Read Jula Kibaroyaw ta kitabu fɔlɔ 29 Bible Online

Kibaroyaw ta kitabu fɔlɔ 29 - Jula bible

Kibaroyaw ta kitabu fɔlɔ 29

¹Masacɛ Dawuda k’a fɔ jama bɛɛ lajɛnnin ye ko: «Ala ka ne dencɛ Sulemani min kelen ɲanawoloma, ale belen ye den le ye, a ma deri nin baara ɲɔgɔn na fana, k’a sɔrɔ baaraba lo, sabu nin so tɛ mɔgɔ ta ye, Masa Ala ta lo.

²Ne kɔni ka ne seko bɛɛ kɛ ka ne ta Ala ta so ta minanw labɛn: baara min ka kan ka kɛ ni sanin ye, o bɛ kɛ ni sanin ye, min ka kan ka kɛ ni warigbɛ ye, o bɛ kɛ ni warigbɛ ye, min ka kan ka kɛ ni siranɛgɛ ye, o bɛ kɛ ni siranɛgɛ ye, min ka kan ka kɛ ni nɛgɛfin ye, o bɛ kɛ ni nɛgɛfin ye, min ka kan ka kɛ ni yiri ye, o bɛ kɛ ni yiri ye; onikisi lulu fana bɛ yi, ani lulu minw bɛna don bon kogow ra, ani lulu finman, ani lulu cɛɲuman suguya bɛɛ, ani kabakuru gbɛman cɛɲuman camanba.

³Ka fara o bɛɛ kan, Ala ta so kanuya kosɔn, ne yɛrɛ ta naforo, a sanin ni a warigbɛ, ne bɛ o di ne ta Ala ta so lɔri kama, ka o fara fɛn tɔw bɛɛ kan, ne ka minw labɛn ka ban Ala ta so saninman kosɔn;

⁴ne bɛ Ofiri sanin tɔni kɛmɛ di, ani warigbɛ yɛrɛworo tɔni kɛmɛ fla ni bilooru, ka o lala so kogow kan;

⁵baara minw ka kan ka kɛ ni sanin ye, o bɛ kɛ ni sanin ye, minw ka kan ka kɛ ni warigbɛ ye, o bɛ kɛ ni warigbɛ ye, ani baaradenw bɛna baara minw bɛɛ kɛ. Ayiwa, jɔn le b’a fɛ k’a borofɛn di bi a yɛrɛ sago ma ni a jusukun bɛɛ ye Matigi Ala ta baara kosɔn?»

⁶Ayiwa, gbatigiw, ani Izirayɛli ta maraw ta kuntigiw, ani kɛrɛkuntigi minw bɛ cɛ waga kelen kelen kunna, ani minw bɛ cɛ kɛmɛ kɛmɛ kunna, ani masacɛ ta baaraden kuntigiw, olugu bɛɛ ka o borofɛnw di o yɛrɛ sago ma.

⁷O ka sanin tɔni kɛmɛ ni biwolonfla di, ani sanin kisɛ waga tan, ani warigbɛ tɔni kɛmɛ saba ni dɔɔnin, ani siranɛgɛ tɔni kɛmɛ wɔɔrɔ ɲɔgɔnna, ani nɛgɛfin tɔni waga saba ni dɔɔnin.

⁸Luluw tun bɛ minw fana fɛ, olugu ka o bla Matigi Ala ta so naforoblayɔrɔ ra; Yeyɛli min tun ye Gɛrisɔn ta mɔgɔ dɔ ye, ale le tun ye o naforow marabaga ye.

⁹Jama tun ka o fɛn minw di o yɛrɛ sago ma, o ko ka o yɛrɛ jusu diya, sabu o tun ka o fɛnw di o yɛrɛ sago le ma ni o jusukun bɛɛ ye Matigi Ala ma. O ko ka masacɛ Dawuda yɛrɛ jusu diya kosɛbɛ.

¹⁰Ayiwa, Dawuda ka baraka la Matigi Ala ye jama bɛɛ lajɛnnin ɲa na; Dawuda ko: «An bɛ baraka la i ye wagati bɛɛ, ani tuma bɛɛ, Matigi Ala, an fa Izirayɛli ta Ala,

¹¹Matigi Ala, bonya ni sebagaya ni cɛɲa, ani nɔɔrɔ ni fangatigiya ye ele le ta ye; sabu fɛn o fɛn bɛ sankolo kɔnɔ, ani dugukolo kan, o bɛɛ ye i ta ye, Matigi Ala. Masaya fana ye ele le ta ye, Matigi Ala; ele le bɛ fɛn bɛɛ kunna.

¹²Fɛntigiya ni bonya bɛ bɔ ele le fɛ; ele le bɛ fɛn bɛɛ kunna. Fanga ni sebagaya bɛ ele le boro, ele boro le fana bɛ se ka fɛn bɛɛ labonya, ka baraka don fɛn bɛɛ ra.

¹³Sisan, an ta Ala, an bɛ i fo, ka i tando i tɔgɔ bonya kosɔn;

¹⁴sabu ne ye jɔn le ye, ani ne ta mɔgɔw ye jɔn le ye, ko an bɛ se ka fɛn bɔ an yɛrɛ ra k’a di i ma? Fɛn bɛɛ bɛ bɔ ele le fɛ; an ka min di i ma, ele yɛrɛ boro le ka o di an ma.

