Read dyu Samuyɛli ka kitabu fɔlɔ 30 Bible Online

Samuyɛli ka kitabu fɔlɔ 30 - dyu bible

Samuyɛli ka kitabu fɔlɔ 30

¹A tile sabanan loon, Dawuda n'a kɔmɔgɔw sera Sikilagi. O y'a sɔrɔ amalɛkiw tun bɔra ka na kɛlɛ kɛ Zuda mara worodugu ɲafan fɛ ani Sikilagi. U tun ye Sikilagi dugu ci k'a jɛni,

²ka musow minɛ, ani fɛɛn o fɛɛn tun be dugu kɔnɔ, mɔgɔkɔrɔba fara denmisɛnw kan. U tun ma mɔgɔ si faga u la, u tun y'u minɛ ka taga n'u ye.

³Dawuda n'a kɔmɔgɔw sera dugu kɔnɔ, u y'a ye ko dugu jɛninin lo, u ka musow ni u dencɛw ni u denmusow minɛna ka taga.

⁴O la, Dawuda n'a kɔmɔgɔw kasira kosɔbɛ fɔɔ u barika tagara ban, u tun te se ka kasi tugu.

⁵ U tun ye Dawuda ka muso fila nunu, Ayinowamu ka bɔ Zizireyɛli ni Karimɛlika Nabali ka muso Abigayɛli fana minɛ ka taga n'u ye.

⁶Dawuda hakili ɲagamina kosɔbɛ, bari jama tun b'a fɔra k'olu b'a bon ni kabakuru ye k'a faga. U bɛɛ dusu tun cɛnna kosɔbɛ, u dencɛw n'u denmusow kosɔn. Nga Dawuda y'a yɛrɛ jaa gwɛlɛya Masaba a ka Ala barika la.

⁷ A y'a fɔ sarakalasebaga Ayimelɛki dencɛ Abiyatari ye ko a ka sarakalasebagaw kuntigi ka fani ta ka na n'a ye. Ale y'o ta ka n'a di Dawuda ma.

⁸Dawuda ye Masaba ɲininga ko ni ale tugura jɛnkulu nin kɔ, ko a bena u sɔrɔ wa. Masaba y'a jaabi ko a ka tugu a kɔ, ko a bena u sɔrɔ ani k'a ka mɔgɔw bɔsi.

⁹Dawuda n'a kɔmɔgɔ mɔgɔ kɛmɛ wɔɔrɔ wilila ka taga. U tagara se Bezɔri kɔɔ daa la. Minw tun tora kɔfɛ, olu tora o yɔrɔ la.

¹⁰O kɔ, Dawuda tɛmɛna ka tugu u kɔ ni mɔgɔ kɛmɛ naani ye. O y'a sɔrɔ mɔgɔ kɛmɛ fila nunu tun sigɛnna n'u tun te se ka kɔɔ tigɛ.

¹¹U ye Ezipitika dɔ ye kongo kɔnɔ, k'a minɛ ka na n'a ye Dawuda fɛ. U ye dumuni ni jii d'a ma a y'a min.

¹²U fana ye ŋɔmi d'a ma min tun dilanna ni toro ye, ka *ɛrɛzɛnjanin bɔrɔmisɛn fila d'a ma. A ye dumuni kɛ ka ban tuma min na, a ɲaa yɛlɛla, bari a tun ma dumuni kɛ ka jii min tile saba ni suu saba kɔnɔ.

¹³Dawuda y'a ɲininga ko a bɔra min, ko ale ye jɔn ka mɔgɔ ye. A ye Dawuda jaabi ko: «Ne ye Ezipitika ye, ne ye amalɛkicɛ dɔ ka jɔɔn ye. A tile saba le ye bii, ne kuntigi bolila ka ne to bari ne tun man kɛnɛ.

¹⁴An tun tagara Keretiw ka mara worodugu ɲafan na k'u kɛlɛ, ani Zuda kɔmɔgɔw ka mara la, ni Kalɛbu ka mara worodugu ɲafan na, ani an fana ye Sikilagi jɛni.»

