Read Jula Kibaroyaw ta kitabu fɔlɔ 14 Bible Online

Kibaroyaw ta kitabu fɔlɔ 14 - Jula bible

Kibaroyaw ta kitabu fɔlɔ 14

¹Tiri masacɛ Hiramu ka mɔgɔ dɔw ci ka taga Dawuda fɛ ni sɛdiriyiriw ye; a ka kabakurulɛsɛbagaw, ani yirilɛsɛbaga dɔw fana ci ka taga, janko o ye taga masaso dɔ lɔ Dawuda ye.

²O ra, Dawuda k’a ye ko Matigi Ala ka ale sigi masaya ra Izirayɛli jamana kunna; a k’a ye fana ko Ala bɛ ale ta masaya nɔɔrɔ bonyara lon o lon a ta mɔgɔw kosɔn, minw ye Izirayɛlimɔgɔw ye.

³Ayiwa, Dawuda ka muso wɛrɛw furu tuun Zeruzalɛmu, ka dencɛw, ani denmuso wɛrɛw sɔrɔ.

⁴A ka dencɛ minw sɔrɔ Zeruzalɛmu, olugu tɔgɔw ye nin ye: Samuha, ani Sobabu, ani Natan, ani Sulemani,

⁵ani Ibari, ani Elisuwa, ani Elipelɛti,

⁶ani Noga, ani Nefɛgi, ani Yafiya,

⁷ani Elisama, ani Beliyada, ani Elifelɛti.

⁸Ayiwa, Filisikaw nana a mɛn ko o ka turu saninman* kɛ Dawuda kun na k’a kɛ Izirayɛli jamana bɛɛ masacɛ ye. O ta kɛrɛkɛjamaw bɛɛ lajɛnnin wurira ka taga Dawuda yɔrɔɲini ko o b’a kɛrɛ. Dawuda ka o mɛn minkɛ, a bɔra ka taga o kunbɛn.

⁹Filisikaw nana ka na Refayikaw ta kɛnɛgbɛyɔrɔ bɛɛ fa.

¹⁰Dawuda ka Matigi Ala ɲininka ko: «Yala ne ka kan ka taga Filisikaw kama wa? Yala i bɛna o don ne boro wa?» Matigi Ala ka Dawuda jaabi ko: «Taga o kɛrɛ, sabu ne bɛna o don i boro.»

¹¹O tagara Baali Perasimu; Dawuda ka Filisikaw kɛrɛ o yɔrɔ ra ka se o ra. Dawuda ko: «Ala k’a to ne ka ne juguw bugɔ ka o ben, i n’a fɔ jiba bɛ kogo kari ka ben ka wo bɔ a ra cogo min na.» O kosɔn o ka o yɔrɔ tɔgɔ la ko Baali Perasimu, ko: «Matigi min bɛ wo bɔ.»

¹²Filisikaw borira ka o ta batofɛnw to o yɔrɔ ra. Dawuda k’a fɔ a ta mɔgɔw ye ko o ye o jɛni.

¹³O kɔ, Filisikaw nana tuun, ka na Refayikaw ta kɛnɛgbɛyɔrɔ bɛɛ fa.

¹⁴Dawuda ka Matigi Ala ɲininka tuun; Matigi Ala k’a fɔ a ye ko: «I kana taga o kɔ fɛ ka taga ben o kan. Dogo ka o munumunu ka; muriyesunw bɛ yɔrɔ min na, i bɛ taga ben o kan o yɔrɔ ɲa fɛ.

¹⁵Ni i nana kɛ senkan dɔw mɛn ye muriyesunw san fɛ, o tuma i ye bɔ ka taga o kɛrɛ, sabu Matigi Ala le bɛ tagara i ɲa fɛ, ka taga Filisikaw ta kɛrɛkɛjama kɛrɛ.»

¹⁶Matigi Ala ka min fɔ, Dawuda k’a kɛ ten; o ka Filisikaw kɛrɛ ka se sɔrɔ o kan, k’a ta Gabahɔn, ka taga a bla fɔ Gezɛri.

¹⁷Dawuda tɔgɔ bɔra ka se jamanaw bɛɛ ra; Matigi Ala ka Dawuda ɲasiran bla siya tɔw bɛɛ ra.