Read dyu Samuyɛli ka kitabu fɔlɔ 19 Bible Online

Samuyɛli ka kitabu fɔlɔ 19 - dyu bible

Samuyɛli ka kitabu fɔlɔ 19

¹Sayuli y'a fɔ a dencɛ Zonatan n'a ka baarakɛlaw bɛɛ ye ko ale b'a fɛ ka Dawuda faga. Nga Zonatan tun be Dawuda kanu kosɔbɛ.

²Ale tagar'a fɔ Dawuda ye ko: «Ne facɛ Sayuli b'a fɛ k'i faga. O la do, sini sɔgɔma i k'i yɛrɛ minɛ, taga dogo yɔrɔ dɔ la.

³Ne bena bɔ ni n facɛ ye foro kɔnɔ ka lɔ a gɛrɛfɛ i dogonin be yɔrɔ min na. N bena kuma a fɛ i kosɔn, a bena min fɔ, n bena o mɛn, ka na o fɔ i ye.»

⁴Zonatan ye Dawuda tɔgɔɲuman fɔ a facɛ Sayuli ɲana ko: «Masacɛ, kana i ka baaraden Dawuda hakɛ ta, a ma i hakɛ ta ka ye, a y'i ɲasira le taama.

⁵A tun y'a yɛrɛ nii di ka Goliyati faga, Masaba ye see di Isirayɛlidenw bɛɛ ma kosɔbɛ. E yɛrɛ y'o ye, ka nisɔndiya. Mun na sa, i b'a fɛ ka hakɛ kɛ ka mɔgɔtilennin faga, i ka Dawuda faga ni kuun t'a la wa?»

⁶Sayuli y'a dencɛ Zonatan ka kuma mɛn ka sɔn a ma. A kalila ko Masaba kosɔn, ko Dawuda tena faga tugu.

⁷O kɔ, Zonatan ye Dawuda wele k'o kuma bɛɛ fɔ a ye, k'a minɛ ka na n'a ye Sayuli fɛ. Dawuda tora Sayuli fɛ i n'a fɔ a tun be yen cogo min na fɔlɔ la.

⁸Kɛlɛ tun wilila tugu minkɛ, Dawuda tagara kɛlɛ kɛ ni filisiw ye. A ye kɛlɛ kɛ n'u ye, ka se u kɔrɔ fɔɔ u bolil'a ɲa.

⁹O kɔ, ka Sayuli siginin to a ka soo kɔnɔ n'a ka taman b'a bolo la, Masaba y'a kɛ nii kuntan dɔ wilil'a la. O y'a sɔrɔ Dawuda tun b'a ka gɔni fɔra.

¹⁰Sayuli tun b'a fɛ k'a kori ni kogo ye k'a sɔgɔ n'a ka taman ye. Nga Dawuda y'a yɛrɛ jɛngɛ taman ɲakɔrɔ, Sayuli ka taman tagara kogo sɔrɔ. Dawuda bɔra ka boli o suu kelen na.

¹¹ Sayuli ye mɔgɔw bila ka taga Dawuda kɔlɔsi a ka soo janko ni dugu gwɛra tuma min na, u b'a faga. Nga Dawuda ka muso Mikali y'a lasɔmi k'a fɔ a ye ko n'a ma boli k'a yɛrɛ kisi bii sufɛ, ko sini sɔgɔma u ben'a faga.

¹²A ye Dawuda dɛmɛ ka jigi ni fenɛtiri ye soo kɔfɛ. A kɛra ten, Dawuda bolila ka kisi.

¹³O kɔ, a ye jaa dɔ dilannin ta k'a la dilan kan, ka bagolo dɔ bila a kuun layɔrɔ la, ka birifani biri a kan.

¹⁴Tuma min na Sayuli ye mɔgɔw ci ko u ka taga Dawuda minɛ, Mikali y'a fɔ ko a bananin lo.

¹⁵Sayuli y'a fɔ ciden nunu ye ko u ka segi ka ta'a filɛ, ko u k'a ta n'a ka dilan ye ka na n'a ye ale b'a faga.

¹⁶O mɔgɔ nunu tagara don, u ye jaa dilannin le ye, a lanin be dilan kan, bagolo bilanin be a kuun layɔrɔ la.

¹⁷Sayuli y'a fɔ Mikali ye ko: «Mun na i ye ne namara ten, k'a to ne jugu sera ka boli?» Mikali y'a jaabi ko: «A tun y'a fɔ ne ye ko ni ne ma ale to a be taga, ko ale be ne faga.»

¹⁸A kɛra ten, Dawuda sera ka boli k'a yɛrɛ kisi. A tagara Samuyɛli fɛ Arama. Sayuli ye koo o koo kɛ a la, a y'o bɛɛ fɔ Samuyɛli ye. O kɔ, a ni Samuyɛli tagara sigi Nayɔti.

¹⁹U nana o kibaruya fɔ Sayuli ye ko Dawuda be Nayɔti, Arama dugu gɛrɛfɛ.

²⁰Sayuli ye mɔgɔw bila ko u ka taga Dawuda minɛ. Olu tagara kira jɛnkulu dɔ sɔrɔ, ni u be kiraya kɛra. Samuyɛli le tun be u ɲafɛ. Ala ka Nii ye Sayuli ka cidenw minɛ, olu fana y'a daminɛ n'u be kiraya kɛra.

²¹O kibaruya fana nana se Sayuli ma. A ye mɔgɔ dɔwɛrɛw ci tugu. Olu fana tagara se k'a daminɛ ka kiraya kɛ. O kɔ, a ye dɔwɛrɛw ci a siɲɛ sabanan na, olu fana tagara se ka kiraya kɛ.

²²O bɛɛ kɔfɛ, Sayuli yɛrɛ wilila ka Arama sira ta. Jibondoba min be Seku, a tagara se o gɛrɛfɛ. A ye ɲiningali kɛ ko: «Samuyɛli ni Dawuda be min?» U y'a jaabi ko: «U be Nayɔti, Arama dugu gɛrɛfɛ.»

²³O la, a ye sira minɛ k'a kuun sin Nayɔti, Arama dugu gɛrɛfɛ. O yɔrɔ la, Ala ka Nii donn'a la, a y'a daminɛ n'a be kiraya kɛra, ka to ka taga, fɔɔ ka taga se Nayɔti.

²⁴ A y'a ka faniw bɔ ka to ka kiraya kɛ Samuyɛli ɲakɔrɔ. A benna duguma, a lanin tora yen, k'o tile kuturu bɛɛ kɛ yen ani o suu bɛɛ. O la, u be to k'a fɔ ko: «O tuma na, Sayuli fana ye kira ye wa?»