¹⁵Dawuda y'a fɔ a ye ko: «I be sɔn ka ne bila sira ka taga o jɛnkulu nin fɛ wa?» A y'a fɔ Dawuda ye ko ni Dawuda be sɔn ka kali ni Ala tɔgɔ ye ko a tena ale faga, ani ko a tena ale di a kuntigi ma, ko ale be se ka taga n'a ye u yɔrɔ la.

¹⁶O la, cɛɛ nin tagara ni Dawuda ye. U tagar'a sɔrɔ amalɛki nunu siginin be ka yɔrɔ bɛɛ fa, n'u be dumuni kɛra ka minni kɛ, ani ka ɲanagwɛ nafolo kosɔn, u ye min sɔrɔ filisiw ni Zuda mara la.

¹⁷Dawuda y'a daminɛ k'u kɛlɛ k'a ta sɔgɔmadafɛ fɔɔ ka taga se o dugusagwɛ wuladafɛ. Mɔgɔ si ma se ka kisi, fɔɔ kanbelen mɔgɔ kɛmɛ naani minw sera ka yɛlɛ ɲɔgɔmɛw kan ka boli.

¹⁸Amalɛkiw tun ye fɛɛn o fɛɛn ta u fɛ, Dawuda sera k'o bɛɛ bɔsi, k'a ka muso fila nunu bɔsi fana.

¹⁹U ka mɔgɔ si ma tunu, mɔgɔkɔrɔba fara denmisɛn kan, dencɛ fara denmusow kan, ani fɛɛn o fɛɛn min tun tara u fɛ. Dawuda y'o bɛɛ sɔrɔ ka na n'u ye.

²⁰Dawuda ye begɛnw bɛɛ minɛ. Mɔgɔ minw tun b'u gwɛnna, olu tun be to k'a fɔ ko nin ye Dawuda ta ye.

²¹Mɔgɔ kɛmɛ fila minw tun sigɛnna ka to Bezɔri kɔɔ daa la, n'u tun ma se ka taga n'a ye, Dawuda sera olu fɛ tuma min na, u wilila k'a ni jama kunbɛn. Dawuda gwɛrɛla u la n'a ka kɛlɛdenw ye k'u fo.

²²Mɔgɔjuguw ni mɔgɔkolon minw bɛɛ tun tagara ni Dawuda ye, olu y'a fɔ ko: «Nunu ma taga minkɛ, an sera ka fɛɛn minw sɔrɔ k'u bɔsi, olu te foyi sɔrɔ o la, fɔɔ u ka musow n'u deenw. U ka olu minɛ ka taga.»

²³Nga Dawuda y'a fɔ u ye ko: «Masaba ye fɛɛn min d'an ma, aw kana o kɛ ten, ne balimaw. A y'an mara, jɛnkulu min tun nana an kama, k'o don an bolo.

²⁴Jɔn le bena sɔn aw ma o koo la? Mɔgɔ minw tagara kɛlɛ la ani minw tora an ka minanw kɔrɔ, u bɛɛ ka sɔrɔli bena kɛ kelen ye. U bɛɛ bena o tilan.»

²⁵Dawuda y'o kɛ sariya ni landa ye o loon na. Fɔɔ ka na se bii ma, Isirayɛlidenw b'o bato.

²⁶Dawuda sera Sikilagi tuma min na, a ye o fɛɛn nunu dɔw ci Zuda mara cɛkɔrɔbaw ma minw tun ye a teriw ye, k'a fɔ u ye ko: «Aw ka nunu minɛ, o ye Masaba juguw bololafɛn dɔw ye.»

²⁷A ye dɔ ci Betɛlikaw ma, ni Aramɔtikaw ma worodugu ɲafan fɛ, ni Yatirikaw ma,

²⁸ani Arowɛrikaw ni Sifemɔtikaw, ani Ɛsitemowakaw ma,

²⁹ani Arakalikaw, ani ka dɔ ci yerameyɛliw ka duguw kɔnɔ mɔgɔw ma, ni keniw ka duguw kɔnɔ mɔgɔw ma,

³⁰ani ka dɔ fana ci Orimakaw ma, ni Bɔrasankaw ma ani Atakikaw ma,

³¹ani ka dɔ ci Eburɔnkaw ma, ani a tun tɛmɛna yɔrɔ tɔw minw bɛɛ la n'a kɔmɔgɔw ye.