Read Jula Kibaroyaw ta kitabu fɔlɔ 16 Bible Online

Kibaroyaw ta kitabu fɔlɔ 16 - Jula bible

Kibaroyaw ta kitabu fɔlɔ 16

¹Ayiwa, Izirayɛlimɔgɔw tagara Ala ta jɛnɲɔgɔnya kɛsu* ta; Dawuda tun ka fanibon min lalaga ka o kɛ a blayɔrɔ ye, o tagara a bla yi. O ka saraka jɛnitaw* ani ninsɔndiya sarakaw* bɔ Matigi Ala ye.

²Dawuda ka o saraka jɛnitaw, ani o ninsɔndiya sarakaw bɔ ka ban tuma min na, a ka dugawu kɛ jama ye Matigi Ala tɔgɔ ra.

³O kɔ, a ka burukun kelen, ani tamaroburu kelen, ani rɛzɛnburu kelen di Izirayɛlimɔgɔw bɛɛ kelen kelen ma, cɛ fara muso kan.

⁴Dawuda ka Levi* ta mɔgɔ dɔw ɲanawoloma, ka olugu bla Matigi Ala ta jɛnɲɔgɔnya kɛsu baara ra, ko olugu ye to ka Matigi Ala, Izirayɛli ta Ala daari, ka baraka la a ye, ani k’a tando.

⁵Asafu le tun ye olugu ta ɲamɔgɔ ye, ka Jakariya gban ale ra, ani Yeyɛli, ani Simiramɔti, ani Yehiyɛli, ani Matitiya, ani Eliyabu, ani Benaya, ani Obɛdi Edɔmu, ani Yeyɛli. Olugu le tun ye korafɔbagaw, ani gɔnifɔbagaw ye. Asafu tun bɛ siranɛgɛ tɛgɛrɛw le fɔ.

⁶Sarakalasebaga* minw tun ye Benaya ni Yahaziyɛli ye, olugu tun bɛ buruw le fiyɛ wagati bɛɛ Ala ta jɛnɲɔgɔnya kɛsu ɲa fɛ.

⁷O lon le kɛra a siɲaga fɔlɔ ye, Dawuda ka nin barakalaridɔnkiri yira, ko Asafu ni a balemaw ye a la, ka Matigi Ala bonya:

⁸E, aw ye Matigi Ala fo k’a waleɲumanlɔn, aw y’a tɔgɔ wele, aw ye a ta kabakobaw ko fɔ siya tɔw ye.

⁹Aw ye dɔnkiri la a ye, aw ye tandori dɔnkiriw la a ye; aw ye a ta koɲumanbaw bɛɛ ko fɔ mɔgɔw ye.

¹⁰Aw ye ɲagari a tɔgɔ saninman kosɔn; minw bɛ Matigi Ala ta jɛnɲɔgɔnya ɲini, olugu jusu ye ninsɔndiya!

¹¹Aw ye Matigi Ala ta jɛnɲɔgɔnya ɲini, k’a ta baraka ɲini; aw ye gbara a ra wagati bɛɛ!

¹²A ka koɲumanba minw kɛ, aw ye aw hakiri to o ra, a ka kabako minw kɛ, ani a ka ko minw latigɛ, aw ye aw hakiri to o ra,

¹³aw minw ye a ta jɔn Izirayɛli ta durujaw ye, aw minw ye a ta mɔgɔ ɲanawolomaninw ye, Yakuba ta denw!

¹⁴Ale le ye Matigi Ala ye, an ta Ala. A ta fangatigiya bɛ dugukolo yɔrɔ bɛɛ kan.

¹⁵Aw ye aw hakiri to a ta jɛnɲɔgɔnya ra wagati bɛɛ; a ka o kuma minw fɔ duruja caman ye,

¹⁶a ka jɛnɲɔgɔnya min don ni Iburahima ye, ani a karira min na ni Isiyaka ye,

¹⁷a kɔsegira o kuma le kan, ka o kɛ sariya ye k’a di Yakuba ma, ka o kɛ jɛnɲɔgɔnya wuribari ye ka o di Izirayɛli ma.

¹⁸A ko o ma ko: «Ne bɛna Kanaana jamana di aw le ma, ka o kɛ aw ninyɔrɔ ye, ka o kɛ aw ta ye.»

¹⁹O wagati ra, o tun ye mɔgɔ dama dama dɔrɔn ye, o tun man ca, o tun bɛ lonanya ra o dugukolo kan,

²⁰o tun bɛ yaala siyaw ni ɲɔgɔn cɛ, ka bɔ jamana dɔ ra ka taga dɔ ra.

²¹Ala ma sɔn mɔgɔ si ye o minako juguya, a ka masa dɔw dɔgɔya o kosɔn.

²²A ko: «Aw kana maga ne ta mɔgɔ ɲanawolomaninw na dɛ! Aw kana kojugu si kɛ ne ta ciraw ra!»

