Read dyu Samuyɛli ka kitabu fɔlɔ 28 Bible Online

Samuyɛli ka kitabu fɔlɔ 28 - dyu bible

Samuyɛli ka kitabu fɔlɔ 28

¹O waati la, filisiw y'u ka kɛlɛdenw lajɛn janko u ka taga Isirayɛlidenw kɛlɛ. Akisi y'a fɔ Dawuda ye ko a n'a kɔmɔgɔw bena fara ale ka kɛlɛdenw kan.

²Dawuda y'a fɔ a ye ko: «I ka baaraden bena fɛɛn min kɛ, i bena o ye.» Akisi y'a fɔ Dawuda ye tugu ko: «I bena to ka ne kɔlɔsi kudayi.»

³ O y'a sɔrɔ Samuyɛli tun sara ka ban. Isirayɛlidenw bɛɛ tun y'a suu don Arama a ka dugu kɔnɔ, ani k'a sanga kɛ. Sayuli tun y'a kɛ sukɔrɔwele ni lagwɛliko bɛɛ dabilara jamana kɔnɔ.

⁴Filisiw ye ɲɔgɔn lajɛn ka na sigi Sunɛmu, Sayuli fana ye Isirayɛlidenw bɛɛ lajɛn ka na sigi Gilibowa.

⁵Sayuli ye filisiw ka kɛlɛdenw ye tuma min na, a siranna kosɔbɛ fɔɔ a tun be yɛrɛyɛrɛ.

⁶ A ye Masaba ɲininga. Masaba m'a jaabi, a ma kuma a fɛ siko la, a fana m'a jaabi *Urimu barika la, a ma kira si ci a ma.

⁷O la, Sayuli y'a fɔ a ka baarakɛlaw ye ko: «Muso minw be sukɔrɔw wele, aw k'olu dɔ yɔrɔ yaala ne ye, janko ne be taga a ɲininga.» U y'a fɔ a ye ko: «Dɔ be sɔrɔ Ɛndɔri.»

⁸Sayuli y'a ka faniw yɛlɛma ka fani wɛrɛw don janko mɔgɔw kan'a lɔn ko ale lo, ka mɔgɔ fila minɛ ka taga n'u ye. U sera muso nin fɛ sufɛ. Sayuli y'a fɔ a ye ko a ka suu dɔ wele, ale bena min koo fɔ a ye.

⁹Nga muso nin y'a fɔ ko: «Sayuli y'a kɛ sukɔrɔw welebagaw ni lagwɛlikɛlaw y'u ka baara dabila jamana kɔnɔ, e yɛrɛ b'o lɔn. Mun na i be na ne nigɛ ka taga ne di u be ne faga?»

¹⁰Sayuli kalila ni Masaba tɔgɔ ye ko: «Masaba kosɔn, kojugu si tena i sɔrɔ koo nin kosɔn.»

¹¹Muso y'a ɲininga ko: «I b'a fɛ n be jon le wele?» A ko Samuyɛli suja.

¹²Tuma min na muso nin ye Samuyɛli ye, a kulera kosɔbɛ, k'a fɔ Sayuli ye ko: «I ye Sayuli yɛrɛ ye! Mun na i ye ne namara?»

¹³Masacɛ y'a fɔ a ye ko: «I kana siran! I be mun le yera?» A ko: «N ɲaa be suja dɔ la n'a be bɔra dugukolo kɔnɔ.»

¹⁴Masacɛ ye muso nin ɲininga tugu ko: «A be cogo di?» A y'a jaabi ko cɛkɔrɔba dɔ le be bɔra, foroca b'a kaan na. O tuma na, Sayuli y'a lɔn ko Samuyɛli lo. A y'a ɲaa biri duguma k'a kunbiri gwan.

¹⁵Samuyɛli y'a fɔ Sayuli ye ko: «Mun na i ye ne sigɛn ka ne wele ka na?» Sayuli y'a jaabi ko ale nii tɔɔrɔnin lo kosɔbɛ, ko filisiw b'a la k'ale kɛlɛ, ko Ala bɔra ale kɔ. Ko Ala t'a jaabi tugu, ko a ma kira dɔ ci ka kuma a fɛ, a fana ma kuma a fɛ siko la. K'o le y'a to ale y'a wele janko a ka dɔ fɔ a ye a ka kan ka fɛɛn min kɛ.

¹⁶Samuyɛli y'a fɔ ko: «Mun na i be ne wele ka ne ɲininga, n'i y'a lɔn ko Masaba bɔra ka ban i kɔ ka kɛ i jugu ye?

¹⁷ Masaba tun ye min fɔ ne barika la, a y'o le kɛ. A ye masaya bɔsi i la k'a d'i tɔɲɔgɔn dɔ ma, min ye Dawuda ye.

¹⁸ I tun ma mɛnni kɛ Masaba fɛ, ka amalɛkiw halaki i n'a fɔ Masaba tun dimina k'a ɲini i fɛ cogo min na, o la Masaba ye nin kɛ i la bii fana.

¹⁹Masaba bena Isirayɛlidenw ni ele don filisiw bolo. Sini, ele n'i dencɛw, anw bena kɛ ɲɔgɔn fɛ. Masaba bena Isirayɛlidenw ka kɛlɛdenw don filisiw bolo.»

²⁰O yɔrɔnin kelen, Sayuli bɔra ka ben purun! Samuyɛli ka kuma nunu tun ye siranya bila a la kosɔbɛ. K'a fara o kan, a barika tun dɛsɛra, bari a tun ma dumuni kɛ tile kuturu ni suu kɔnɔ.

²¹Muso nin nan'a gɛrɛfɛ, k'a ye ko a hakili bɛɛ ɲagaminin lo. A y'a fɔ a ye ko: «A filɛ sa, i ka baaraden ye mɛnni kɛ i fɛ ka sɔn i ta ma, k'a yɛrɛ bila koo la.

²²Sisan ele ka sabali ka mɛnni kɛ ne fɛ fana, a to ne be dumuni dɔ d'i ma i b'o dumu ka se ka fanga sɔrɔ ka sɔrɔ k'i ka sira ta.»

²³Nga a banna ko ale tena dumuni kɛ. A ka baaradenw ni muso nin y'a daali kosɔbɛ, a ye mɛnni kɛ u fɛ, ka sɔrɔ ka wili duguma ka sigi sigilan kan.

²⁴O y'a sɔrɔ misiden tulɔnin dɔ tun be muso nin fɛ. A teliyara ka taga o minɛ k'a faga, ka mugu dɔ bɔ k'o nɔɔni ka buru kɛ n'o ye, a ma fununan kɛ a la.

²⁵O kɔ, a nana o bila Sayuli n'a ka mɔgɔw ɲakɔrɔ. U ye dumuni kɛ, ka sɔrɔ ka wili ka taga o suu kelen nin na.