Read Jula Zaburuw kitabu 119 Bible Online

Zaburuw kitabu 119 - Jula bible

Zaburuw kitabu 119

¹Minw bɛ tagama ni jusukun gbɛnin ye, minw bɛ tagama ka kaɲa ni Matigi Ala ta sariya ye, olugu ta ɲana. [1]

²Minw bɛ a ta ciw sira tagama, minw b’a yɔrɔɲini ni o jusukun bɛɛ ye, olugu ta ɲana.

³Olugu kɔni tɛ terenbariyako kɛ, o bɛ Ala ta sira le tagama.

⁴I ka i ta sariya ta kumaw yira an na, janko an y’a sira tagama ka ɲa.

⁵A to ne tagamacogo ye ɲa, janko ne ye i ta cifɔninw sira tagama.

⁶Ni o kɛra, ni ne ka i ta kumaw bɛɛ jate mina, ne tɛna maroya.

⁷Ne bɛna i fo ka i waleɲumanlɔn ni jusukunɲuman ye, ka to ka i ta kolatigɛninw karan, sabu o terennin lo.

⁸Ne b’a fɛ ka i ta cifɔninw sira tagama, o ra, i kana ban ne ra fiyewu!

⁹Kanbelen bɛ se ka a tagamacogo saninya cogo di? Ni a bɛ tagama ka kaɲa ni i ta kuma ye.

¹⁰Ne bɛ i ta jɛnɲɔgɔnya ɲini ni ne jusukun bɛɛ ye, i kana a to ne ye jɛngɛ ka i ta kumaw sira bla.

¹¹Ne bɛ i ta darakuma mara ka ɲa ne jusukun na, janko ne kana na i hakɛ ta.

¹²E, Matigi Ala, i baraka! Ne karan i ta cifɔninw na.

¹³I da ka kolatigɛnin minw fɔ, ne bɛ o bɛɛ fɔ kelen kelen.

¹⁴Ka i ta ciw sira tagama, o bɛ ne ninsɔndiya, k’a kɛ i n’a fɔ naforoba le bɛ ne boro.

¹⁵Ne bɛ to ka miiri i ta sariya ta kumaw ra; ne bɛ ne ɲa lɔ i ta siraw le ra.

¹⁶I ta cifɔninw ko le ka di ne ye kosɛbɛ; ne tɛ ɲina i ta kuma kɔ.

¹⁷Koɲuman kɛ i ta jɔn ye, janko ne ye si sɔrɔ, ka i ta kuma sira tagama!

¹⁸Ne ɲa yɛlɛ, janko koɲumanba minw bɛ i ta sariya ra, ne ye o flɛ!

¹⁹Ne ye lonan le ye dugukolo kan yan; i kana i ta kumaw dogo ne ma.

²⁰I ta kolatigɛninw lɔgɔ bɛ ne ra tuma bɛɛ, fɔ ne jusukun bɛ kɔrɔtɔ o ma.

²¹I bɛ yɛrɛyirabagaw dɔgɔya, o mɔgɔ danganin minw bɛ o yɛrɛ mabɔ i kumakan na.

²²O ta mafiyɛnyari ni o ta dɔgɔyari bɔ ne kunna, sabu ne bɛ i ta ciw sira tagama.

²³Hali ni kuntigiw ka janfa siri ne kama, i ta jɔn bɛ miiri i ta cifɔninw le ra.

²⁴I ta ciw ko le ka di ne ye kosɛbɛ, olugu le bɛ ne ladi.

²⁵Ne lanin flɛ dugu ma, buguri ra! A to ne ye ɲanamanya tuun ka kaɲa ni i ta kuma ye!

²⁶Ne ka ne ta kow ɲafɔ i ye, i ka ne jaabi; ne karan i ta cifɔninw na.

²⁷A to ne ye i ta sariya ta kumaw faamu, janko ne ye i ta kabakow jate mina.

²⁸Ne bɛ kasi jusukasi kosɔn; ne lawuri ka kaɲa ni i ta kuma ye.

²⁹Faninyasira mabɔ ne ra, makari ne ra k’a to ne ye i ta sariya sira tagama!

³⁰Ne ka kankelentigiya sira le ta; ne bɛ tagama ka kaɲa ni i ta kolatigɛninw le ye.

³¹Ne bɛ nɔrɔ i ta ciw le ra k’a sira tagama. E, Matigi Ala, i kana a to ne ye maro.

