Read Jula Dunuɲa damina kitabu 49 Bible Online

Dunuɲa damina kitabu 49 - Jula bible

Dunuɲa damina kitabu 49

¹O kɔ, Yakuba k’a dencɛw bɛɛ wele k’a fɔ o ye ko: «Aw ye na lajɛn ne kɔrɔ, ne bɛna aw ta duruja nataw ta kow fɔ aw ye.»

²A ko: «Aw ye na lajɛn ka mɛnni kɛ, Yakuba dencɛw! Aw ye na aw facɛ Izirayɛli lamɛn.

³Rubɛn, ne dencɛ fɔlɔ, ele ye ne ta baraka ye, ne kanbelenman kɔnna ka den fɔlɔ min woro. I ta bonya tɛmɛna bɛɛ ta kan, i baraka fana tɛmɛna bɛɛ ta kan.

⁴Nka i ma ɲamalɔ; i bɛ i ko jiba woyotɔ min bɛ lamaga; o ra, i tɛna ɲafɛyɔrɔ sɔrɔ dɛ! Sabu i yɛlɛnna i facɛ ta lanan kan, i yɛlɛnna ne ta lanan kan, ni ne muso ye.

⁵«Ayiwa, Simeyɔn ni Levi ye mɔgɔ suguya kelen ye. O ta muruw ye kojugukɛfɛnw le ye.

⁶O ka jɛn min siri, ne tɛ ni o ye o ra; ne tɛ ni o ye o ta jɛn ra fiyewu! Sabu dimi kosɔn o ka mɔgɔ faga, o ta juguya kosɔn, o toronkɛtɔ, o ka mɔgɔw ta misitoranw senfasaw tigɛ.

⁷Ala ye o ta dimi danga, sabu o le ka o bla kojugu ra. Ala ye o ta fariya danga, sabu o le ka o kɛ hinabariw ye. Ne bɛna o ta denw faran ka o bɔ ɲɔgɔn na Izirayɛli ta jamana ra, ka o yɛrɛgɛ ka taga jamana yɔrɔ bɛɛ.

⁸«Ayiwa, Zuda, ele balemaw bɛna ele le bonya. I bɛna i boro la i juguw tɔn kan, ka o kun biri fanga ra. I fadenw fana bɛna o kinbiri gban i kɔrɔ.

⁹Zuda bɛ i ko jarakanbelen le. Ne dencɛ, i bɔra fagarikɛyɔrɔ ra ka na! A bɛ a kinbiri turu, ka la i ko jara, i ko jaraba. Jɔn le bɛ sɔn k’a lawuri!

¹⁰Masacɛbere tɛna mabɔ Zuda ta gba ra fiyewu. Kuntigiya bere tɛna bɔ a boro ka ye, fɔ ka taga se kotigi [1] yɛrɛ nawagati ma. Siyaw bɛɛ bɛna o yɛrɛ majigi ale le ye.

¹¹Rɛzɛn bɛna caya fɔ a bɛ a ta fali siri rɛzɛnsun le ra, k’a ta falimuso den siri rɛzɛnsunw bɛɛ ra ɲumanman na. A bɛ a ta derege ko rɛzɛnji le ra, k’a ta deregeba ko rɛzɛnji ra.

¹²Rɛzɛnji bɛ a ɲa manamana tuma bɛɛ, nɔnɔ bɛ a ɲinw gbɛ a da ra.

¹³«Zabulɔn sigiyɔrɔ bɛna kɛ kɔgɔjida le ra, kurunbaw lɔyɔrɔ le bɛna kɛ a sigiyɔrɔ ye. A ta mara dan bɛna se fɔ Sidɔn dugu fan na.

¹⁴«Isakari ye fali barakaman le ye, a bɛ la bɛganw siyɔrɔ ra.

¹⁵A k’a ye ko a layɔrɔ laganfiyanin bɛ minkɛ, ko a yɔrɔ cɛ ka ɲi minkɛ, a tora yi kunkelen. A k’a kɔ bla donita kama, fɔ ka na kɛ tɔw ta jɔn ye, ka jagboyabaaraw kɛ tɔw ye.

