Read dyu Samuyɛli ka kitabu fɔlɔ 2 Bible Online

Samuyɛli ka kitabu fɔlɔ 2 - dyu bible

Samuyɛli ka kitabu fɔlɔ 2

¹ Annɛ ye Ala daali k'a fɔ ko: «Ne dusu diyara Masaba barika la, Masaba ye n kuun kɔrɔta. Fɔta sɔrɔla ne fɛ ne jugu ye, bari ne be nisɔndiya i ka dɛmɛli kosɔn.

²Masaba ɲɔgɔn tɛ, dɔwɛrɛ te yen e kɔ. Dogoyɔrɔ wɛrɛ te yen ni e tɛ, an ka Ala.

³Aw kana yɛrɛboɲakuma fɔ tugu, wansokuma kana bɔ aw daa la tugu. Masaba ye Ala ye, a be koo lɔn, ale lo be kɛwaliw filɛ.

⁴Kɛlɛdenw ka kalaw karila, barikatanw ye fanga sɔrɔ tuguni.

⁵Kɔngɔ tun te mɔgɔ minw na, olu be baara kɛ dumuni kosɔn. Kɔngɔ tun be mɔgɔ minw na, olu be lafiɲɛ na. Muso min tun te deen sɔrɔ, ale ye deen wolonwula wolo, min tun ye deen caaman sɔrɔ, ale te foyi sɔrɔla tugu.

⁶Masaba le b'a kɛ mɔgɔ be sa, ale lo be mɔgɔ to nii na fana, ale lo sababu la mɔgɔ be taga lahara, ale fana le b'u bɔ yen.

⁷Ale lo be mɔgɔ kɛ fantan ye, ale fana le be mɔgɔ kɛ fɛntigi ye. Ale lo be mɔgɔ majigi, ale fana le b'a kuun kɔrɔta.

⁸Ale lo be dɛsɛbagatɔ wili ka bɔ duguma, a be fantan sama ka bɔ ɲamaɲama la, ka sigiyɔrɔ d'u ma mɔgɔbabaw cɛma, ka masasigilan nɔɔrɔman kɛ u niyɔrɔ ye. Dugukolo ye Masaba ta ye, ale lo y'a juu sigi a ka tutunanw kan.

⁹A ben'a ɲasiranbagaw kɔlɔsi, nga mɔgɔjuguw bena sa dibi kɔnɔ. Bari mɔgɔ te see sɔrɔ a yɛrɛ fanga barika la.

¹⁰Minw ye Masaba juguw ye, olu bena halaki, k'a to sankolo la, a b'a to saan be pɛrɛn u kama. A bena diɲɛ bɛɛ kiti. A ye mɔgɔ min sigi masaya la, a be fanga di ale ma, a ye masacɛ min woloma, a be barika don ale la.»

¹¹O kɔ, Ɛlikana kɔsegira ka ta'a ka soo Arama. Samuyɛli tora ka baara kɛ Masaba ye sarakalasebaga Eli gɛrɛfɛ.

¹²Eli ka deenw tun ye mɔgɔkolonw ye. U tun te Masaba lɔn.

¹³Sarakalasebaga nunu tun be fɛɛn min kɛ jama la, o filɛ: Ni mɔgɔ min tagar'a ka begɛn saraka bɔ, n'a b'a sogo tobira tuma min na, sarakalasebaga ka baaraden tun be na ni kuru ye min ɲiin ye saba ye a bolo,

¹⁴k'a don daga kɔnɔ. Kuru nin mana bɔ ni sogo o sogo ye, o be kɛ sarakalasebaga ta ye. Isirayɛliden minw bɛɛ tun be taga Silo, u tun be to k'o le kɛ olu la.

¹⁵Ka fara o kan, waati dɔ u yɛrɛ te sogo nin tulu jɛni fɔlɔ. Mɔgɔ min nana saraka bɔ, sarakalasebaga ka baaraden be n'a fɔ ale ye ko a ka sarakalasebaga niyɔrɔ d'a ma u be ta'a wusu. Ko a t'a ka sogo tobinin fɛ, fɔɔ sogo kɛnɛman.

¹⁶Ni o tigi y'a fɔ a ye ko a ka kɔnɔni kɛ u be sogo nin tulu jɛni fɔlɔ, a b'a fɔ ko ayi, ko a k'a di sisan, ko n'o tɛ, ale ben'a bɔ fanga la.

¹⁷Eli ka deen nunu tun be to ka hakɛ kɛ Masaba faan fɛ kosɔbɛ, bari u tun b'a ka saraka bɔko mafiɲɛya ten.

¹⁸Samuyɛli kɔni, ale tora ka baara kɛ Masaba ye. Sarakalasefani tun be deen nin kaan na, min dilanna ni jeseɲuman ye.

¹⁹Deen nin bamuso tun be to ka forocadennin kalan, ka n'a d'a ma saan o saan n'a cɛɛ be n'a ka sanyɛlɛma saraka bɔ tuma min na.

