Read dyu Samuyɛli ka kitabu fɔlɔ 18 Bible Online

Samuyɛli ka kitabu fɔlɔ 18 - dyu bible

Samuyɛli ka kitabu fɔlɔ 18

¹Yanni Dawuda be tila a ka kuma na ni Sayuli ye, a koo diyara Zonatan ye i n'a fɔ a yɛrɛ, Zonatan nɔrɔl'a la.

²O loon yɛrɛ la, Sayuli ye Dawuda minɛ k'a to a yɛrɛ fɛ, a ma sɔn a ka ta'a faso la tugu.

³Zonatan ye teriya don ni Dawuda ye, bari a koo tun ka di a ye i n'a fɔ a yɛrɛ.

⁴Zonatan y'a yɛrɛ ka foroca bɔ a kaan na, k'a di Dawuda ma ani faniw. A fana y'a ka murujan n'a ka kala n'a ka cɛsirinan d'a ma.

⁵Sayuli tun be Dawuda ci kɛlɛkɛyɔrɔ o kɛlɛkɛyɔrɔ, Dawuda tun be see sɔrɔ. O la, Sayuli y'a sigi a ka kɛlɛdenw kunna. O tun diyara jama bɛɛ ye, ani Sayuli ka kɛlɛdenw fana.

⁶Dawuda tun ye Goliyati faga ka ban tuma min na, k'u to n'u be kɔsegira ka na, musow bɔra Isirayɛlidenw ka duguw bɛɛ kɔnɔ ka masacɛ Sayuli kunbɛn, n'u be dɔnkili lara, ka dundunw ni fɔlikɛminaw dɔw fɔ ka dɔɔn kɛ, ka to ka mankan kɛ nisɔndiya bolo.

⁷ Muso minw tun be dɔɔn kɛra, u tun be to k'a fɔ u ka dɔnkili la ko: «Sayuli ye mɔgɔ waa damani faga, Dawuda ye mɔgɔ waa tan tan faga.»

⁸O la, Sayuli dimina, u ka dɔnkili nin digir'a la kosɔbɛ. A ko u ye waa tan tan di Dawuda ma ka waa damani dɔrɔn di ale ma, ko a tɔɔ tora u k'a kɛ masacɛ ye.

⁹K'a ta o loon ma n'o kɔfɛ bɛɛ, Sayuli tun te Dawuda filɛ ni ɲaɲuman ye tugu.

¹⁰O dususagwɛ, Ala y'a kɛ nii kuntan dɔ wilila Sayuli la. K'a to a ka soo kɔnɔ, a tun t'a yɛrɛ kala ma tugu. A ka taman tun b'a bolo. O y'a sɔrɔ Dawuda tun b'a ka gɔni fɔra i n'a fɔ a tun be deli k'a kɛ cogo min na.

¹¹Sayuli y'a ka taman kɔrɔta ko a be Dawuda kori ni kogo ye k'a sɔgɔ, nga Dawuda sera k'a yɛrɛ bɔ Sayuli ka taman ɲakɔrɔ siɲɛ fila.

¹²Sayuli tun be siran Dawuda ɲa, bari Masaba tun be ni Dawuda ye, a tun ye Sayuli bila.

¹³O la, Sayuli ye Dawuda yɔrɔ jaɲa a yɛrɛ la. A y'a kɛ kɛlɛden waa kelen kuntigi ye. A kɛra ten, Dawuda tun be to ka bila kɛlɛdenw ɲa ka taga kɛlɛ kɛ ka kɔsegi ka na.

¹⁴Dawuda tun be see sɔrɔ a ka koo bɛɛ la, bari Masaba fana tun be n'a ye.

¹⁵Sayuli y'a ye ko Dawuda be see sɔrɔla, a siranna Dawuda ɲa.

¹⁶Nga Dawuda koo tun ka di Isirayɛli ni Zuda mara mɔgɔw bɛɛ ye, bari a tun be to ka bɔ ka taga kɛlɛ kɛ n'u ye ka segi ka na.

