Read dyu Samuyɛli ka kitabu fɔlɔ 11 Bible Online

Samuyɛli ka kitabu fɔlɔ 11 - dyu bible

Samuyɛli ka kitabu fɔlɔ 11

¹Amonicɛ Naasi wilila ka kɛlɛ labɛn Yabɛsi kama, Galaadi mara la. Yabɛsikaw bɛɛ y'a fɔ Naasi ye ko a k'a to u be teriya don, k'olu bena baara kɛ a ye.

²Nga a y'u jaabi ko sanni ale ka sɔn ka teriya nin don n'u ye, k'u ka sɔn ale b'u kelen kelen bɛɛ kinibolo ɲaden cici, k'o la, ale bena Isirayɛlidenw bɛɛ maloya.

³Yabɛsi cɛkɔrɔbaw y'a fɔ a ye ko a ka tile wolonwula di u ma, u bena mɔgɔw ci Isirayɛli jamana yɔrɔ bɛɛ la. Ni mɔgɔ ma sɔrɔ min bena olu kisi, k'olu bena u yɛrɛ di a ma.

⁴Ciden nunu sera Sayuli ka dugu Gibeya kɔnɔ ka kuma nin fɔ jama ye. Jama bɛɛ kasira kosɔbɛ.

⁵O y'a sɔrɔ Sayuli bɔra foro kɔnɔ n'a be tugura misiw kɔ ka na. A ye ɲiningali kɛ ko: «Mun le ye jama sɔrɔ n'u be kasira ten?» Yabɛsikaw tun ye fɛɛn min fɔ, u y'o fɔ a ye.

⁶Sayuli y'o kuma mɛn dɔrɔn, Ala ka Nii donn'a la, a dimina kosɔbɛ.

⁷A y'a ka sɛnɛkɛmisi fila minɛ k'u faga, k'u sogo tigɛtigɛ, k'a ci Isirayɛlidenw ka jamana yɔrɔ bɛɛ la, k'a fɔ ko ni mɔgɔ min banna ka tugu ale ni Samuyɛli kɔ ka taga kɛlɛ la, k'o tigi ka misiw bena minɛ ka tigɛtigɛ ten. Masaba ye siraɲa bila Isirayɛli jama na kosɔbɛ. U wilila ka jɛn ka kɛ kelen ye ka tugu a kɔ.

⁸Sayuli ye jama jati Bɛzɛki. Minw bɔra Isirayɛli mara la, olu tun ye mɔgɔ waa kɛmɛ saba (300 000) ye, minw bɔra Zuda mara la olu tun ye mɔgɔ waa bi saba (30 000) ye.

⁹Ciden minw tun nana yen, u y'a fɔ olu ye k'u ka ta'a fɔ Yabɛsikaw ye ko sini u bena dɛmɛ sɔrɔ, tilegwanfɛ. Ciden nunu segira ka taga o kuma fɔ Yabɛsikaw ye, u nisɔndiyara.

¹⁰Yabɛsikaw y'a fɔ amoniw ye ko: «Sini an bena na an yɛrɛ di aw ma, fɛɛn min ka di aw ye, aw k'o kɛ an na.»

¹¹O dugusagwɛ, Sayuli ye jama tilan sigiyɔrɔ saba. U tagara don amoniw ka kɛlɛbolo sigiyɔrɔ la, dugu tun ma gwɛ fɔlɔ, k'u kɛlɛ fɔɔ ka na se tilegwan ma. Mɔgɔ minw sera ka kisi, olu bɛɛ bolila u yɛrɛ kunfɛ, hali mɔgɔ fila yɛrɛ ma se ka to ɲɔgɔn fɛ.

¹²Jama y'a fɔ Samuyɛli ye ko: «Jɔn le tun b'a fɔra ko Sayuli tena kɛ masacɛ ye an kunna? Aw k'o mɔgɔ nunu d'an ma an b'u faga.»

¹³Nga Sayuli y'a fɔ ko: «Mɔgɔ si tena faga bii loon nin na, bari Masaba ye Isirayɛlidenw kisi.»

¹⁴Samuyɛli y'a fɔ jama ye ko: «Aw ye na an be taga Giligali janko an ka masaya nin sigi ka ɲa.»

¹⁵Jama bɛɛ tagara Giligali k'a fɔ Masaba ɲakɔrɔ tugu ko Sayuli ye u ka masacɛ ye. U ye jɛnɲɔgɔnya sarakaw bɔ Masaba ye o yɔrɔ la. Sayuli ni Isirayɛlidenw bɛɛ nisɔndiyara kosɔbɛ.