Read dyu Samuyɛli ka kitabu fɔlɔ 12 Bible Online

Samuyɛli ka kitabu fɔlɔ 12 - dyu bible

Samuyɛli ka kitabu fɔlɔ 12

¹Samuyɛli y'a fɔ Isirayɛli jama bɛɛ ye ko: «Aw ye fɛɛn o fɛɛn fɔ ne ye, ne sɔnna o bɛɛ la, ne ye masacɛ sigi aw kunna.

²Sisan, o masacɛ be aw kunna. Ne kɔni kɔrɔla fɔɔ n kuun gwɛra, ne deenw be n'aw ye yan. Ne kɛra aw kuntigi ye k'a ta n kanbelen tuma na fɔɔ ka na se bii ma.

³Ne filɛ aw ɲa. Ne ye koo minw kɛ aw la, aw k'o bɛɛ fɔ Masaba n'a ka mɔgɔ wolomanin ɲakɔrɔ. Ni n ye min ka misi bɔsi, a k'a fɔ, ni n ye min ka fali bɔsi, o tigi k'a fɔ. N ye min tɔɲɔ, o fana k'a fɔ, n ye min tɔɔrɔ, o tigi k'a fɔ fana. Ne ye n ɲaa tugu min ka kojugu kan a ka boɲafɛn kama, o tigi k'a yɛrɛ yira. Ne ben'a ɲɔgɔn kɔsegi aw ma.»

⁴U y'a jaabi ko: «I ma an tɔɲɔ ka ye, i fana ma an tɔɔrɔ ka ye. I ma foyi minɛ mɔgɔ si fɛ ka ye.»

⁵A y'a fɔ u ye tugu ko: «Masaba n'a ka mɔgɔ wolomanin kɛra an seerew ye bii, aw y'a fɔ ko aw ma foyi sɔrɔ n kama.» U y'a jaabi ko: «Ɔnhɔn.»

⁶ O tuma na, a y'a fɔ u ye ko: «Masaba le ye Musa ni Arɔn sigi aw faaw kunna, k'u bɔ Ezipiti jamana na.

⁷«Sisan, aw ye gwɛrɛ ka na, ne bena aw kiti Masaba ɲakɔrɔ, a ye koɲuman minw bɛɛ kɛ aw n'aw faaw ye, o kosɔn.

⁸ Yakuba n'a kɔmɔgɔw sera Ezipiti tuma min na, tɔɔrɔ sera aw faaw ma yen, u ye Masaba daali, Masaba ye Musa ni Arɔn ci, olu ye aw faaw bɔ o yɔrɔ la ka na n'u ye yan.

⁹ Nga u ɲinɛna Masaba u ka Ala kɔ. O la, a y'a to Asɔri kɛlɛdenw kuntigi Sizera sera u kɔrɔ, ani filisiw ni mowabuw ka masacɛ, olu y'u kɛlɛ.

¹⁰ U kulera Masaba kɔ tugu ko u ye hakɛ kɛ, ko bari u y'ale to yen ka *Baali ni *Asitarite sɔn yɔrɔ caaman na. Ko sisan a k'u bɔsi u juguw bolo, k'olu ben'a bato.

¹¹ Masaba ye Yerubaali, ni Bedan, ani Zɛfite, ni Samuyɛli wele, a y'aw bɔsi aw juguw bolo, minw b'aw lamini, aw tora hɛrɛ la.

¹² Nga tuma min na aw y'a ye ko amoniw ka masacɛ Naasi be nana aw kama, aw ko ne ma: ‹Ayi! Masacɛ bena sigi an kunna.› O y'a sɔrɔ Masaba aw ka Ala le tun ye aw ka masa ye.

¹³«Aw ye masacɛ min woloma, aw tun ye min ɲini, ale filɛ sa, Masaba ye masacɛ sigi aw kunna.

¹⁴Ni aw tora ka siran Masaba ɲa, n'aw be ale kelen bato, ka mɛnni kɛ a fɛ, ni aw ma muruti ka ban a ka kuma ma, aw n'aw ka masacɛ, min siginin be aw kunna, aw bena se ka bɛɛn ni Masaba aw ka Ala ye.

¹⁵Nga n'aw ma sɔn ka mɛnni kɛ Masaba fɛ, n'aw murutira ka ban a ka kuma ma, a bena aw tɔɔrɔ i n'a fɔ a y'aw faaw tɔɔrɔ cogo min na.

¹⁶«Aw ka kɔnɔni kɛ yan tugu, Masaba bena kabako min kɛ aw ɲana, aw bena o ye.

¹⁷Tilemanawaati te nin ye wa? Ne bena Masaba daali, a ben'a kɛ saan be pɛrɛn, sanji be ben. O la, aw ben'a lɔn ko aw ye masacɛ ɲini minkɛ, aw ye kojuguba kɛ Masaba ɲakɔrɔ.»

¹⁸Samuyɛli ye Masaba daali, Masaba y'a kɛ saan pɛrɛnna, sanji benna o loon yɛrɛ la. Mɔgɔ bɛɛ siranna kosɔbɛ Masaba ni Samuyɛli ɲa.

¹⁹Jama bɛɛ y'a fɔ Samuyɛli ye ko: «I ka Masaba i ka Ala daali i ka baaradenw ye, janko an kana sa, bari an ye masacɛ ɲini ka dɔ fara an ka hakɛ le kan.»

²⁰Samuyɛli y'a fɔ jama ye ko: «Aw kana siran, aw kɔni ye kojuguw bɛɛ kɛ, nga aw kana aw kɔɔ sin Masaba ma, aw k'a bato n'aw kɔnɔ bɛɛ ye.

²¹Aw kana bɔ a kɔ. N'o tɛ, aw bena taga fɛɛn kuntan dɔw kɔ, minw tena aw mako ɲa, u fana tena se k'aw kisi, bari u te foyi ye.

²²Masaba tɔgɔ ka bon. O le kosɔn, a tena sɔn k'a ka jama fili, bari a y'a latigɛ k'aw kɛ a ka jama ye.

²³Masaba ka ne fana kisi ne kan'a hakɛ ta ka daaliliko dabila aw ye! Ne bena to k'aw kalan ka siraɲuman ni siratilennin don aw seen kɔrɔ.

²⁴Aw ye siran Masaba ɲa ani k'a bato sɔbɛ la n'aw dusu bɛɛ ye. A ye sebagayako min kɛ aw ye, aw yɛrɛ ka miiri o la.

²⁵Nga ni aw ye kojugu kɛ, aw ni aw ka masacɛ bena halaki.»