¹⁵«An ye lonanw le ye i ɲa kɔrɔ, an ye tɛmɛbagaw le ye, i n’a fɔ an bɛmaw bɛɛ tun bɛ cogo min na. An si teredaw bɛ tɛmɛ dugukolo kan i ko suma bɛ tɛmɛ cogo min na; jigiya tɛ yi.

¹⁶Matigi Ala, an ta Ala, an ka nin naforo caman minw bɛɛ lajɛn ko an bɛ so lɔ i ye i tɔgɔ saninman kosɔn, ele yɛrɛ boro le ka o fɛnw bɛɛ di an ma, a bɛɛ ye i yɛrɛ ta le ye.

¹⁷Ne ta Ala, ne k’a lɔn ko i bɛ mɔgɔ jusukun sɛgɛsɛgɛ, sabu jusukun terennin le ka di i ye. O kosɔn ne ka nin fɛnw bɛɛ di i ma ne yɛrɛ sago ma ni jusukun terennin le ye; ne fana bɛ ɲagari k’a ye ko sisan i ta mɔgɔ minw bɛ yan, ko olugu fana ka o borofɛnw di i ma o yɛrɛ sago ma.

¹⁸Matigi Ala, an bɛmaw Iburahima, ani Isiyaka, ani Izirayɛli ta Ala, a to nin ŋaninyaɲuman ani nin miiriya ye to i ta mɔgɔw jusukun na wagati bɛɛ, k’a to i miiriya ye to o jusukun na.

¹⁹A to ne dencɛ Sulemani ye i ta kumaw ani i ta ciw, ani i ta cifɔninw bɛɛ sira tagama ni a jusukun bɛɛ ye, k’a bɛɛ kɛ, janko ne ka nin fɛnw bɛɛ labɛn masaso min lɔri kama, a ye se ka o lɔ.»

²⁰Dawuda k’a fɔ jama bɛɛ lajɛnnin ye ko: «Aw ye baraka la Matigi Ala ye, aw ta Ala!» Jama bɛɛ ka baraka la Matigi Ala ye, o bɛmaw ta Ala. O ka o kinbiri gban ka o ɲa biri dugu ma Matigi Ala ɲa kɔrɔ, ani masacɛ ɲa kɔrɔ.

²¹O ka ninsɔndiya sarakaw* bɔ, ka saraka jɛnitaw* bɔ Matigi Ala ye o lon dugusagbɛ; o ka misitoran waga kelen kɛ saraka ye, ani sagajigi waga kelen, ani sagaden waga kelen, a bɛɛ ni a ta rɛzɛnji saraka*; o ka saraka caman wɛrɛ bɔ Izirayɛlimɔgɔw bɛɛ ye.

²²O ka domuni kɛ ka min o lon na Matigi Ala ɲa kɔrɔ o jusu diyaninba. O ka Dawuda dencɛ Sulemani sigi masaya ra a siɲaga flanan na, ka turu kɛ a kun na Matigi Ala ɲa kɔrɔ, k’a kɛ o ta ɲamɔgɔ ye, ka Sadɔki fana kɛ sarakalasebaga* ye.

²³Sulemani sigira o cogo le ra Matigi Ala ta masasiginan kan, ka kɛ masacɛ ye a facɛ Dawuda nɔ ra; a ta masaya fana diyara a ra. Izirayɛlimɔgɔw bɛɛ tun bɛ a kan mina.

²⁴Jamana ɲamɔgɔw, ani kɛrɛkɛdenw, hali masacɛ Dawuda yɛrɛ dencɛ tɔw bɛɛ tun ka o yɛrɛ majigi masacɛ Sulemani ye.

²⁵Matigi Ala ka bonyaba la Sulemani kan Izirayɛlimɔgɔw bɛɛ ɲa kɔrɔ; masacɛ minw bɛɛ sigira masaya ra Izirayɛli jamana ra a ɲa fɛ, Matigi Ala k’a ta masaya dawula bonya ka tɛmɛ olugu bɛɛ ta kan.

²⁶Ayiwa, Yese dencɛ Dawuda tun sigira fanga ra Izirayɛli jamana bɛɛ kunna.

²⁷A ka san binaani le kɛ masaya ra Izirayɛli jamana kunna. A ka san wolonfla kɛ Heburɔn, ka san bisaba ni saba kɛ Zeruzalɛmu.

²⁸A kɔrɔra hɛra ra, ka kɔrɔya fɔ ka sijan sɔrɔ, ani naforo ni bonya. A dencɛ Sulemani sigira masaya ra a nɔ ra.

²⁹Masacɛ Dawuda ta kɛwalew bɛɛ, k’a ta a damina ra, ka taga a bla a laban na, o bɛɛ sɛbɛnin bɛ flɛrikɛbaga Samawilu ta sɛbɛw kɔnɔ, ani cira Natan ta sɛbɛw, ani flɛrikɛbaga Gadi ta sɛbɛw.

³⁰A ta masaya ta wagati ta kow bɛɛ, ani a ta cɛfariya, ani fɛn o fɛn kɛra a yɛrɛ ra, ani Izirayɛli jamana ra, ani min kɛra jamana tɔw ra, o bɛɛ sɛbɛra yi.