³²Ne bɛ bori i ta kumakanw le kɔ, sabu i bɛ faamuri di ne ma.

³³Matigi Ala, ne karan i ta cifɔninw na, janko ne ye o sira tagama ka se fɔ a laban ma!

³⁴Faamuri di ne ma, janko ne ye to i ta sariya kan, k’a sira tagama ni ne jusukun bɛɛ ye!

³⁵I ta kuma sira yira ne ra, sabu a ka di ne ye.

³⁶Ne jusukun jɛngɛ ka taga i ta ciw fan fɛ, a kana taga nafa fan fɛ.

³⁷Ne ɲa bɔ fɛngbansanw na, k’a to ne ye to i ta sira kan!

³⁸I ka i darakan min di i ɲasiranbagaw ma, o kuma dafa i ta jɔn ye.

³⁹Ne bɛ siran tɔgɔcɛn min ɲa, o mabɔ ne ra, sabu i ta kolatigɛninw ka ɲi.

⁴⁰A flɛ, i ta sariya ta kumaw lɔgɔ bɛ ne ra kosɛbɛ; a to ne ye ɲanamanya i ta terenninya sira kan.

⁴¹Matigi Ala, i ta ɲumanya ye jigi ne kan, ani i ta kisiri, ka kaɲa ni i darakan ye

⁴²Ni o kɛra, ne bɛna ne mafiyɛnyabagaw jaabi, sabu ne jigi bɛ i ta kuma kan.

⁴³I kana cankuma mabɔ ne da ra ka ye fiyewu, sabu ne bɛ i ta kolatigɛninw le makɔnɔna.

⁴⁴Ne bɛna i ta sariya sira tagama lon bɛɛ, wagati bɛɛ, ani tuma bɛɛ.

⁴⁵Ne laganfiyanin le bɛ tagama, sabu ne bɛ tugu i ta sariya ta kumaw le kɔ.

⁴⁶Ne bɛna i ta ciw ɲafɔ masacɛw ye; o maroya tɛna kɛ ne ra.

⁴⁷I ta kumaw le ka di ne ye kosɛbɛ, ne bɛ o le kanu.

⁴⁸Ne bɛ ne boro kɔrɔta i ta kumaw nɔ fɛ, sabu ne bɛ o kanu; ne bɛ sigi ka miiri i ta cifɔninw le ra.

⁴⁹I ka kuma min fɔ i ta jɔn ye, i hakiri to o ra, sabu ne bɛ o le makɔnɔna!

⁵⁰Min bɛ ne jusu saaro ne ta ɲani na, o ye ko i darakuma bɛ si di ne ma.

⁵¹Yɛrɛyirabaga dɔw bɛ ne lɔgɔbɔ; nka ne tɛ jɛngɛ ka bɔ i ta sariya sira kan.

⁵²Ni ne hakiri jigira i ta kolatigɛninw na i ka minw fɔ fɔlɔfɔlɔ, Matigi Ala, o bɛ ne jusu saaro.

⁵³Dimiba bɛ ne mina mɔgɔjuguw kosɔn, olugu minw bɛ ban i ta sariya ra.

⁵⁴Ne bɛ i ta cifɔninw le la dɔnkiri ye, ka ne to nin so kɔnɔ yan, i ko lonan.

⁵⁵E, Matigi Ala, hali su fɛ, ne hakiri bɛ to i tɔgɔ ra, ka i ta sariya sira tagama.

⁵⁶Min ye ne ta ye, o ye ko ne ye to i ta sariya ta kumaw kan.

⁵⁷Ne ninyɔrɔ ye min ye, Matigi Ala, ne bɛ kɔsegi a kan, o ye ka i ta kuma sira tagama.

⁵⁸Ne b’a fɛ ka i diyanyako le kɛ ni ne jusukun bɛɛ ye; makari ne ra, i darakuma kosɔn.

⁵⁹Ne ka ne ta kow jate mina, ka ne tagamacogo kɛ ka kaɲa ni i ta ciw ye tuun.

⁶⁰Ne tɛ sumaya; ne bɛ teliya le, ka i ta kumaw sira tagama.

⁶¹Mɔgɔjuguw ka o ta sirinanw kɛ ka ne melege, nka ne tɛ ɲina i ta sariya kɔ.

