Read dyu Samuyɛli ka kitabu fɔlɔ 7 Bible Online

Samuyɛli ka kitabu fɔlɔ 7 - dyu bible

Samuyɛli ka kitabu fɔlɔ 7

¹ Kiriyatayimukaw nan'a ta, ka t'a bila Abinadabu ka soo kɔnɔ tintin kan. O kɔ, u y'a dencɛ Eleyazari woloma k'o don a kɔlɔsibaara la.

²Kabini Ala ka layidu taamasiɲɛ kɛsu sera Kiriyatayimu dugu kɔnɔ, waati caaman tun tɛmɛna, saan mugan tun tɛmɛna. O tuma na, Isirayɛlidenw bɛɛ sɔrɔla ka kule Masaba nɔɔ fɛ.

³Samuyɛli y'a fɔ u bɛɛ ye ko: «N'a kɛra ko aw sɔnna Masaba ma tugu n'aw dusu bɛɛ ye, aw ka *Asitarite, ni siya wɛrɛw ka joo tɔw ta k'o fili, k'aw yɛrɛ di Masaba ma, k'ale kelen bato. N'aw y'o kɛ, a bena aw bɔsi filisiw bolo.»

⁴Isirayɛlidenw ye *Baali ni Asitarite fili, ka to ka Masaba kelenpe bato.

⁵Samuyɛli y'a fɔ ko u ka Isirayɛlidenw bɛɛ lajɛn Misipa, ko ale bena Masaba daali u ye.

⁶U nana ɲɔgɔn lajɛn Misipa tuma min na, u ye jii bɔ k'a bɔn Masaba ɲakɔrɔ, ka suun don o loon na. K'u to o yɔrɔ la, u y'a fɔ ko: «An ye Masaba hakɛ ta!» Samuyɛli kɛra Isirayɛlidenw ɲamɔgɔ ye Misipa.

⁷Filisiw y'a mɛn tuma min na ko Isirayɛlidenw ye ɲɔgɔn lajɛn Misipa, u ka ɲamɔgɔw wilila ka na Isirayɛlidenw kama. Olu y'o kibaru mɛn dɔrɔn, u siranna filisiw ɲa.

⁸U y'a fɔ Samuyɛli ye ko: «Kana Masaba an ka Ala daalili dabila an ye, janko a k'an kisi filisiw ma.»

⁹Sagaden minw be siin min, Samuyɛli y'u dɔ minɛ k'o kɛ saraka jɛnita ye Masaba ma k'a bɛɛ jɛni. A ye Masaba daali Isirayɛlidenw ye, Masaba fana y'a ka daalili minɛ.

¹⁰Tuma min na Samuyɛli tun be saraka jɛnita nin bɔra, filisiw gwɛrɛla janko ka Isirayɛlidenw kɛlɛ. Nga Masaba y'a kɛ saan pɛrɛnna u kan kosɔbɛ o loon na, k'u hakili ɲagami. U barika dɛsɛra Isirayɛlidenw ɲakɔrɔ.

¹¹Isirayɛli jama bɔra Misipa k'u gwɛn, k'u faga fɔɔ ka taga se Bɛtikari gɛrɛfɛ.

¹²Samuyɛli ye kabakuru dɔ ta, k'a tutu Misipa ni Seni furancɛ la k'a tɔgɔ la ko Ebɛnezɛri, [1] a ko Masaba ye olu dɛmɛ fɔɔ ka na se yan.

¹³U sera filisiw kɔrɔ, filisiw ma kɔsegi ka na Isirayɛlidenw ka jamana na tugu. Ka Samuyɛli to sii la, Masaba y'a bolo la filisiw kan.

¹⁴U tun ye duguba minw bɔsi Isirayɛlidenw fɛ, olu kɔsegira ka kɛ Isirayɛlidenw ta ye tugu. K'a ta Ekurɔn fɔɔ ka taga se Gati, Isirayɛlidenw y'o bɔsi u bolo. Hɛrɛ donna Isirayɛlidenw ni amoriw cɛ.

¹⁵Samuyɛli kɛra Isirayɛlidenw ka ɲamɔgɔ ye a sii bɛɛ la.

¹⁶A tun be to ka taga saan o saan Betɛli ni Giligali ani Misipa duguw kɔnɔ, ka Isirayɛlidenw ka koow ɲanabɔ o yɔrɔw bɛɛ la.

¹⁷O kɔ, a tun be segi ka na Arama, a ka soo tun be yɔrɔ min na. A tun be to ka Isirayɛlidenw kiti o yɔrɔ la. A ye sarakabɔyɔrɔ lɔ Masaba ye o yɔrɔ la fana.