²³Dunuɲamɔgɔw bɛɛ ye dɔnkiri la ka Matigi Ala tando! Aw ye a fɔ lon o lon, ko ale le ye an kisibaga ye.

²⁴Aw ye a ta bonya lakari siyaw bɛɛ ye, aw ye a ta kobaw lakari mɔgɔw bɛɛ ye.

²⁵Sabu Matigi Ala ka bon, a ka kan ni tandori ye kosɛbɛ; an ka kan ka siran a ɲa ka tɛmɛ batofɛn tɔw bɛɛ kan.

²⁶Siya tɔw ta alaw ye batofɛn gbansanw le ye, nka Matigi Ala le ka sankolo dan.

²⁷Bonya ni nɔɔrɔ ye ale ta le ye, sebagaya ni hɛra bɛ sɔrɔ a ta so kɔnɔ.

²⁸Dunuɲa siyaw bɛɛ, aw ye bonya ni fanga di Matigi Ala ma, aw y’a di Matigi Ala ma.

²⁹Aw ye bonya la Matigi Ala tɔgɔ kan, aw ye na ni sarakaw ye Matigi Ala ɲa kɔrɔ, aw ye saninya ka na aw kinbiri gban Matigi Ala ɲa kɔrɔ.

³⁰Dunuɲamɔgɔw bɛɛ lajɛnnin ye siran Matigi Ala ɲa fɔ ka yɛrɛyɛrɛ; ɔnhɔn, dugukolo b’a nɔ ra, a tɛ jɛngɛ ka bɔ a nɔ ra ka ye.

³¹Sankolokɔnɔfɛnw ye ɲagari! Dugukolokanfɛnw ye ninsɔndiya, k’a fɔ siyaw bɛɛ ye ko: «Matigi Ala le ye Masa ye!»

³²Kɔgɔji ni a kɔnɔfɛnw bɛɛ ye mankanba bɔ! Kongokɔnɔyɔrɔw, ani kongokɔnɔfɛnw bɛɛ ye ɲagarikanba bɔ!

³³Kongoyiriw bɛɛ ye ɲagari, ka dɔnkiri la Matigi Ala ɲa kɔrɔ, sabu a bɛ nana ka na dunuɲamɔgɔw ta kiti tigɛ!

³⁴Aw ye Matigi Ala fo k’a waleɲumanlɔn, sabu a ka ɲi, a ta ɲumanya tɛ ban ka ye.

³⁵Aw y’a fɔ fana ko: «E, an kisibaga Ala, an kisi! An lajɛn ka bɔ siyaw cɛ ra, ka an bɔsi janko an ye i fo ka i waleɲumanlɔn i tɔgɔ saninman kosɔn, ka an ta bonya kun kɛ ele tandori ye.»

³⁶Matigi Ala, Izirayɛli ta Ala, baraka, wagati bɛɛ, ani tuma bɛɛ! O tuma jama bɛɛ lajɛnnin k’a fɔ ko: «Amina!» O ka Matigi Ala tando.

³⁷O ra Dawuda ka Asafu ni a balemaw to Matigi Ala ta jɛnɲɔgɔnya kɛsu ɲa fɛ, ko o ye to ka o baara kɛ jɛnɲɔgɔnya kɛsu ɲa fɛ wagati bɛɛ; lon o lon baara minw tun ka kan ka kɛ, o tun bɛ o kɛ.

³⁸A ka Obɛdi Edɔmu ni a balemacɛ biwɔɔrɔ ni seegi fara olugu kan; nka Obɛdi Edɔmu min tun ye Yedutun dencɛ ye, ale ni Hosa, olugu tun ye dakɔrɔsibagaw le ye.

³⁹O kɔ, Matigi Ala ta fanibon min tun bɛ Gabahɔn kongori kunna, Dawuda ka sarakalasebaga* Sadɔki ni a balema sarakalasebaga tɔw bla ka taga o yɔrɔ ra,

⁴⁰janko o ye to ka saraka jɛnitaw bɔ Matigi Ala ye, sarakajɛnifɛn* kan wagati bɛɛ, sɔgɔma ni wula fɛ; min bɛɛ sɛbɛra Matigi Ala ta sariya ra, a ka o sariya min di Izirayɛlimɔgɔw ma, o tun b’a kɛ ka kaɲa ni o le ye.

⁴¹Heman ni Yedutun tun bɛ ni o mɔgɔw ye, ani mɔgɔ tɔ minw tɔgɔ fɔra, ko o ye to ka baraka la Matigi Ala ye, sabu a ta ɲumanya tɛ ban ka ye.

⁴²Heman ni Yedutun, olugu tun bɛ buruw fiyɛ, ka siranɛgɛ tɛgɛrɛw fɔ, ani fɔrifɛn tɔw, ka dɔnkiriw lamina ka Ala bonya.

⁴³Ayiwa, o kɔ, mɔgɔw tagara o ta so; Dawuda fana tagara a ta so, ka taga dugawu kɛ a ta somɔgɔw ye.