Read dyu Samuyɛli ka kitabu fɔlɔ 20 Bible Online

Samuyɛli ka kitabu fɔlɔ 20 - dyu bible

Samuyɛli ka kitabu fɔlɔ 20

¹Dawuda bɔra Nayɔti, Arama gɛrɛfɛ ka boli ka taga Zonatan fɛ, k'a fɔ a ye ko: «Ne ye mun kɛ? Ne ye mun le cɛn, walima ne y'i facɛ hakɛ ta koo jumɛn le la, n'a be ne fagayɔrɔ ɲinina?»

²Zonatan y'a fɔ a ye ko: «O te se ka kɛ, i tena sa. Bari ne facɛ te koo si kɛ n'a m'a sara ne la, a koba fara a fitini kan. Mun na ne faa bena nin dogo ne la? O te se ka kɛ.»

³Dawuda kalila k'a fɔ Zonatan ye ko: «I faa y'a lɔn tiɲɛ na ko ne koo ka d'i ye. O la, a y'a fɔ a yɛrɛ kɔnɔ ko e man kan ka nin mɛn, bari a bena i hakili ɲagami. Nga Masaba kosɔn, ani ele fana be yen! Ne b'a fɔ ko a tora dɔɔni dɔrɔn ne be sa.»

⁴Zonatan y'a fɔ Dawuda ye ko: «I be fɛɛn min fɛ, ne bena o kɛ i ye.»

⁵ Dawuda y'a fɔ Zonatan ye ko: «Sini le bena kɛ kalokura ɲanagwɛ ye. Ne do ka kan ka taga sigi ka dumuni kɛ ni masacɛ ye. N b'a ɲini i fɛ i ka ne to n be taga dogo foro kɔnɔ, fɔɔ ka taga se sinikɛnɛ wulafɛ ma.

⁶N'i facɛ y'a ye ko n te yen, i b'a fɔ ko ne y'i daali kosɔbɛ ko i ka sira di n be boli ka taga n ka dugu la Bɛtilehɛmu, bari n ka fadenyabolo mɔgɔw bɛɛ bena sanyɛlɛma saraka dɔ bɔ.

⁷N'a y'a fɔ k'o ɲana, o tuma na, kojugu si te i ka baarakɛla ɲa. Nga n'a dimina, i k'a lɔn ko a y'a latigɛ ka kojugu kɛ ne la.

⁸I k'i ka mɔgɔsɔbɛya yira i ka baarakɛla la, bari i y'a kɛ an ye layidu ta ɲɔgɔn ye Masaba tɔgɔ la. Ni ne ye kojugu dɔ kɛ, e yɛrɛ ka n faga. Mun na i be taga ni n ye i facɛ fɛ?»

⁹Zonatan y'a jaabi ko: «O tena kɛ fewu. Ni ne y'a ye ko ne facɛ ye kojugu labɛn i kama, ne ten'a to ni n m'o fɔ i ye.»

¹⁰Dawuda y'a fɔ Zonatan ye ko: «N'i facɛ nana i jaabi ni kuma gwɛlɛman ye, jɔn le bena ne lasɔmi?»

¹¹Zonatan y'a fɔ Dawuda ye ko: «Na an be bɔ ka taga foro kɔnɔ.» U bɔra ka taga foro kɔnɔ ɲɔgɔn fɛ.

¹²Zonatan y'a fɔ Dawuda ye ko: «Masaba, Isirayɛli ka Ala kosɔn ne b'a fɔ i ye ko ne bena jija sini yɛrɛ, walima sinikɛnɛ, nin waati ɲɔgɔn na, ka n facɛ sɛgɛsɛgɛ k'a kɔnɔnako lɔn. N'a sɔrɔla ko n facɛ diminin tɛ i kɔrɔ, ni ne ma sɔn ka mɔgɔ ci i fɛ k'o fɔ i ye,

¹³Masaba kana yafa n ma! N'a fana sɔrɔla ko ne facɛ ye kojugu labɛn i kama, ne bena o fɔ i ye ani k'i to i be taga hɛrɛ la. Masaba ka to i fɛ i n'a fɔ a tora ne facɛ fɛ cogo min na.

¹⁴Hali ni waati dɔ nana se ni ne be sii la, Masaba be ɲumanya min fɛ, i k'o kɛ ne ye janko ne kana sa.

¹⁵ To ka koɲuman kɛ n ka somɔgɔw ye, hali ni Masaba y'i juguw kelen kelen bɛɛ halaki ka bɔ dugukolo kan tuma min na.»

¹⁶Zonatan bɛnna ni Dawuda ka somɔgɔw ye. A ko: «Masaba ka Dawuda mɔnɛ bɔ a juguw la.»

¹⁷O waati la tugu, Zonatan y'a kɛ Dawuda kalil'a ka teriya kosɔn, bari Dawuda koo tun ka d'a ye i n'a fɔ a yɛrɛ.

¹⁸Zonatan y'a fɔ a ye ko: «Sini kɔni le ye kalokura ɲanagwɛ ye. U ben'a lɔn ko i te yen, bari i ka sigiyɔrɔ bena to lakolon.

¹⁹Sinikɛnɛ, i be taga dogo fɔɔ i tun dogora yɔrɔ min na o loon na. I be to kabakuru nin kɔfɛ min be wele Ezɛli.

