Read dyu Samuyɛli ka kitabu fɔlɔ 26 Bible Online

Samuyɛli ka kitabu fɔlɔ 26 - dyu bible

Samuyɛli ka kitabu fɔlɔ 26

¹ Zifukaw tagara Gibeya k'a fɔ Sayuli ye ko Dawuda dogonin be Akila kulu kan kongokolon kɔnɔ.

²Sayuli wilila ka taga ni Isirayɛliden mɔgɔ waa saba (3 000) ye, a tun ye minw woloma, ka taga Dawuda ɲiniyɔrɔ la Zifu kongokolon kɔnɔ.

³Sayuli n'a ka kɛlɛdenw tagara sigi Akila kulu kan, kongokolon kɔnɔ sirada la. O y'a sɔrɔ Dawuda tun be kongokolon kɔnɔ. A y'a ye ko Sayuli tun b'a ɲinina o yɔrɔ la.

⁴A ye kɔlɔsilikɛbaga dɔw ci, o la, a y'a lɔn ko tiɲɛ na, Sayuli sera o yɔrɔ la.

⁵A wilila ka taga Sayuli ka kɛlɛdenw sigiyɔrɔ la. Sayuli tun lara yɔrɔ min na, a y'o ye, ani kɛlɛdenw kuntigi Nɛri dencɛ Abinɛri ka layɔrɔ fana. Sayuli tun lanin be kɛlɛdenw cɛma, olu tun b'a lamini na.

⁶Dawuda ye iticɛ Ayimelɛki ɲininga, ni Seruya dencɛ Abisayi, min tun ye Zowabu dɔgɔcɛ ye ko jon le bena taga ni ale ye Sayuli fɛ, kɛlɛdenw ka sigiyɔrɔ la. Abisayi y'a jaabi ko ale bena taga n'a ye.

⁷Dawuda ni Abisayi tagara u fɛ sufɛ. U tagar'a sɔrɔ Sayuli lara kɛlɛdenw cɛma. A ka taman tutunin be duguma, a kuun gɛrɛfɛ. Abinɛri, ni kɛlɛdenw bɛɛ lara k'a lamini.

⁸Abisayi y'a fɔ Dawuda ye ko: «Ala kɔni ye i jugu d'i ma bii. A to ne be n ka taman kɛ k'a sɔgɔ ni dugukolo ye siɲɛ kelen dɔrɔn, n t'a filanan.»

⁹Nga Dawuda y'a fɔ a ye ko: «Kan'a faga! Jon be se k'a bolo la Masaba ka mɔgɔ wolomanin kan ka to jalakabali ye?»

¹⁰O kɔ, Dawuda y'a fɔ tugu ko: «Masaba le ben'a faga, n'a taalon sera, a bena taga, walima a bena taga kɛlɛ kɛ yɔrɔ dɔ la ka sa yen Masaba kosɔn.

¹¹ Masaba ka ne kisi ne be n bolo la a ka mɔgɔ wolomanin kan. I k'a ka taman n'a ka jiforoko ta minw b'a kuun gɛrɛfɛ ka na an be taga.»

¹²Sayuli ka taman n'a ka jiforoko minw tun b'a kuun gɛrɛfɛ, Dawuda ye o ta ten, u tagara. Mɔgɔ si ma u ye, mɔgɔ si fana ma bɔ u kala ma, mɔgɔ si ma kunun. Bɛɛ tun be sinɔgɔra, Masaba tun y'a kɛ u sinɔgɔra kosɔbɛ.

¹³Dawuda tagara lɔ faan dɔ nin na kulu kan yɔrɔjan. Furancɛ min tun be sɔrɔ u cɛ, ale tun ka jan kosɔbɛ.

¹⁴A pɛrɛnna kɛlɛdenw ni Nɛri dencɛ Abinɛri kunna ko: «Abinɛri, e te ne jaabi wa?» Abinɛri y'a jaabi ko: «E ye jɔn ye min be pɛrɛn masacɛ kunna ten?»

¹⁵Dawuda y'a fɔ Abinɛri ye ko: «I te cɛɛ ye wa? I ɲɔgɔn yɛrɛ te sɔrɔ Isirayɛlidenw cɛma. Mun na i ma masacɛ, i matigi kɔlɔsi? Mɔgɔ dɔ nana ko a ben'a faga.

¹⁶I ye koo min kɛ, o ma ɲi. Masaba kosɔn, aw ka kan ka faga le, bari aw ma se k'aw kuntigi kɔlɔsi, min ye Masaba ka mɔgɔ wolomanin ye. Sisan sa, masacɛ ka taman n'a ka jiforoko minw tun bilanin be a kuun gɛrɛfɛ, olu be min?»

¹⁷Sayuli y'a lɔn ko Dawuda kaan lo, a y'a fɔ ko: «Ne dencɛ Dawuda, ele lo wa?» Dawuda y'a jaabi ko: «Ne lo, n matigi, masacɛ.»

¹⁸O kɔ, Dawuda y'a fɔ ko: «Mun na n matigi b'a ka baarakɛla ɲinina ten? Ne ye mun le kɛ? Kojugu jumɛn le be n na?

¹⁹N matigi, masacɛ, mɛnni kɛ i ka baarakɛla darakan na sisan. N'a kɛra ko Masaba le y'a to i wilila ne kama, ne b'a daali ko a ka sɔn n ka boɲafɛn na. Nga ni adamadenw le y'o kɛ, olu danganin lo Masaba ɲakɔrɔ, bari u ye ne gwɛn ka bɔ jamana na, Masaba ye min di a ka jama ma. A kɛra i n'a fɔ u tun y'a fɔ ne ye ko ne ka taga joow sɔn.

²⁰Ne kana sa yɔrɔ si fɔɔ Masaba ɲakɔrɔ! Isirayɛlidenw ka masacɛ wilila ka taga tɛtɛ kɛlɛ kama, i n'a fɔ u be wɔlɔn gwɛn kulu kan cogo min na.»

²¹Sayuli y'a fɔ a ye ko: «Ne ye hakɛ kɛ. Ne dencɛ Dawuda, segi ka na. Ne tena i hakɛ ta tugu, bari bii i ye ne nii bɔko jati koba ye. Ne ye nalomanyabaara le kɛ, ne filila kosɔbɛ.»

²²Dawuda y'a fɔ ko: «Masacɛ ka taman filɛ, a to i ka kanbelenw dɔ ka n'a minɛ.

²³Masaba le bena an kelen kelen bɛɛ sara ka kɛɲɛ n'a ka tilenninya n'a ka ɲumanya ye. Masaba tun y'i di ne ma bii, nga ne ma sɔn k'a ka mɔgɔ wolomanin faga.

²⁴I nii bɔko kɛra koba ye ne ɲana cogo min na bii, o cogo kelen na fana, ne nii bɔko ka kɛ koba ye Masaba fɛ. A ka ne kisi kojugu bɛɛ ma.»

²⁵Sayuli y'a fɔ Dawuda ye ko: «Ne dencɛ Dawuda, Masaba ka barika don i la! Ɔnhɔn, i bena kobabaw kɛ, o bena ɲa i bolo siga t'a la!» Dawuda tɛmɛna ka taga n'a ka sira ye. Sayuli kɔsegir'a ka soo.