¹⁷Sayuli y'a fɔ Dawuda ye ko: «N denmuso kɔrɔman Merabu filɛ nin ye. Ne ben'a d'i ma a ka kɛ i ka muso ye, i ka jija ka baara kɛ ne ye ni jagwɛlɛya ye, ani ka banba ka Masaba ka kɛlɛ kɛ.» Sayuli tun b'a fɔr'a yɛrɛ kɔnɔ ko ale ten'a faga a yɛrɛ ma, ko filisiw le ka kɛ a fagabagaw ye.

¹⁸Dawuda y'a jaabi ko: «Ne ye jɔn ye? Ne buruju ye mun ye? Ne faa ka fadenyabolo ye mun le ye Isirayɛlidenw cɛma ni ne le bena kɛ masacɛ birancɛ ye?»

¹⁹Tuma min na Sayuli denmuso Merabu tun ka kan ka di Dawuda ma, u y'a minɛ k'a di Adiriyɛli ma ka bɔ Meyola a ka kɛ ale muso ye.

²⁰O kɔ, Dawuda koo diyara Sayuli denmuso Mikali ye. U tagara o fɔ Sayuli ye. O koo y'a dusu minɛ kosɔbɛ.

²¹A tun b'a fɔr'a yɛrɛ kɔnɔ ko ale ben'a d'a ma janko a ka se ka kɛ jaan ye Dawuda ɲakɔrɔ, ko filisiw k'a sɔrɔ k'a faga. Sayuli y'a fɔ Dawuda ye a siɲɛ filanan ko: «Bii yɛrɛ i bena kɛ ne birancɛ ye.»

²²Sayuli y'a fɔ a ka baarakɛlaw ye k'u ka taga kuma Dawuda fɛ a danna k'a fɔ a ye ko: «I koo ka di masacɛ ye, ani a ka baarakɛlaw bɛɛ b'i kanu, i ka sɔn ka masacɛ denmuso furu.»

²³Sayuli ka baarakɛla nunu tagara o fɔ Dawuda ye. Dawuda y'u jaabi ko: «Aw b'a miiri ko ka masacɛ denmuso furu, o ye tulonko ye wa? Ne yɛrɛ ye fantan ye, ne te mɔgɔbaba ye.»

²⁴A ka baarakɛla kɔsegira ka na Dawuda ka jaabili fɔ a ye.

²⁵Sayuli y'a fɔ u ye ko: «Aw k'a fɔ Dawuda ye ko masacɛ mako te furusara la, a mako be filisiw mɔgɔ kɛmɛ fɔrɔgolo tigɛninw na dama, janko a k'a mɔnɛ bɔ a juguw la ten.» Sayuli tun b'a fɛ filisiw ka se ka Dawuda faga ten.

²⁶Sayuli ka baarakɛlaw y'o kuma fɔ Dawuda ye. A sɔnna o kuma ma ka kɛ masacɛ birancɛ ye. Waati min tun fɔra Dawuda ye, o waati yɛrɛ ma se,

²⁷a n'a ka kɛlɛdenw wilila ka taga filisiw mɔgɔ kɛmɛ fila faga, k'u fɔrɔgolow tigɛ ka na masacɛ ka ɲinita dafanin d'a ma, janko a ka se ka masacɛ denmuso furu. O kɔ, Sayuli y'a denmuso Mikali d'a ma ka kɛ a muso ye.

²⁸Sayuli y'a ye, ani k'a lɔn ko Ala be ni Dawuda ye, Dawuda koo tun ka di a denmuso Mikali ye fana.

²⁹A siranna Dawuda ɲa kosɔbɛ tugu. A ye Dawuda kɛ a jugu ye a sii bɛɛ la.

³⁰Filisiw kuntigiw tun be bɔ ka kɛlɛ kɛ ni Isirayɛlidenw ye. Tuma o tuma nu tun be kɛlɛ kɛ, Dawuda le tun be see sɔrɔ ka tɛmɛ Sayuli ka baarakɛla tɔw bɛɛ kan. A kɛra ten, a tɔgɔ bɔra kosɔbɛ.