¹⁶«Dan le bɛna sigi a ta mɔgɔw kunna ka o kiti tigɛ, ka kɛ i n’a fɔ Izirayɛli ta gba tɔw.

¹⁷Dan ye sa le ye, min bɛ la sira ra. Fɔnfɔnnin lo, min bɛ la mɔgɔw ɲa siradennin kan. A bɛ sow kin o sen na, fɔ sotigi bɛ yɛlɛma ka ben dugu ma.

¹⁸«E! Matigi Ala, ne jigi bɛ i ta dɛmɛri kan.

¹⁹«Gadi, mɔgɔ dɔw bɛna jɛn ka na ben i kan ko o bɛ i kɛrɛ, nka ele bɛna ben o kan ka o gbɛn.

²⁰«Asɛri, domunifɛn ɲumanman bɛna sɔrɔ i ta jamana le ra; ele le bɛna domuniɲumanw di masacɛw ma.

²¹«Nɛfitali bɛ i ko dagbɛ, min bɛ a yɛrɛ ma; a bɛ denɲumanw le woro.

²²«Yusufu bɛ i ko yiridenta min bɛ wurira kura ye, yiridenta min bɛ bununda ra. A yiriborow bɛ janya fɔ ka tɛmɛ kogo kunna.

²³Kalantigiw tugura a nɔ fɛ; o k’a bon ni o ta biɲɛw ye, o gbanna a ra kosɛbɛ.

²⁴Nka ale ta kalan tora a boro; Yakuba ta Ala fangatigi ka fanga don a borow ra. Ale Ala le ye Izirayɛli kɔrɔsibaga ye, ani Izirayɛli ta Ala barakaman.

²⁵I facɛ ta Ala, ale bɛna i dɛmɛ. Ala Sebɛɛtigi le bɛna baraka don i ra, ka sankolo ta baraka di i ma, ka dugukolo ta baraka di i ma, ka baraka don musow ra, ka denworo nɔgɔya o ye, ka baraka don bɛganw fana ra, ka o caya.

²⁶I facɛ ta dugawu tɛmɛna kuru banbariw ta kan; o dugawuw bɛna to i kan, ka mɛɛn, fɔ ka tɛmɛ kuruw si kan, kuru minw danna kabini fɔlɔfɔlɔ. O dugawu ye kɛ Yusufu kan, o dugawu bɛɛ ye to Yusufu kan, ale min kɛra a balemaw ta kuntigi ye.

²⁷«Boniyaminu ye wara le ye, a bɛ sogo mina k’a faga. Sɔgɔmada fɛ a bɛ sogo dɔ ɲimi, wulada fɛ, a ka min mina, a bɛ o taran.»

²⁸Ayiwa, Izirayɛli ta gba tan ni fla le ye nin mɔgɔw ye. O facɛ ka nin cirayakumaw le fɔ o ye, a dugawukɛtɔ. A ka dugawu kɛ o ye, bɛɛ ni i ta dugawu.

²⁹Ayiwa, o kɔ, Yakuba k’a fɔ a dencɛw ye ko: «Ne bɛna sa ka taga ne ta bɛmaw fɛ. Ni ne ka sa, kuruwo min bɛ Hɛtikacɛ Efurɔn ta foro ra, aw ye taga ne su don yi, ne ta bɛmaw kɛrɛ fɛ.

³⁰O kuruwo bɛ Makipela ta foro ra, Mamire ta yɔrɔ kɔrɔ, Kanaana jamana ra. Iburahima ka o foro le san Hɛtikacɛ Efurɔn fɛ, k’a kɛ sudonyɔrɔ ye.

³¹Iburahima ni a muso Saran su donna yi le. Isiyaka ni a muso Rebeka fana su donna yi. Ne le ka Leya su don yi fana.

³²O foro ni o kuruwo bɛɛ sanna Hɛti ta mɔgɔw fɛ.»

³³Ayiwa, Yakuba ka o kuma fɔ ka ban minkɛ, a k’a senw layɛlɛn lanan kan, ka la. A sara ka taga a bɛmaw fɛ.