²⁰Eli tun be to ka duba kɛ Ɛlikana n'a muso ye ko: «Masaba k'a kɛ i be deen wɛrɛw sɔrɔ muso nin fɛ, janko u ka se ka to i deen nin nɔɔ na i ye min di Masaba ma.» O kɔ, u be kɔsegi ka taga soo.

²¹Masaba ye koɲuman kɛ Annɛ ye: A ye kɔnɔw ta ka dencɛman saba ni denmuso fila wolo. Kanbelennin Samuyɛli tun be boɲana ka taga, Masaba ɲakɔrɔ.

²²Eli tun kɔrɔla kosɔbɛ. A deenw tun be koo minw kɛ Isirayɛlidenw bɛɛ la, a tun y'o mɛn. A tun y'a mɛn fana ko u tun be to ka la ni musow ye minw tun be baara la Ɲɔgɔnkunbɛn fanibugu daa la.

²³A y'a fɔ u ye ko: «Mun na aw be nin kɛ? Ne y'aw ka kɛwalijugu mɛn mɔgɔw bɛɛ fɛ.

²⁴N deenw, ne be fɛɛn min mɛnna Masaba ka jama fɛ, o ma ɲi. Aw k'o dabila.

²⁵Ni mɔgɔ dɔ y'a tɔɲɔgɔn hakɛ ta, Ala le b'o ɲanabɔ. N'a do ye Masaba hakɛ ta, jɔn le bena sabali kɛ a la?» U ma sɔn ka mɛnni kɛ u faa fɛ, bari Masaba tun b'a fɛ k'u faga.

²⁶ Kanbelennin Samuyɛli tun be boɲa ka taga ɲa, a koo tun ka di Masaba ni mɔgɔw ye.

²⁷Ala ka mɔgɔ dɔ nana Eli fɛ k'a fɔ a ye ko: «Masaba y'a fɔ ko ale tun m'a yɛrɛ yira aw bɛma ka somɔgɔw la wa? O y'a sɔrɔ u tun be Ezipiti masacɛ ka fanga kɔrɔ Ezipiti.

²⁸ Ko ale y'a woloma k'a bɔ Isirayɛlidenw bɛɛ cɛma janko a ka kɛ ale ka sarakalasebaga ye, ka to ka yɛlɛ ale ka sarakabɔyɔrɔ kan, ka wusulan jɛni, ani ka sarakalasebagaw kuntigi ka fani don a ɲakɔrɔ. Ko ale ye Isirayɛlidenw ka sarakasogo jɛnita bɛɛ d'a ma.

²⁹Ko mun na aw be ale ka sarakaw n'a ka saraka jɛnita mafiɲɛya, a ye min latigɛ k'o ka kɛ ale ka soo kɔnɔ. Ani ko mun le y'a to e b'i deenw boɲa ka tɛmɛ ale kan, bari aw boɲana ale ka jama Isirayɛli ka sarakaw barika la.

³⁰O le y'a to Masaba, Isirayɛli ka Ala y'a fɔ fana ko ale tun ko i ka soo n'i bɛma ka somɔgɔw bena to ka baara kɛ ale ɲakɔrɔ tuma bɛɛ. Nga sisan a y'a fɔ k'o miiriya yɔrɔ ka jan ale la! Bari a ko mɔgɔ min b'ale boɲa, ale fana b'o tigi le boɲa, nga mɔgɔ min b'ale dɔgɔya, ale fana b'o tigi dɔgɔya.

³¹A y'a fɔ fana ko waati dɔ la, ko ale bena i bolo n'i bɛma ka somɔgɔw bolo bɔ, fɔɔ mɔgɔkɔrɔba tena sɔrɔ i ka soo kɔnɔ tugu.

³²Ko i bena gwɛlɛya sɔrɔ i ka soo kɔnɔ. Ale bena hɛrɛ kɛ Isirayɛlidenw ye, nga mɔgɔkɔrɔba si tena sɔrɔ i ka soo kɔnɔ [1] tugu abada.

³³Ko ale bena i kɔmɔgɔ dɔ to a ka sarakabɔyɔrɔ gɛrɛfɛ, janko a ka to ka fa keliya ni nisɔngoya la. Nga i ka somɔgɔ si tena kɔrɔ ka sɔrɔ ka sa.

³⁴ «Ko i deen fila bena kori ka sa loon kelen, o ye Ofini ni Pinasi ye, o le bena kɛ taamasiɲɛ ye i fɛ ko kuma nin ye tiɲɛ ye.

³⁵Ko ale ben'a ka sarakalasebaga ɲanaman sigi, k'o tigi ben'a dusulako n'a diyanakow kɛ, ko ale ben'a ka soo sabati, ani k'a to a be baara kɛ ale ka mɔgɔ wolomanin ɲakɔrɔ tuma bɛɛ.

³⁶Ko i ka kɔmɔgɔ minw mana to yen, olu bɛɛ bena na u kunbiri gwan o tigi ɲakɔrɔ, janko a ka warigwɛ deen kelen ni dumuni dɔɔni sɔrɔ. A ben'a fɔ o tigi nin ye ko a ka sabali k'ale don sarakalasebaara la, janko a ka se k'a daladumuni sɔrɔ.»