ɲakɔrɔ, ka sɔrɔ ka sira di jama bɛɛ ma u ka taga u ka soo.

²⁶Sayuli fana tagar'a ka soo Gibeya dugu kɔnɔ. Ala tun kumana mɔgɔsɔbɛ minw dusu la, olu tagara n'a ye fana.

²⁷Mɔgɔkolon dɔw tun be yen minw b'a fɔra ko: «Cɛɛ nin bena kɛ di k'an kisi?» U tun b'a lɔgɔbɔ, u ma sɔn ka boɲafɛn si d'a ma. Nga Sayuli m'a daa don u daa la.