⁶²Su cɛmancɛ ra, ne bɛ wuri ka i fo ka i waleɲumanlɔn i ta kolatigɛninw kosɔn, sabu o terennin lo.

⁶³Ne ye i ɲasiranbagaw bɛɛ ta teri le ye, ani i ta sariya ta kumaw siratagamabagaw.

⁶⁴E, Matigi Ala, i ta ɲumanya ka dugukolo fa! Ne karan i ta cifɔninw na.

⁶⁵I ka koɲuman kɛ i ta jɔncɛ ye, Matigi Ala, ka kaɲa ni i ta kuma ye.

⁶⁶Hakiriɲuman ni lɔnniya yira ne ra, sabu ne lara i ta kumaw ra.

⁶⁷Wagati min i tun ma ne koro fɔlɔ, ne tun bɛ bɔra i ta sira kan; nka sisan ne bɛ i darakumaw lamɛnna.

⁶⁸I ka ɲi, i bɛ koɲuman kɛ; ne karan i ta cifɔninw na.

⁶⁹Yɛrɛyirabaga dɔw bɛ faninyaw lara ne ra; nka ne bɛ i ta sariya ta kumaw mara kosɛbɛ ne jusukun na.

⁷⁰Olugu hakiri gberenna; nka ele ta sariya ko le ka di ne ye kosɛbɛ.

⁷¹I ka ne koro minkɛ, o fisayara ne ma; sabu sisan ne bɛ i ta cifɔninw karanna.

⁷²I da ka sariya min fɔ, o ka di ne ye ka tɛmɛ hali sanin ni warigbɛ waga caman kan.

⁷³I boro le ka ne dan, ka baraka don ne ra; hakiri di ne ma janko ne ye i kumakan faamu.

⁷⁴I ɲasiranbagaw bɛna ne ye ka ninsɔndiya, sabu o b’a ye ko ne jigi bɛ i ta kuma le kan.

⁷⁵Matigi Ala, ne k’a lɔn ko i ta kolatigɛninw terennin lo, ko i ka ne koro ka kaɲa ni i ta kankelentigiya le ye.

⁷⁶I ta ɲumanya ye ne jusu saaro, ka kaɲa ni i darakuma ye.

⁷⁷I ta hina ye se ne ma, janko ne ye si sɔrɔ, sabu i ta sariya ko le ka di ne ye kosɛbɛ.

⁷⁸Yɛrɛyirabaga minw bɛ ne tɔɲɔra gbansan, olugu le ye maroya! Ne kɔni bɛ miiri i ta sariya ta kumaw le ra.

⁷⁹I ɲasiranbagaw ye sekɔ ka na ne fɛ, ani minw ka i ta ciw lɔn.

⁸⁰A to ne ye i ta cifɔninw sira tagama ni jusukun gbɛnin ye, janko ne kana na maroya.

⁸¹Ne nin bɛ samana i ta kisiri le nɔ fɛ; ne jigi bɛ i ta kuma le kan.

⁸²Ne ka i darakumaw ɲanaflɛ fɔ ka na ne ɲadenw baraka ban; ne ko: «I bɛna ne jusu saaro tuma juman sa?»

⁸³Ne bɛ i ko sisi ka forogo min fin [2]; nka ne ma ɲina i ta cifɔninw kɔ.

⁸⁴I ta jɔn si tɔ ye san jori le ye? I bɛna kiti ben ne nɔgbɛnbagaw kan tuma juman?

⁸⁵Yɛrɛyirabaga dɔw bɛ dingaw sogira ne ɲa fɛ, k’a sɔrɔ o ma bɛn ni i ta sariya ye.

⁸⁶I ta kumaw bɛɛ ye can ye; o wurira ne kama gbansan le; ne dɛmɛ!

⁸⁷A tora dɔɔnin, o tun bɛna ne halaki; nka ne ma bɔ i ta sariya ta kumaw kan.

⁸⁸A to ne ye si sɔrɔ, i ta ɲumanya kosɔn, janko i da ka ci minw fɔ, ne ye o sira tagama.

⁸⁹Matigi Ala, i ta kuma bɛ yi tuma bɛɛ! A sabatinin lo sankolo ra.

⁹⁰I ta kankelentigiya bɛ yi wagati bɛɛ, ani tuma bɛɛ; i ka dugukolo sabati, a fana bɛ to a nɔ ra.

⁹¹I ta kolatigɛninw le kosɔn danfɛnw bɛ o nɔ ra bi; sabu fɛn bɛɛ bɛ baara kɛ ele le ye.

