Read dyu Samuyɛli ka kitabu fɔlɔ 16 Bible Online

Samuyɛli ka kitabu fɔlɔ 16 - dyu bible

Samuyɛli ka kitabu fɔlɔ 16

¹Masaba y'a fɔ Samuyɛli ye ko: «I bena to ka kasi Sayuli kosɔn fɔɔ tuma jumɛn? Ne bann'a la, a te se ka kɛ masacɛ ye Isirayɛlidenw kunna tugu. Wili k'i ka gɔɔn fa tulu la ka taga. Ne b'i ci Zese fɛ ka bɔ Bɛtilehɛmu, bari ne ye masacɛ woloma a deenw cɛma.»

²Samuyɛli y'a jaabi ko ale be se ka taga cogo di. Ko ni Sayuli y'o mɛn, a ben'a faga. Masaba fana y'a fɔ ko: «N'i be taga tuma min na, i be misi dɔ minɛ ka taga n'a ye, i b'a fɔ ko e nana janko ka saraka bɔ Masaba ye.

³I be Zese wele ka na saraka bɔyɔrɔ la. I ka kan ka fɛɛn min kɛ, ne bena o fɔ i ye. Ne bena mɔgɔ min yira i la, i ka tulu bɔn ale kuun na.»

⁴Masaba ye fɛɛn min fɔ, Samuyɛli y'o kɛ. A tagara Bɛtilehɛmu. Dugu cɛkɔrɔbaw sirantɔ y'a kunbɛn, fɔɔ u be yɛrɛyɛrɛ. U y'a ɲininga ko kɔni a ka di dɛ.

⁵A y'u jaabi ko: «Ɔnhɔn! Ne nana janko ka saraka bɔ Masaba ye. Aw k'aw yɛrɛ saniya ka na an be taga saraka bɔyɔrɔ la.» A ye Zese n'a deenw saniya k'u wele ka taga saraka bɔyɔrɔ la.

⁶Olu setɔ, a ye Eliyabu ye, a ko Masaba ye min woloma, nin yɛrɛ yɛrɛ lo min b'a ɲafɛ.

⁷Nga Masaba y'a fɔ a ye ko: «I kan'a filɛ a ɲada ma n'a ka jaɲa ma, bari ne banna ale la. Mɔgɔ be fɛɛn min jati, ne, Masaba te o jati. Mɔgɔ b'a tɔɲɔgɔn filɛ a ɲaa ma dama, nga ne, Masaba be dusu le filɛ.»

⁸Zese ye Abinadabu wele ka tɛmɛ Samuyɛli ɲafɛ, a tɛmɛna. Samuyɛli ko Masaba ma nin fana woloma.

⁹A ye Sama fana wele, ale nana, Samuyɛli ko Masaba ma nin fana woloma.

¹⁰Zese y'a deen wolonwula bɛɛ wele, u nana, Samuyɛli y'a fɔ ko Masaba ma u si woloma.

¹¹O kɔ, Samuyɛli ye Zese ɲininga ko: «I deenw bɛɛ le ye nunu ye wa?» A ye Samuyɛli jaabi k'u bɛɛ dɔgɔnin le tora, ko ale be saga dɛndɛna kongo kɔnɔ. Samuyɛli y'a fɔ a ye ko: «Mɔgɔ ci ka ta'a wele, an tena saraka dumuni kɛ n'a ma na.»

¹²Zese ye mɔgɔ ci. A tagar'a wele, a nana. Cɛwulennin tun lo. A ɲada ka ɲi, a cɛɛ tun ka ɲi. Masaba y'a fɔ Samuyɛli ye ko: «Wili ka tulu bɔn a kuun na, ale lo.»

¹³Samuyɛli ye gɔɔn ta, tulu be min kɔnɔ, k'a bɔn a kuun na a kɔrɔw ɲana. Masaba ka Nii donna Dawuda la kabini o loon na ani waati tɔɔ bɛɛ la. O kɔ, Samuyɛli wilila ka taga Arama.

¹⁴Masaba ka Nii bɔra Sayuli la, o kɔ, Masaba y'a kɛ nii kuntan dɔ tora k'a sigɛn.

¹⁵Sayuli ka baaradenw y'a fɔ a ye ko: «A filɛ, Ala y'a kɛ nii kuntan be to k'i sigɛn.

¹⁶Matigi, an be mɛnni kɛra i fɛ, n'i b'a fɛ ka min fɔ, i k'o fɔ. An bena mɔgɔ dɔ ɲini min be se ka gɔni fɔ, ni Ala y'a kɛ nii kuntan nin wilila i kama tuma o tuma, o tigi be gɔni nin fɔ i hakili be sigi.»

¹⁷Sayuli y'a fɔ a ka baaraden nunu ye ko mɔgɔ min be se kolonjo fɔli la kosɔbɛ, k'u k'o ɲini ka na n'a ye ale fɛ.

¹⁸Sayuli ka baaraden dɔ y'a fɔ ko ale ye Zese ka bɔ Bɛtilehɛmu deen dɔ ye. A be se fɔli la kosɔbɛ, a jaa ka gwɛlɛ fana, a be se kɛlɛ la, a ka kuma ka di, a fana ɲada ka ɲi. Masaba fana be n'a ye.

¹⁹Sayuli ye mɔgɔ bila ka ta'a fɔ Zese ye ko: «I deen Dawuda min be sagaw dɛndɛna, i k'ale bila ka na ne fɛ.»

²⁰Zese ye fali dɔ minɛ ka dumuni di a dencɛ Dawuda ma, ni duvɛn, foroko kɔnɔ, ani baden, ko a ka taga o di Sayuli ma.

²¹Dawuda sera Sayuli fɛ ka baara daminɛ. A koo diyar'a ye kosɔbɛ. A y'a kɛ a ka kɛlɛkɛminanw tabaga ye.

²²Sayuli ye cii bila ka ta'a fɔ Zese ye ko a ka sabali ka Dawuda to ale ye, a ka kɛ ale ka baarakɛla ye, ko bari a koo diyara ale ye.

²³Tuma o tuma ni Ala y'a kɛ nii kuntan wilila Sayuli kama, Dawuda tun be to ka gɔni fɔ, o tuma na, a be ninakili ka ɲa, a hakili be sigi, nii kuntan nin be sɔrɔ k'a bila.