Read Jula Zaburuw kitabu 116 Bible Online

Zaburuw kitabu 116 - Jula bible

Zaburuw kitabu 116

¹Ne bɛ Matigi Ala kanu, sabu a bɛ ne ta makarikanw lamɛn,

²sabu a b’a toro malɔ ka ne lamɛn; o kosɔn, ne bɛna a daari ne si bɛɛ ra.

³Saya ta sirinanw tun melegera ne ra ka ban, kaburu jatigɛ tun ka ne mina ka ban, degu ni jusukasi tun sera ne ma.

⁴Nka ne ka Matigi Ala tɔgɔ wele, ko: «E, Matigi Ala, ne nin kisi!»

⁵Matigi Ala bɛ makari, a terennin lo; an ta Ala bɛ hina.

⁶Matigi Ala b’a janto mɔgɔ majigininw na; ne tun dɛsɛra, a ka ne kisi.

⁷Ne nin, sekɔ i ta laganfiya ra tuun, sabu Matigi Ala ka koɲuman kɛ i ye.

⁸Can lo, i ka ne nin kisi ka bɔ saya ra, ka ne ɲa kisi ɲajibɔ ma, ka ne sen kisi talon ma.

⁹O ra, ne bɛna tagama Matigi Ala ɲa kɔrɔ ni mɔgɔ ɲanaman tɔw ye, dunuɲa ra yan.

¹⁰Ne jigi tun bɛ Ala kan, hali tuma min ne tun b’a fɔra ko ɲani bɛ ne kan kosɛbɛ.

¹¹Ne jusu gbannin le tun b’a fɔra ko mɔgɔ bɛɛ ye faninyafɔbaga le ye.

¹²Matigi Ala ka koɲuman minw bɛɛ kɛ ne ye, ne bɛna a waleɲumanlɔn o bɛɛ ra cogo di sa?

¹³Ne bɛna jifiyɛ kɔrɔta, ka o kɛ ne ta kisiri tagamasiyɛn ye, ka Matigi Ala tɔgɔ wele.

¹⁴Ne ka dajuru minw ta Matigi Ala fɛ, ne bɛna o dafa, a ta jama bɛɛ lajɛnnin ɲa kɔrɔ.

¹⁵Alaɲasiranbagaw ta saya ko ka bon Matigi Ala fɛ kosɛbɛ.

¹⁶E, Matigi Ala, ne ye i ta jɔn le ye, ne ye i ta jɔn le ye, ne ye i ta jɔnmuso dencɛ le ye. Ele le ka ne bɔsi ka bɔ ne ta sirinanw bɛɛ ra.

¹⁷O kosɔn ne bɛna ɲumanlɔn saraka* bɔ i ye, ne bɛna Matigi Ala tɔgɔ wele.

¹⁸Ne ka dajuru minw ta Matigi Ala fɛ, ne bɛna o dafa a ta jama bɛɛ lajɛnnin ɲa kɔrɔ,

¹⁹Matigi Ala ta batoso lu kɔnɔ, ele Zeruzalɛmu dugu yɛrɛ kɔnɔ! Aw ye Matigi Ala tando!