Read Jula Samawilu ta kitabu flanan 1 Bible Online

Samawilu ta kitabu flanan 1 - Jula bible

Samawilu ta kitabu flanan 1

¹Sawuli sawagati k’a sɔrɔ Dawuda tun bɔra Amalɛkikaw kɛrɛyɔrɔ ra, ka sekɔ ka na Sikilagi dugu kɔnɔ. A tun ka tere fla kɛ Sikilagi ka ban.

²A tere sabanan, cɛ dɔ barara ka na; a tun bɔra Sawuli ta kɛrɛkɛjama sigiyɔrɔ ra. A ta faniw tun farannin bɛ, buguri bɛ a kun na. A sera Dawuda kɔrɔ minkɛ, a k’a yɛrɛ ben dugu ma k’a kinbiri gban Dawuda kɔrɔ.

³Dawuda k’a ɲininka ko: «Ele bɔra min le?» A ko: «Ne borira ka bɔ Izirayɛli ta kɛrɛkɛjama sigiyɔrɔ le ra.»

⁴Dawuda ko: «O tuma a kɛra cogo di? Ko min kɛra, o lakari ne ye kɛ!» Cɛ ko: «Izirayɛlimɔgɔw borira o kɛrɛkɛɲɔgɔnw ɲa. O caman fagara yɛrɛ le. Hali Sawuli ni a dencɛ Yonatan sara.»

⁵Dawuda ko kanbelen ma ko: «Ele kɛra cogo di k’a lɔn ko Sawuli ni a dencɛ Yonatan sara?»

⁶Kanbelen ko: «O wagati y’a sɔrɔ ne tun bɛ Giliboha kuru kan. Sawuli tun tintinnin bɛ a ta taman kan; nka sowotorow ni sotigiw nana tugu a kɔ k’a degu kosɛbɛ.

⁷A k’a ɲa munu ka ne ye minkɛ, a ka ne wele. Ne ko: ‹Naamu!›

⁸A ko ne ma ko: ‹Ele ye jɔn le ye?› Ne ko: ‹Ne ye Amalɛkika le ye.›

⁹A ko ne ma tuun ko: ‹Gbara ne ra, i ye na ne faga, sabu ne bɛ nin na, nka ɲanamini bɛ ne ra.›

¹⁰Ne gbarara a ra k’a faga, sabu ne tun k’a lɔn ko a tun tɛna kisi kɛrɛ ra tuun. Masafugula min tun bɛ a kun na, ani bororanɛgɛ min tun bɛ a boro ra, ne ka o bɔ ka na ni o ye, ka na o di ne matigicɛ ma.»

¹¹Dawuda k’a ta faniw faran; a ta mɔgɔ minw tun bɛ ni a ye, olugu fana ka o ta faniw faran.

¹²O jusukun tɔɔrɔra, o kasira; o ka sun don fɔ ka taga wula se, Sawuli ni a dencɛ Yonatan kosɔn, ani Matigi Ala ta kɛrɛkɛjama kosɔn, ani Izirayɛlimɔgɔ minw bɛɛ tun fagara o kɛrɛ ra.

¹³O kɔ, Dawuda ka o kanbelen ɲininka tuun ko: «Ele bɔra min le?» A ko: «Amalɛkika minw siginin bɛ yan lonanya ra, ne ye o dɔ ta den le ye.»

¹⁴Dawuda ko a ma ko: «A kɛra cogo di ko Matigi Ala ka mɔgɔ min ɲanawoloma k’a sigi masaya ra, ele ma siran ka i boro se o ma k’a faga?»

¹⁵Dawuda k’a nɔfɛkanbelen dɔ wele k’a fɔ o ye ko: «Gbara, i ye nin cɛ faga!» Kanbelen benna Amalɛkikacɛ kan, k’a faga.

¹⁶Dawuda tun k’a fɔ a ye ko: «I fagari kunko ye ben i yɛrɛ kan; i yɛrɛ da le ka i jaraki, sabu i ko, ko Matigi Ala ka mɔgɔ min ɲanawoloma k’a sigi masaya ra, ko ele ka o faga!»

¹⁷Dawuda ka nin sangadɔnkiri la Sawuli ni Yonatan kosɔn.

¹⁸O kɔ, Dawuda ko o ye Zuda mara mɔgɔw karan o dɔnkiri ra; o dɔnkiri le bɛ wele ko «kalan dɔnkiri.» A dɔnkiri sɛbɛnin bɛ Yasari ta kitabu kɔnɔ, ko:

¹⁹E, Izirayɛli, aw ta cɛfariw suw lanin bɛ kongoriw kan! Mun le nana a to aw ta cɛ jagbɛlɛnw benna ka sa?

²⁰Mɔgɔ kana nin ko fɔ Gati dugu kɔnɔ dɛ! Mɔgɔ kana nin kibaroya fɔ Asikalɔn dugu siraw fɛ! Ni o tɛ Filisika sunguruw bɛna na ɲagari; nin kɛnɛsigibariw ta sungurudenw bɛna na ninsɔndiya.

²¹E, Giliboha kuruw, gɔmiji kana bɔn aw kan tuun, sanji fana kana ben aw kan tuun fiyewu! Mɔgɔ kana foro sɛnɛ aw kan tuun, min siman bɛ ɲa! Sabu cɛfariw ta nɛgɛbɛnnanw lanɔgɔra aw le kan. Sawuli ta nɛgɛbɛnnan kɔni, o tɛna jɔsi ni turu ye tuun!

²²Yonatan ta kalan tun tɛ kɔsegi fiyewu, Sawuli ta kɛrɛkɛmuru tun tɛ kɔsegi ka na gbansan, ni o ma a juguw faga fɔ ka o jori woyo, ka cɛfariw sɔgɔ fɔ ka o baraka ban.

²³Sawuli ni Yonatan, kanuɲɔgɔnmanw tun lo o si bɛɛ ra; hali saya ra, o ma faran ka bɔ ɲɔgɔn na! O sen tun ka teri ka tɛmɛ bɔn kan, o baraka tun ka bon ka tɛmɛ hali jara ta kan.

²⁴E! Izirayɛli sungurudenw, aw ye kasi Sawuli kosɔn dɛ! Ale min tun bɛ aw fiyɛrɛbɔ ni fani dawulamanw ye, ka aw ta faniw masiri ni sanin ye.

²⁵Mun le k’a to cɛfariw benna ka sa, ka o to kɛrɛ ra sa? Mun le k’a to biɲɛ ka Yonatan sɔgɔ aw ta kongoriw kan?

²⁶E, ne balemacɛ Yonatan, ne deguninba lo ele kosɔn; i ko tun ka gbɛlɛn ne ma dɛ! I ta kanuya tun ka bon ne fɛ ka tɛmɛ hali musow ta kanuya kan.

²⁷Mun le k’a to cɛ jagbɛlɛnw bɛɛ benna sa? Mun le k’a to kɛrɛkɛminanw bɛɛ halakira sa?