Read dyu Samuyɛli ka kitabu fɔlɔ 3 Bible Online

Samuyɛli ka kitabu fɔlɔ 3 - dyu bible

Samuyɛli ka kitabu fɔlɔ 3

¹Kanbelennin Samuyɛli kɔni, ale tun be baara kɛra Masaba ye Eli gɛrɛfɛ. O tuma na, Masaba tun te to ka kuma u fɛ tuma bɛɛ, a tun te foyi yira u la tuma caaman fana.

²Loon dɔ sufɛ, Eli tun lanin be a ka layɔrɔkɔrɔ la. O y'a sɔrɔ a ɲaa tun cɛnna, a tun te yeli kɛ tugu.

³Samuyɛli fana tun lanin be Masaba batoso kɔnɔ Ala ka layidu taamasiɲɛ kɛsu bilayɔrɔ la n'a be sinɔgɔra. O y'a sɔrɔ Ala ka fitinɛ tun ma faga fɔlɔ.

⁴O tuma na, Masaba ye Samuyɛli wele. A y'a jaabi ko: «Naamu»,

⁵ka wili ka boli ka taga Eli fɛ, k'a fɔ a ye ko: «Ne nana, bari e ye ne wele.» Eli y'a jaabi ko: «Ne ma i wele, kɔsegi ka taga la.» A kɔsegira ka taga la.

⁶Masaba ye Samuyɛli wele tugu. Samuyɛli wilila ka taga Eli fɛ k'a fɔ ko: «Ne nana, bari e ye ne wele.» Eli y'a jaabi ko: «N deen, ne ma i wele, kɔsegi ka taga la.»

⁷O y'a sɔrɔ Samuyɛli tun ma Masaba lɔn fɔlɔ, ani Masaba tun ma kuma a fɛ fɔlɔ ka ye.

⁸Masaba ye Samuyɛli wele tugu, a siɲɛ sabanan na. A wilila ka taga Eli fɛ tugu k'a fɔ ko: «Ne nana, bari e ye ne wele.» O tuma na, Eli y'a faamu ko Masaba le tun be deen nin welela.

⁹A y'a fɔ a ye ko: «Taga la, n'a y'i wele, i k'a fɔ ko: ‹Masaba, kuma, e ka jɔncɛ be mɛnni kɛra.› » A tagara la a ka layɔrɔ la.

¹⁰Masaba nana tugu k'a wele i n'a fɔ fɔlɔ, ko: «Samuyɛli, Samuyɛli!» A y'a jaabi ko: «Naamu, e ka jɔncɛ be mɛnni kɛra.»

¹¹Masaba y'a fɔ a ye ko: «Ne bena koo dɔ kɛ Isirayɛlidenw cɛma min bena digi a mɛnbagaw la.

¹²O loon na, ne ye koo minw bɛɛ fɔ Eli n'a ka soo kama, ne bena o kɛ, k'a ta o daminɛ na fɔɔ a laban na.

¹³Ne y'a fɔ a ye ko ne b'a ka soo jalaki, n tena u to ɲasuma la tugu fewu, a ka kojugu kama. A deenw tun be ne Ala dɔgɔya, a tun b'o kala ma, nga a ma u jalaki.

¹⁴O le y'a to ne y'a fɔ k'a gwɛlɛya a ka soo kama ko a ka somɔgɔw ka kojugu nin tena yafa sarakaw barika la, walima boɲafɛn barika la abada.»

¹⁵Samuyɛli lara fɔɔ dugu gwɛra tuma min na, a sɔrɔla ka Masaba ka soo daaw yɛlɛ. A tun be siran ka koo yirata nin fɔ Eli ye.

¹⁶Nga Eli y'a wele ko: «N deen Samuyɛli!» A y'a jaabi ko: «Naamu!»

¹⁷Eli y'a fɔ a ye ko: «Ala ye kuma jumɛn le fɔ i ye? Kana foyi dogo ne la. Ala ye koo minw bɛɛ fɔ i ye, n'i ye dɔ dogo ne la, Ala kan'a diya i la.»

¹⁸O la, Samuyɛli y'o koo bɛɛ fɔ a ye, a ma foyi dogo a la. Eli y'a fɔ ko: «Masaba lo, koo min ka d'a ye, a k'o kɛ.»

¹⁹Samuyɛli tun be boɲana ka taga ɲa, Masaba tun be n'a ye. Masaba ye kuma min bɛɛ fɔ, o bɛɛ tun be kɛ.

²⁰K'a ta Dan mara la fɔɔ ka n'a bila Bɛriseba, Isirayɛlidenw bɛɛ tun y'a lɔn ko Samuyɛli kɛra Masaba ka kira ye.

²¹Masaba tun tora k'a yɛrɛ yira Silo. A tun be to k'a yɛrɛ yira Samuyɛli la o yɔrɔ la a ka kuma barika la.