Read Jula Zaburuw kitabu 118 Bible Online

Zaburuw kitabu 118 - Jula bible

Zaburuw kitabu 118

¹aw ye Matigi Ala fo k’a waleɲumanlɔn, sabu a ka ɲi, a ta ɲumanya tɛ ban ka ye.

²Izirayɛli y’a fɔ ko: «Sabu a ta ɲumanya tɛ ban ka ye!»

³Haruna ta somɔgɔw y’a fɔ ko: «Sabu a ta ɲumanya tɛ ban ka ye!»

⁴Matigi Ala ɲasiranbagaw y’a fɔ ko: «Sabu a ta ɲumanya tɛ ban ka ye!»

⁵Ka ne degunin to, ne ka Matigi Ala wele, Matigi Ala ka ne jaabi, a ka ne laganfiya.

⁶Matigi Ala bɛ ne fɛ, ne tɛ siran foyi ɲa; adamadenw bɛ se ka mun le kɛ ne ra?

⁷Matigi Ala bɛ ne fɛ, ale le ye ne dɛmɛbaga ye; ne bɛna ne ɲa lɔ ne kɔninyabagaw ra ka o bentɔ flɛ.

⁸Ka i yɛrɛ karifa Matigi Ala ma, o ka fisa sani i ye i jigi la adamaden kan.

⁹Ka i yɛrɛ karifa Matigi Ala ma, o ka fisa sani i ye i jigi la fagamaw kan.

¹⁰Siya tɔw bɛɛ tun ka ne lamini, nka Matigi Ala tɔgɔ baraka ra, ne ka o halaki.

¹¹O tun ka ne lamini, fɔ ka ne datugu, nka Matigi Ala tɔgɔ baraka ra, ne ka o halaki.

¹²O tun ka ne lamini fan bɛɛ ra i ko lidenw, nka o fagara i ko ŋanitasuma; Matigi Ala tɔgɔ baraka ra, ne ka o halaki.

¹³O tun bɛ ne ɲɔnina ni baraka ye, janko ka ne laben, nka Matigi Ala ka ne dɛmɛ.

¹⁴Matigi Ala le bɛ baraka di ne ma, ne bɛ dɔnkiri la ale le ye, ale le kɛra ne ta kisiri tigi ye.

¹⁵Mɔgɔ terenninw ɲagarikan bɛ bɔra o ta sow kɔnɔ, sabu Matigi Ala ka o kisi. Matigi Ala boro barakaman bɛ kobaw kɛ.

¹⁶Matigi Ala boro barakaman kɔrɔtanin lo! Matigi Ala boro barakaman bɛ kobaw kɛ.

¹⁷Ne tɛna sa, ne bɛna ɲanamanya, janko ka Matigi Ala ta kow lakari.

¹⁸Matigi Ala ka ne koro kosɛbɛ, nka a ma ne labla saya ye.

¹⁹Aw ye terenninya dondaw [1] dayɛlɛ ne ye; ne bɛna don o daw fɛ ka taga Matigi Ala fo k’a waleɲumanlɔn.

²⁰Matigi Ala ta donda ye nin ye; mɔgɔ terenninw bɛ don o le fɛ.

²¹Matigi Ala, ne bɛna i fo ka i waleɲumanlɔn sabu i ka ne jaabi, sabu i kɛra ne ta kisiri sababu ye.

²²Bonlɔbagaw banna kabakuru min na, o le nana kɛ kabakuru sɔbɛman ye, ka kɛ bon kabakuru fɔlɔ [2] ye.

²³O kow bɛɛ bɔra Matigi Ala yɛrɛ le ra, o kɛra kabako ye an ɲa na.

²⁴Nin ye Matigi Ala yɛrɛ ta lon le ye, an ye ɲagari ka ninsɔndiya nin lon na.

²⁵E, Matigi Ala, sabari, i ye an kisi! Matigi Ala, sabari, i y’a to an ye se sɔrɔ!

²⁶Min bɛ nana Matigi Ala tɔgɔ ra, dugawu ye kɛ o ye! An bɛ to Matigi Ala ta so kɔnɔ ka dugawu kɛ aw ye!

²⁷Matigi Ala le ye Ala ye, ale le ka yeelen bɔ an ye. Aw ye na ɲanagbɛ ra ni yiriborow ye aw boro, ka taga se fɔ sarakabɔnan gbanw kɔrɔ!

²⁸Ele le ye ne ta Ala ye, ne bɛ i fo ka i waleɲumanlɔn! Ne ta Ala, ne bɛ i tɔgɔ kɔrɔta.

²⁹Aw ye Matigi Ala fo k’a waleɲumanlɔn, sabu a ka ɲi, a ta ɲumanya tɛ ban ka ye.