²⁰Ne bena biɲɛ saba bon o kabakuru nin gɛrɛfɛ, k'a kɛ i n'a fɔ n tun be fɛɛn le bonna n'u ye.

²¹O kɔ, n bena kanbelennin dɔ ci ka taga u ta. Ni n y'a fɔ a ye ko: ‹I ma biɲɛ nunu tɛmɛ wa? U ta ka na,› o tuma na, i ka na bari hɛrɛ ye i ta ye. Masaba kosɔn, foyi tena kɛ.

²²Nga ni n y'a fɔ kanbelennin nin ye ko: ‹A filɛ, u be ɲafɛ halibi,› o tuma i ka taga, bari Masaba b'a fɛ i ka taga le.

²³Masaba le ye an seere ye an ka kuma nunu la, an ye minw fɔ ɲɔgɔn ye.»

²⁴O la, Dawuda dogora foro kɔnɔ. Kalokura ɲanagwɛ sera, masacɛ sigira dumuni kunna.

²⁵A sigir'a ka sigilan kan i n'a fɔ a tun be to k'a kɛ cogo min na ka kɔrɔ kogo kɔrɔ. Zonatan sigir'a ɲafɛ, Abinɛri sigira Sayuli gɛrɛfɛ, Dawuda ka sigiyɔrɔ tora lakolon.

²⁶Sayuli ma foyi fɔ o loon na. A tun b'a miiri ko balinako dɔ le y'a sɔrɔ, ko siga t'a la, a saniyanin tɛ.

²⁷O dugusagwɛ, min ye kalokura tile filanan ye, Dawuda ka sigiyɔrɔ tora lakolon tugu. O la, Sayuli y'a deen Zonatan ɲininga ko: «Mun na Zese dencɛ ma na kunun ani bii dumuni kɛyɔrɔ la?»

²⁸Zonatan y'a jaabi ko: «Dawuda ye sira ɲini ne fɛ ko a be taga Bɛtilehɛmu.

²⁹A tun ko ne ma ko n k'a to a be taga, ko a ka somɔgɔw ka kan ka saraka dɔ bɔ dugu kɔnɔ, ko a kɔrɔcɛ le y'a fɔ a ye ko a ka na. Ko n'a koo ka di ne ye, ne ka sɔn a be ta'a balimaw ye. O le y'a to a ma se ka na masacɛ ka dumuni na.»

³⁰Sayuli dimina Zonatan kɔrɔ kosɔbɛ k'a fɔ a ye ko: «E ye denkolon le ye! I m'a lɔn ko ne b'a kala ma ko ele ni Zese dencɛ ye teriw ye wa? I b'o kɛ i yɛrɛ ka maloya kama, an'i bamuso ta kama!

³¹Ka Zese dencɛ to sii la diɲɛ kɔnɔ, i m'a lɔn ko e tena se ka kɛ masa ye wa? O la, mɔgɔw bila u be ta'a minɛ ka na n'a ye sisan, bari a ka kan ka faga.»

³²Zonatan y'a facɛ jaabi ko: «Mun na a bena faga do? A ye mun le kɛ?»

³³Sayuli y'a ka taman ta ko a be Zonatan faga. O la, Zonatan y'a faamu ko a facɛ tun y'a latigɛ sɔbɛ la ko a be Dawuda faga.

³⁴A dimininba wilila ka bɔ dumuni kunna, a ma foyi dumu kalokura tile filanan na, bari a dusu tun cɛnna Dawuda kosɔn a facɛ ka nɛnili kosɔn.

³⁵O dugusagwɛ, Zonatan tagara foro kɔnɔ ani Dawuda tun bɛnna yɔrɔ min la, kanbelennin dɔ tagara n'a ye.

³⁶Zonatan y'a fɔ o kanbelennin nin ye ko: «N bena biɲɛ minw bon, boli ka taga u ta.» Kanbelennin ye boli ta, Zonatan ye biɲɛ bon, a tagara ben a ɲafɛ.

³⁷Kanbelennin nin sera biɲɛ nin benyɔrɔ la tuma min na, Zonatan pɛrɛnna ko: «Biɲɛ nin t'i ɲafɛ wa?»

³⁸O kɔ, a pɛrɛnna tugu ko: «A kɛ joona joona, kana mɛn yen, kana lɔ!» Kanbelennin nin ye biɲɛ nin ta ka kɔsegi ka n'a kuntigi fɛ.

³⁹Kanbelennin nin tun te foyi kala ma, Zonatan ni Dawuda le tun b'o koo kala ma.

⁴⁰O kɔ, a ye kala n'a biɲɛw di kanbelennin ma ko a ka taga n'u ye dugu kɔnɔ.

⁴¹Kanbelennin nin taanin kɔ, Dawuda wilila ka bɔ worodugu ɲafan na, k'a kunbiri gwan Zonatan ɲakɔrɔ k'a ɲaa biri duguma siɲɛ saba. Teri mɔgɔ fila nunu y'u bolo meleke ɲɔgɔn na ka kasi. Dawuda kɔni, ale ta tun ye ɲaji ye dɔrɔn.

⁴²O kɔ, Zonatan y'a fɔ Dawuda ye ko a ka taga hɛrɛ la, k'olu do kalila ka ban ni Masaba tɔgɔ ye ɲɔgɔn ye, ko Masaba le ka kɛ u ni ɲɔgɔn cɛ, ani u kɔmɔgɔw ni ɲɔgɔn cɛ tuma bɛɛ.