Read dyu Samuyɛli ka kitabu fɔlɔ 22 Bible Online

Samuyɛli ka kitabu fɔlɔ 22 - dyu bible

Samuyɛli ka kitabu fɔlɔ 22

¹ Dawuda bɔra o yɔrɔ la ka boli ka taga Adulamu kuluwo kɔnɔ. A balimaw n'a facɛ ka somɔgɔw bɛɛ y'a koo mɛn, u tagar'a fɛ.

²Mɔgɔ minw tun be gwɛlɛya la, juruw tun be minw kaan na, ani minw dusu tun cɛnnin be, olu bɛɛ nana ɲɔgɔn kunbɛn Dawuda fɛ, a kɛra olu kuntigi ye. Mɔgɔ minw tun nan'a fɛ, olu tun sera mɔgɔ kɛmɛ naani ɲɔgɔn.

³Dawuda bɔra o yɔrɔ la ka taga Misipe, Mowabu jamana na. A y'a fɔ Mowabu masacɛ ye ko: «N b'i daali ko i ka sabali ka sɔn n facɛ ni n bamuso ka sigi i ka yɔrɔ la, yanni n k'a lɔn Ala bena min kɛ n ye.»

⁴A tagara n'u ye Mowabu masacɛ fɛ. Dawuda ye waati min bɛɛ kɛ a ka dogoyɔrɔ la, a wolobagaw y'o waati kɛ Mowabu masacɛ fɛ.

⁵Kira Gadi y'a fɔ Dawuda ye ko a kana to o yɔrɔ la, ko a ka segi ka taga Zuda mara la. O la, Dawuda tagara o yɔrɔ la ka taga se Ɛrɛti tuu kɔnɔ.

⁶Sayuli y'a mɛn ko mɔgɔ dɔ be Dawuda n'a kɔmɔgɔw ka koo kala ma. O y'a sɔrɔ Sayuli tun be Gibeya, a siginin tun be tintin kan joyiri dɔ kɔrɔ. A ka taman b'a bolo, ani a ka baarakɛlaw bɛɛ lɔnin tun be a gɛrɛfɛ.

⁷Sayuli y'a fɔ u ye ko: «Aw Bɛnzamɛn kɔmɔgɔw! Zese dencɛ bena forow ni *ɛrɛzɛnforow di aw bɛɛ ma wa? A bena aw kɛ kɛlɛden waa kelen kelen kuntigiw, ani mɔgɔ kɛmɛ kɛmɛ kuntigiw ye wa?

⁸N'o tɛ, mun na aw bɛɛ wilila ne kama? Ne dencɛ bɛnna ni Zese deen ye tuma min na, mɔgɔ si ma sɔrɔ min y'o fɔ ne ye. Mɔgɔ si ma sɔrɔ aw cɛma min be hami ne ka koo la, o tigi k'a se k'a fɔ ne ye ko ne deen yɛrɛ le be ne ka baarakɛla kɔnɔnasura ne kama, ka wili ne kama i n'a fɔ a be kɛra cogo min na bii.»

⁹ Edɔmucɛ Dowɛgi tun be Sayuli ka baarakɛla nunu cɛma fana, ale ye Sayuli jaabi ko: «Ne ye Zese dencɛ ye, a tun nana Nɔbi dugu kɔnɔ, Ayitubi dencɛ Ayimelɛki fɛ.

¹⁰Ale ye Masaba daali a ye, ka dumunifɛn d'a ma, ni filisikan Goliyati ka murujan.»

¹¹Masacɛ ye mɔgɔ bila ka taga Ayitubi dencɛ, sarakalasebaga Ayimelɛki wele, n'a ka somɔgɔw bɛɛ, minw tun ye sarakalasebagaw ye Nɔbi dugu kɔnɔ. U bɛɛ nan'a fɛ.

¹²Sayuli y'a fɔ ko: «E Ayitubi dencɛ, mɛnni kɛ sa.» A ko: «Naamu matigi!»

¹³Sayuli y'a fɔ a ye ko: «Mun na aw y'aw daa kɛ kelen ye ka wili ne kama, e ni Zese dencɛ? Mun na e ye dumuni d'a ma ani murujan, e fana ye Ala daali a ye, janko a ka se ka wili ne kama ka ne dɛndɛ i n'a fɔ a be kɛra cogo min na bii?»

¹⁴Ayimelɛki y'a jaabi ko: «I ka baarakɛla bɛɛ cɛma, masacɛ birancɛ Dawuda mɔgɔsɔbɛ ɲɔgɔn be sɔrɔ yen wa? I kɔlɔsibagaw kuntigi lo, boɲa fana b'a kan i ka soo kɔnɔ.

¹⁵O loon tun kɛra n siɲɛ fɔlɔ ye ka Ala daali a ye wa? Ayi dɛ! Masacɛ kana koo nin la i ka baarakɛla, walima a ka somɔgɔ si kan, bari i ka baarakɛla te foyi kala ma koo nin na.»

¹⁶Nga masacɛ y'a fɔ ko: «I bena faga Ayimelɛki, ele n'i faa ka somɔgɔw bɛɛ!»

¹⁷O kɔ, kɛlɛden minw tun lɔnin be a gɛrɛfɛ, a y'a fɔ olu ye ko: «Aw ka Masaba ka sarakalasebaga nunu faga, bari olu fana ye Dawuda dɛmɛ. U tun y'a lɔn ko a be bolila, nga u ma sɔn ka n'a fɔ ne ye.» Masacɛ ka kɛlɛden nunu ma sɔn ka Masaba ka sarakalasebaga nunu faga.

¹⁸O la, masacɛ y'a fɔ Dowɛgi ye ko ale ka na sarakalasebaga nunu faga. Edɔmucɛ Dowɛgi y'u faga. A ye sarakalasebaga bi seegi ni duuru faga o loon na minw tun be se ka sarakalasefani don.

¹⁹Sayuli ye sarakalasebagaw ka dugu Nɔbi cɛɛw ni musow, ani denmisɛnw ni denɲɛninw, ani misiw ni faliw, ani sagaw faga ni murujan ye.

²⁰Ayitubi dencɛ Ayimelɛki dencɛ kelen le sera ka boli u fɛ, ka taga Dawuda fɛ, a tɔgɔ tun ko Abiyatari.

²¹A y'a fɔ Dawuda ye ko Sayuli ye Masaba ka sarakalasebagaw faga.

²²Dawuda y'a fɔ a ye ko: «O loon na, ne tun ye edɔmucɛ Dowɛgi ye Nɔbi. Ne tun y'a lɔn ko ale kɔni bena n'a fɔ Sayuli ye wajibi. Ne le kɛra sababu ye i facɛ ka somɔgɔw bɛɛ sara.

²³I ka to ni ne ye, i kana siran, mɔgɔ min b'i fagayɔrɔ ɲinina, ale kelen le be ne ta ɲinina fana. N'i tora ni ne ye, foyi t'i sɔrɔ.»