Read dyu Samuyɛli ka kitabu fɔlɔ 15 Bible Online

Samuyɛli ka kitabu fɔlɔ 15 - dyu bible

Samuyɛli ka kitabu fɔlɔ 15

¹ Samuyɛli y'a fɔ Sayuli ye ko: «Masaba ye ne le ci ko ne ka na tulu bɔn i kuun na k'i kɛ masacɛ ye a ka jama, Isirayɛli kunna. Masaba be fɛɛn min fɔ, o mɛn sa.

² Masaba Setigi y'a fɔ ko: ‹Amalɛkiw ye fɛɛn min kɛ Isirayɛlidenw na u bɔwaati la Ezipiti jamana na, n'u tun ye sira tugu u ɲa, ne bena u ɲaa gwan o kosɔn.

³O la, wili ka taga u kɛlɛ sisan k'u halaki pewu n'u bololafɛn bɛɛ, foyi kana to yen. I ka cɛɛw ni musow faga, ni denmisɛnw, ni denɲɛninw, ani misiw, ni begɛnmisɛnw, ni ɲɔgɔmɛw, ani faliw.› »

⁴Sayuli ye jama lajɛn k'u jati Telayimu. Kɛlɛden minw tun be taama seen na, olu bɛnna mɔgɔ waa kɛmɛ fila (200 000) ma. Zuda mara mɔgɔw tun ye mɔgɔ waa tan (10 000) ye.

⁵Sayuli tagara fɔɔ ka taga se amalɛkiw ka dugu daa la, ka kɛlɛden dɔw dogo kɔkɛnɛ na.

⁶A y'a fɔ keniw ye k'olu ka wili ka bɔ amalɛkiw cɛma, janko a kana u halaki ɲɔgɔn fɛ, ko bari olu tun ye Isirayɛlidenw bɛɛ minɛ ka ɲa u bɔtuma Ezipiti jamana na. O la, keniw wilila ka bɔ u cɛma.

⁷A ye amalɛkiw kɛlɛ k'a ta Awila fɔɔ ka ta'a bila Suri, Ezipiti jamana kɔrɔn fɛ.

⁸A ye amalɛkiw ka masacɛ Agagi minɛ ka mɔgɔ bɛɛ halaki pewu ni murujan ye.

⁹Nga Sayuli ni jama ma sɔn ka Agagi, ni begɛnmisɛn ɲanamanw, ni misiw, ani begɛn sifa wɛrɛ dɔw, ni sagadenw, ani minw bɛɛ ka ɲi faga. A y'u ɲanaman to yen, nga fɛɛn minw ma ɲi ni tɔnɔ t'u la, a ye olu bɛɛ halaki pewu.

¹⁰Masaba y'a fɔ Samuyɛli ye ko:

¹¹«Ne ye Sayuli kɛ masacɛ ye. Ne be nimisa n'o ye, bari a y'a kɔɔ sin ne ma, a te ne ka kuma batora.» O digira Samuyɛli la. A ye Masaba daali fɔɔ ka dugu gwɛ.

¹²Sɔgɔmadafɛ, a wilila ko a be taga Sayuli kunbɛn. Mɔgɔ dɔ y'a fɔ a ye ko Sayuli tagara Karimɛli kulu kan ka jaa lɔ o yɔrɔ la a yɛrɛ tɔgɔ la. O kɔ, a tagara ɲa tugu ka taga Giligali.

¹³Samuyɛli tagar'a fɛ, a y'a fɔ Samuyɛli ye ko: «Masaba ka barika don i la, ne ye Masaba ka kuma bato.»

¹⁴Samuyɛli y'a fɔ a ye ko: «Saga ni misi minw kasikan be bɔra, o ye mun le ye?»

¹⁵A ye Samuyɛli jaabi ko: «Jama le ye saga ni misi ɲumamanw ɲanaman to, k'u minɛ amalɛkiw fɛ, ka na n'u ye janko u ka saraka bɔ Masaba i ka Ala ye n'u ye, an y'u tɔɔ halaki pewu.»

¹⁶Samuyɛli y'a fɔ a ye ko: «Je, Masaba ye fɛɛn min fɔ ne ye kunun sufɛ, ne bena o fɔ i ye.» A y'a fɔ ko Samuyɛli k'o fɔ.

¹⁷Samuyɛli y'a fɔ ko: «E tun t'i yɛrɛ jati foyi ye tuma min na, i ma kɛ Isirayɛlidenw kuntigi ye wa? Masaba le y'i woloma ka sigi Isirayɛlidenw kunna.

