Read dyu Samuyɛli ka kitabu fɔlɔ 23 Bible Online

Samuyɛli ka kitabu fɔlɔ 23 - dyu bible

Samuyɛli ka kitabu fɔlɔ 23

¹Mɔgɔ dɔ nan'a fɔ Dawuda ye ko filisiw nana Keyilakaw kɛlɛ, ko u b'a la ka sumanw cɛ sumangosikɛnɛw la.

²Dawuda ye Masaba ɲininga ko ale ka kan ka taga wa, ko ale bena se filisi nunu kɔrɔ wa. Masaba y'a jaabi ko a ka taga, ko a bena se u kɔrɔ ka Keyilakaw kisi.

³Nga Dawuda kɔmɔgɔw y'a fɔ a ye ko: «Hali ka an to yan Zude mara la, an be siran. N'an bɔra yan ka taga filisiw kama Keyila, o bena kɛ di?»

⁴Dawuda ye Masaba ɲininga tugu, Masaba y'a jaabi ko a ka taga Keyila, ko ale bena filisiw don a bolo.

⁵O la, Dawuda tagara n'a ka jama ye Keyila ka filisiw kɛlɛ. A y'u ka begɛnw minɛ ka segi n'u ye. A kɛra ten, a ye see sɔrɔ u kan kosɔbɛ, ka Keyilakaw kisi.

⁶Ayimelɛki dencɛ Abiyatari tun be bolila ka taga Dawuda fɛ Keyila tuma min na, a tun ye sarakalasebagaw kuntigi ka fani ta a bolo.

⁷Sayuli y'a mɛn ko Dawuda be Keyila tuma min na, a y'a fɔ ko Ala y'a di ale ma, ko bari a nan'a yɛrɛ datugu dugu kɔnɔ min lamininin lo ni kogo ye, a daaw fana be tugu.

⁸O la, Sayuli y'a ka kɛlɛdenw bɛɛ wele janko u be taga Keyila, Dawuda n'a kɔmɔgɔw kama.

⁹Dawuda y'a mɛn ko Sayuli be kojugu le labɛnna ale kama minkɛ, a ko sarakalasebaga Abiyatari ma ko a ka na ni sarakalasebagaw kuntigi ka fani ye.

¹⁰O kɔ, a y'a fɔ ko: «Masaba, Isirayɛli ka Ala, ne, i ka baarakɛla y'a mɛn ko Sayuli b'a fɛ ka na Keyila dugu ci ne kosɔn.

¹¹Keyilakaw bena sɔn ka ne di Sayuli ma wa? A bena na tiɲɛ na i n'a fɔ n y'a mɛn cogo min na wa? Masaba, Isirayɛli ka Ala, sabali k'o fɔ i ka baarakɛla ye!» Masaba y'a jaabi ko: «A bena na.»

¹²Dawuda y'a fɔ tugu ko: «Keyilakaw bena sɔn ka ne ni n kɔmɔgɔw d'a ma wa?» Masaba y'a jaabi ko: «U bena i di.»

¹³O la, Dawuda wilila n'a kɔmɔgɔw ye ka bɔ Keyila ka taga u be se ka taga yɔrɔ min na. A kɔmɔgɔ nunu tun be se mɔgɔ kɛmɛ wɔɔrɔ ɲɔgɔn ma. Sayuli y'a mɛn ko Dawuda tun bolila ka bɔ Keyila, a y'a ka taama dabila.

¹⁴Barika be yɔrɔ minw na Zifu kongokolon kɔnɔ, Dawuda tagara to o yɔrɔw la kuluyɔrɔ la. O waati bɛɛ la, Sayuli tun b'a la k'a yɔrɔ ɲini, nga Ala ma sɔn k'a d'a ma.

¹⁵K'a to Oresa, Zifu kongokolon kɔnɔ, Dawuda y'a ye ko Sayuli b'ale fagayɔrɔ ɲinina.

¹⁶Sayuli dencɛ Zonatan wilila ka taga Dawuda fɛ Oresa, k'a jaa gwɛlɛya ko a k'a jigi la Ala kan.

¹⁷A y'a fɔ a ye ko: «I kana siran. Ne facɛ Sayuli bolo tena la i kan. Ele le bena kɛ masacɛ ye Isirayɛlidenw kunna, ne ka tugu i kɔ. Hali ne facɛ Sayuli be o kala ma.»

¹⁸ U fila bɛɛ ye layidu ta ɲɔgɔn ye Masaba ɲakɔrɔ. O kɔ, Zonatan kɔsegir'a ka soo, Dawuda tora Oresa.

¹⁹ Zifukaw wilila ka ta'a fɔ Sayuli ye Gibeya ko Dawuda dogonin be Oresa, faraw jigijigiyɔrɔjugu la Akila kulu kan, kongokolon worodugu ɲafan fɛ.

²⁰U ko: «Masacɛ, tuma min na i b'a fɛ ka na, i ka na. An ben'a don i bolo.»

²¹Sayuli y'a fɔ ko: «Masaba ka barika don aw la, bari aw makarila ne la!

²²Aw ye taga, aw ka banba ka ɲiningali kɛ ka ɲa a taayɔrɔ la ani k'a lɔn mɔgɔ min y'a ye fana o yɔrɔ la. A fɔra ne ye ko a ka ceku kosɔbɛ.

²³Aw ka banba k'a dogoyɔrɔw bɛɛ lɔn, o kɔ, ka segi ka na ni kuma gwɛnin ye ne fɛ. O tuma na, ne bena taga n'aw ye. N'a be jamana nin kɔnɔ, ne ben'a ɲini Zuda ka fadenyabolow bɛɛ cɛma.»

²⁴Zifuka nunu wilila ka taga Sayuli ɲa Zifu. O y'a sɔrɔ Dawuda n'a kɔmɔgɔw tun be kɔkɛnɛ na Maŋɔn kongokolon la, Zifu kongokolon worodugu ɲafan na.

²⁵Sayuli tagara n'a kɔmɔgɔw ye Dawuda ɲiniyɔrɔ la. Mɔgɔ dɔ ye Dawuda lasɔmi, Dawuda jigira ka taga farayɔrɔ la ka taga to Maŋɔn kongokolon kɔnɔ. Sayuli y'o mɛn fana, a tugura Dawuda kɔ o yɔrɔ la.

²⁶Sayuli tun be taamana kulu nin faan dɔ la. Dawuda n'a kɔmɔgɔw fana tun be taamana kulu nin faan dɔ la. Dawuda tun be bolila ka bɔ Sayuli ɲafɛ. A tora dɔɔni Sayuli n'a kɔmɔgɔw tun bena Dawuda n'a kɔmɔgɔw lamini janko u k'u minɛ.

²⁷O yɔrɔnin kelen na, ciden dɔ nan'a fɔ Sayuli ye ko a ka banba ka na, ko filisiw donna jamana kɔnɔ.

²⁸O la, Sayuli ye Dawuda gwɛnko dabila ka kɔsegi ka na filisiw kunbɛn. O le y'a to o yɔrɔ nin tɔgɔ lara ko Faranni kabakuru.