Read dyu Samuyɛli ka kitabu fɔlɔ 4 Bible Online

Samuyɛli ka kitabu fɔlɔ 4 - dyu bible

Samuyɛli ka kitabu fɔlɔ 4

¹Samuyɛli tun be to k'o kuma fɔ Isirayɛli jama bɛɛ ye. Loon dɔ, Isirayɛlidenw bɔra k'u be taga kɛlɛ kɛ ni filisiw ye. U tagara sigi Ebɛnezɛri gɛrɛfɛ. Filisiw tun be Afɛki.

²Filisiw y'u yɛrɛ labɛn kɛlɛ kama ni Isirayɛlidenw ye. U ye kɛlɛ daminɛ. U sera Isirayɛlidenw kɔrɔ ka mɔgɔ waa naani (4 000) faga kɛlɛ yɔrɔ la.

³Isirayɛli jama kɔsegira ka na u sigiyɔrɔ la. U ka cɛkɔrɔbaw ko mun na Masaba y'a to filisiw sera olu kɔrɔ bii. U ko: «An ka taga Silo ka Masaba ka layidu taamasiɲɛ kɛsu ta, ka na n'a ye an cɛma, a ka na an bɔsi an juguw bolo.»

⁴ Jama ye mɔgɔw ci ka taga Silo. U kɔsegira ni Masaba, Setigi ka layidu taamasiɲɛ kɛsu ye, min siginin be *serubɛnw cɛma. Eli ka deen fila Ofini ni Pinasi fana tun nana ni kɛsu nin ye.

⁵Kɛsu nin sera tuma min na, Isirayɛlidenw bɛɛ pɛrɛnna kosɔbɛ ni nisɔndiya ye fɔɔ dugukolo yɛrɛyɛrɛla.

⁶O mankan nin sera filisiw ka sigiyɔrɔ la. Olu ko: «Pɛrɛnkan min be bɔra Eburuw ka sigiyɔrɔ la ten, o kɔrɔ ye mun ye?» U y'a mɛn ko Masaba ka layidu taamasiɲɛ kɛsu le sera u ka sigiyɔrɔ la tuma min na,

⁷u siranna, bari u tun lar'a la ko batofɛn dɔ nana Isirayɛlidenw ka sigiyɔrɔ la. U ko: «Bɔnɛ ye an ta ye! Bari o ɲɔgɔn ma kɛ ka ye fɔlɔ.

⁸Bɔnɛ ye an ta ye! Jɔn le bena an kisi o batofɛn barikaman nunu ma? Batofɛnw lo minw ye Ezipitikaw tɔɔrɔ ni tɔɔrɔ sifa bɛɛ ye kongokolon kɔnɔ.

⁹Aw filisiw k'aw jaa gwɛlɛya ka kɛ cɛɛw ye, janko aw fana kana tila ka kɛ Eburu nunu ka jɔɔnw ye, i n'a fɔ olu kɛra aw ta ye cogo min na. Aw k'aw yɛrɛ kɛ cɛɛw ye ka kɛlɛ kɛ!»

¹⁰Filisiw ye kɛlɛ wili, u sera Isirayɛlidenw kɔrɔ. Olu kelen kelen bɛɛ bolila ka taga u ka sigiyɔrɔ la. U barika tun boɲana Isirayɛlidenw ma kosɔbɛ fɔɔ u ye mɔgɔ waa bi saba (30 000) faga u cɛma.

¹¹U ye Ala ka layidu taamasiɲɛ kɛsu bɔsi, Eli ka deen fila Ofini ni Pinasi fana sara.

¹²Bɛnzamɛn kɔmɔgɔ dɔ bɔra kɛlɛ yɔrɔ la ka boli ka taga Silo o loon kelen na. A ka fani tun farannin be, buguri tun b'a kuun na.

¹³A sera tuma min na, o y'a sɔrɔ Eli tun siginin be a ka sigilan kan sirada la ka kɔnɔni kɛ, bari a hakili tun ɲagaminin be Ala ka layidu taamasiɲɛ kɛsu kosɔn. Cɛɛ dontɔ dugu kɔnɔ, a ye kibaruya nin fɔ, dugumɔgɔw bɛɛ kulera.

¹⁴Eli y'o kulekan mɛn. A y'a fɔ ko: «Nin mankan nin kɔrɔ ye mun ye?» Cɛɛ nin bolila ka na kibaruya nin fɔ a ye.

¹⁵O y'a sɔrɔ a sii tun ye saan bi kɔnɔntɔn ni seegi ye, a ɲaa tun cɛnna, a tun te yeli kɛ tugu.

¹⁶Cɛɛ nin y'a fɔ a ye ko: «Ne bɔra kɛlɛ yɔrɔ la, ne bolila ka bɔ yen bii yɛrɛ.» Eli y'a ɲininga ko: «Mun le kɛra, n deen?»

¹⁷Mɔgɔ min tun nana ni kibaruya nin ye, ale y'a jaabi ko: «Isirayɛlidenw bolila filisiw ɲa, u caaman fagara. I ka deen fila Ofini ni Pinasi fana sara, Ala ka layidu taamasiɲɛ kɛsu bɔsira.»

¹⁸Cɛɛ nin ye Ala ka layidu taamasiɲɛ kɛsu koo fɔ dɔrɔn, Eli bɔra sigilan kan ka ben a kɔfɛ soda gɛrɛfɛ yen. A kaan karila, a sara, bari a tun kɔrɔla, a fana tun ka bon kosɔbɛ. A tun kɛra Isirayɛlidenw ka ɲamɔgɔ ye saan bi naani kɔnɔ.

¹⁹Eli dencɛ Pinasi ka muso tun kɔnɔman lo, a jigiwaati tun sera fana. A ye Ala ka layidu taamasiɲɛ kɛsu minɛko mɛn filisiw fɛ dɔrɔn, n'a birancɛ n'a cɛɛ ka sayako, a sonsorila ka wolo, bari tiin karabara ka ben a kan.

²⁰A tun be ɲini ka sa. Muso minw tun b'a dɛmɛna, olu y'a fɔ a ye ko: «I kana siran, i ye dencɛ le sɔrɔ.» Nga a ma u jaabi, a yɛrɛ ma o kɔlɔsi.

²¹A ye deen nin tɔgɔ la ko Ikabɔdi, o kɔrɔ ko nɔɔrɔ te yen tugu. A ko: «Ala ka nɔɔrɔ bɔra Isirayɛlidenw cɛma.» A y'o fɔ Ala ka layidu taamasiɲɛ kɛsu minɛko kama, n'a birancɛ n'a cɛɛ ka saya kama.

²²O la, a y'a fɔ ko: «Ala ka nɔɔrɔ bɔra Isirayɛlidenw cɛma, bari Ala ka layidu taamasiɲɛ kɛsu bɔsira u la.»