¹⁸A tun y'i ci ko i ka taga amalɛki hakɛkɛla nunu halaki pewu, ko i k'u kɛlɛ fɔɔ k'u bɛɛ ban.

¹⁹Mun na i ma Masaba ka kuma bato? Mun na i girinna u bolofɛnw kan, ka kojugu kɛ Masaba ɲakɔrɔ ten?»

²⁰A y'a fɔ Samuyɛli ye ko: «Ne ye Masaba ka kuma bato, Masaba ye ne ci ka koo min kɛ, ne y'o kɛ. Ne ye amalɛkiw ka masacɛ Agagi ka mɔgɔw bɛɛ halaki pewu, k'ale minɛ ka segi n'a ye.

²¹Minw tun ka kan ka halaki pewu, jama ye saga ni misi ɲumamanw minɛ ka bɔ olu cɛma janko u ka na o kɛ saraka ye Masaba i ka Ala ye Giligali.»

²²Samuyɛli y'a fɔ a ye ko: «Saraka jɛnitaw ni saraka tɔw koo ka di Masaba ye i ko a ka kuma batoko wa? Ka sɔn a sago ma, o ka fisa ni saraka ye. Ka mɛnni kɛ a fɛ, o ka fisa ni sagajigi tulu ye.

²³Bari ka ban a ta ma, o ye hakɛ ye i ko lagwɛli, murutili ka jugu i ko josɔn. I banna ka Masaba ka kuma bato, ale fana banna i la. I tena kɛ masacɛ ye tugu.»

²⁴Sayuli y'a fɔ Samuyɛli ye ko: «Ne ye hakɛ kɛ, ne ye Masaba ka sariya cɛn, ne m'a ka kuma bato. Ne tun siranna jama ɲa ka mɛnni kɛ u fɛ.

²⁵Sisan ne b'i daali i ka ne ka hakɛ yafa, kɔsegi ka na an be taga ɲɔgɔn fɛ, ne bena Masaba bato.»

²⁶Samuyɛli y'a fɔ a ye ko: «Ne tena kɔsegi ka taga n'i ye tugu, bari i banna Masaba ka kuma ma, o la Masaba fana banna i la. I tena kɛ masacɛ ye Isirayɛlidenw kunna tugu!»

²⁷ Samuyɛli yɛlɛmana ko a be taga, Sayuli y'a ka foroca dagolo minɛ, o faranna.

²⁸Samuyɛli y'a fɔ a ye ko: «Bii Masaba ye masaya bɔsi i la k'a di mɔgɔ dɔ wɛrɛ ma min ka fisa n'i ye.

²⁹Isirayɛli kunkɔrɔtabaga te galon tigɛ, a fana t'a daa yɛlɛma, adamaden tɛ n'a b'a daa yɛlɛma.»

³⁰Sayuli y'a fɔ tugu ko ale ye hakɛ kɛ, ko sisan ale b'a daali, a k'ale boɲa a ka siya cɛkɔrɔbaw ni Isirayɛliden tɔw ɲana, ko a ka kɔsegi ka na u be taga ɲɔgɔn fɛ, ale be Masaba a ka Ala bato.

³¹Samuyɛli kɔsegira ka taga ni Sayuli ye, a ye Masaba bato.

³²O kɔ, Samuyɛli y'a fɔ ko u ka amalɛkiw ka masacɛ Agagi minɛ ka na n'a ye ale fɛ. Agagi nisɔn tun diyara n'a be nana Samuyɛli fɛ. A tun b'a miiri ko a tena sa tugu.

³³Samuyɛli y'a fɔ a ye ko: «I y'i ka murujan kɛ ka musow bɔnɔ u deenw na cogo min na, o cogo kelen na i bamuso fana bena bɔnɔ a deen na.» O kɔ, a y'a faga Masaba ɲakɔrɔ Giligali.

³⁴Samuyɛli tɛmɛna ka taga Arama. Sayuli tagar'a ka soo Gibeya, a ka dugu la.

³⁵Samuyɛli ma taga Sayuli fɛ tugu fɔɔ ka taga se a ka saya ma. A tun be kasi Sayuli kosɔn, bari Masaba tun nimisara ka ban Sayuli kosɔn ko mun na ale y'a kɛ masacɛ ye Isirayɛlidenw fɛ.