Read dyu Samuyɛli ka kitabu fɔlɔ 31 Bible Online

Samuyɛli ka kitabu fɔlɔ 31 - dyu bible

Samuyɛli ka kitabu fɔlɔ 31

¹Filisiw ye Isirayɛlidenw kɛlɛ. Isirayɛlidenw bolila u ɲa, mɔgɔ caaman fagara Gilibowa kulu kan.

²U sera ka Sayuli n'a deenw dɛrɛ, u ye Zonatan ni Abinadabu ani Malikisuwa, Sayuli deenw faga.

³Kɛlɛ gwanna Sayuli kɔ kosɔbɛ. Kalatigiw y'a ye, a tun be yɛrɛyɛrɛla kosɔbɛ olu ɲa.

⁴Sayuli y'a fɔ a ka kɛlɛkɛminanw tabaga ye ko a ka murujan bɔ k'ale faga janko kɛnɛkɛnɛbali nunu kana ale minɛ ka tolon kɛ ale la. Nga cɛɛ nin ma sɔn, bari a tun siranna kosɔbɛ. O la, Sayuli ye murujan juu tutu k'a yɛrɛ bila ka ben a kan.

⁵A ka kɛlɛkɛminanw tabaga nin y'a ye a sara, ale fana ye murujan juu tutu ka bɔ ka ben a kan, ale fana sara n'a ye.

⁶A kɛra ten, Sayuli n'a dencɛ saba n'a ka kɛlɛkɛminanw tabaga, ani a ka mɔgɔw bɛɛ sara o loon kelen na.

⁷Isirayɛliden minw tun siginin be kɔkɛnɛ faan dɔ nin na, ani minw tun siginin be Zurudɛn baji kɔfɛ, olu y'a ye ko u ka mɔgɔw bolila ani ko Sayuli n'a deenw sara. Olu bɔra u ka duguw kɔnɔ ka boli k'u ka duguw to yen. Filisiw nana sigi u kɔnɔ.

⁸O dugusagwɛ, filisiw nana ko u bena suu nunu ka minanw ta. U ye Sayuli n'a deen saba nunu suuw lanin ye Gilibowa kulu kan.

⁹U ye Sayuli kuun tigɛ, k'a ka kɛlɛkɛminanw ta, ka mɔgɔw ci ka yaala Filisi jamana bɛɛ kɔnɔ k'o kibaruya fɔ u ka josow kɔnɔ ani jama ye.

¹⁰U ka joo minw tɔgɔ ko *Asitarite, u ye Sayuli ka kɛlɛkɛminanw bila olu ka soo kɔnɔ, ka Sayuli suu gwengwen dugu laminikogo kan.

¹¹Filisiw ye fɛɛn min kɛ Sayuli la, Yabɛsi min be Galaadi mara la, o dugu mɔgɔw y'o mɛn tuma min na,

¹²u ka cɛfariw bɛɛ wilila ka suu bɛɛ kɛ taama na ka na Bɛtiseyan, ka na Sayuli n'a deenw bɔ kogo kan ka taga n'u ye Yabɛsi k'u jɛni.

¹³U y'u kolow ta ka taga u don joyiri dɔ kɔrɔ Yabɛsi, ani ka suun don tile wolonwula.