Read dyu Samuyɛli ka kitabu fɔlɔ 29 Bible Online

Samuyɛli ka kitabu fɔlɔ 29 - dyu bible

Samuyɛli ka kitabu fɔlɔ 29

¹Filisiw ka kɛlɛbolow bɛɛ ye ɲɔgɔn lajɛn Afɛki, Isirayɛlidenw fana ye ɲɔgɔn lajɛn jii bɔyɔrɔ la min be Zizireyɛli mara la.

²Filisiw ka kɛlɛdenw ɲamɔgɔw tun bilara ɲafɛ, u n'u ka kɛlɛden kɛmɛ kɛmɛ ni waa kelen kelen. Dawuda n'a kɔmɔgɔw tun be kɔfɛ ni Akisi ye.

³Filisiw ka ɲamɔgɔw ye ɲiningali kɛ ko: «Eburu nunu be mun le kɛra yan?» Akisi y'u jaabi ko: «Isirayɛlidenw ka masacɛ Sayuli ka baaradenkɔrɔ Dawuda lo. A be ni ne ye a sera saan kelen, walima fila. Ne ma jalakiyɔrɔ si ye a la kabini a sera ne fɛ fɔɔ ka na se bii ma.»

⁴Filisiw ɲamɔgɔ nunu dimina Akisi kɔrɔ, k'a fɔ a ye ko: «A to Dawuda be kɔsegi ka ta'a ka sigiyɔrɔ la. A kana taga ni anw ye kɛlɛkɛyɔrɔ la, janko a kana anw to kɛlɛ la ka yɛlɛma an kama kɛlɛ tuma na. A bena se ka segi k'a yɛrɛ koo diya a kuntigi ye cogo di ni anw ka mɔgɔw kungolow tɛ?

⁵ U tun be dɔnkili la ka dɔɔn kɛ jon le kosɔn? Dawuda nin tɛ wa? N'u b'a fɔra ko: ‹Sayuli ye mɔgɔ waa damani faga, Dawuda ye mɔgɔ waa tan tan faga.› »

⁶Akisi ye Dawuda wele k'a fɔ a ye ko: «Masaba kosɔn, i ye mɔgɔtilennin ye, a ka di ne ye i ka fara ne kan an ka to ka taga kɛlɛ la ɲɔgɔn fɛ, bari ne ma jalakiyɔrɔ si ye i la kabini i nana ne fɛ loon min na fɔɔ ka na se bii ma. Nga i koo man di filisiw ɲamɔgɔw le ye.

⁷Janko n kana koo dɔ kɛ min man di filisiw ɲamɔgɔw ye, i ka kɔsegi ka taga hɛrɛ la.»

⁸Dawuda y'a fɔ Akisi ye ko ale ye mun le kɛ. Ko a ye kojugu jumɛn le ye ale seen kɔrɔ kabini a ser'a fɛ fɔɔ ka na se bii ma, min be kɛ sababu ye ale te se ka ta'a ka masacɛ n'a matigi juguw kɛlɛ.

⁹Akisi y'a jaabi ko: «Ne y'o lɔn. I koo ka di ne ye i n'a fɔ Ala ka mɛlɛkɛ, nga filisiw ɲamɔgɔw le y'a fɔ ko e te taga ni olu ye fewu kɛlɛ la.

¹⁰Sisan, sini sɔgɔma joona, i ka wili, i n'i kuntigi ka baaraden minw tugura i kɔ. Aw ka wili sɔgɔma joona, ni kɛnɛ cira ka ɲa dɔrɔn, aw ye taga.»

¹¹Dawuda n'a kɔmɔgɔw wilila sɔgɔmada joona ka kɔsegi ka taga filisiw ka jamana na. Filisiw tagara Zizireyɛli.