⁹²Ni i ta sariya ko tun man di ne ye kosɛbɛ, ne tun bɛna sa ne ta ɲani na.

⁹³Ne tɛ ɲina i ta sariya ta kumaw kɔ, sabu i bɛ ne ɲanamanya o le sababu ra.

⁹⁴Ne kɛra i ta ye; ne kisi, sabu ne bɛ tugu i ta sariya ta kumaw le kɔ.

⁹⁵Mɔgɔjugu dɔw bɛ ne kɔnɔna, janko ka ne halaki; nka ne bɛ i ta ciw le lamɛn.

⁹⁶Ne bɛ dan ye fɛn dafanin bɛɛ ra, nka ele ta kumaw bonya dan tɛ lɔn.

⁹⁷E, ne bɛ i ta sariya kanu dɛ! Ne ta miiriya bɛ o le kan wagati bɛɛ.

⁹⁸I ta kuma bɛ ne kɛ hakiritigi ye ka tɛmɛ ne juguw kan, sabu o kuma bɛ ne kɛrɛ fɛ tuma bɛɛ.

⁹⁹Hakiri bɛ ne fɛ ka tɛmɛ ne karanfaw bɛɛ kan, sabu ne bɛ miiri i ta ciw le ra.

¹⁰⁰Ne bɛ faamuri kɛ ka tɛmɛ cɛkɔrɔbaw kan, sabu ne bɛ i ta sariya ta kumaw mara.

¹⁰¹Ne bɛ ne sen kɔrɔsi sirajugu bɛɛ ma, janko ne ye i ta kuma sira tagama.

¹⁰²Ne tɛ ne yɛrɛ mabɔ i ta kolatigɛninw na; sabu ele le bɛ ne karan.

¹⁰³I darakuma ka di ne ye dɛ! A ka di ka tɛmɛ hali li kan.

¹⁰⁴I ta sariya ta kumaw baraka ra, ne bɛ faamuri sɔrɔ; o kosɔn ne bɛ faninyasiraw bɛɛ kɔninya.

¹⁰⁵I ta kuma ye fitina le ye ne sen kɔrɔ, yeelen lo fana ne ta sira kan.

¹⁰⁶Ne bɛ kari a ra, ne fana bɛna a dafa, ko ne bɛna i ta kolatigɛninw sira tagama, sabu o terennin lo.

¹⁰⁷I ka ne koro ka ne majigi kosɛbɛ; Matigi Ala, a to ne ye ɲanamanya i ta kuma baraka ra.

¹⁰⁸Matigi Ala, sɔn ne ta tandori ma i ko saraka; ne karan i ta kolatigɛninw na.

¹⁰⁹Ne nin bɛ farati ra wagati bɛɛ, nka ne tɛ ɲina i ta sariya kɔ.

¹¹⁰Mɔgɔjuguw bɛ jan la ne ɲa; nka ne tɛ ne yɛrɛ mabɔ i ta sariya ta kumaw ra.

¹¹¹I ta ciw le ye ne ninyɔrɔ ye tuma bɛɛ, sabu o bɛ ninsɔndiya don ne jusu ra.

¹¹²Ka i ta cifɔninw sira tagama, o le bɛ ne jusukun na wagati bɛɛ, fɔ a laban.

¹¹³Ne bɛ mɔgɔ jusuflatigiw kɔninya; ne bɛ i ta sariya le kanu.

¹¹⁴Ele le ye ne dogoyɔrɔ ye, ani ne tangabaga; ne jigi bɛ i ta kuma le kan.

¹¹⁵Aw mɔgɔjuguw, aw ye mabɔ ne ra, janko ne ye ne ta Ala ta kumaw lamɛn.

¹¹⁶Baraka don ne ra, i darakuma kosɔn, janko ne ye ɲanamanya; ne jigi kana maroya!

¹¹⁷Baraka don ne ra janko ne ye kisi, ani janko i ta cifɔninw ye to ne ɲa kɔrɔ tuma bɛɛ!

¹¹⁸Mɔgɔ o mɔgɔ bɛ bɔ i ta cifɔninw sira kan, i bɛ o tigi mabɔ i yɛrɛ ra, sabu o bɛ fɛn o fɛn dabari, o bɛɛ ye faninya le ye.

¹¹⁹I bɛna dunuɲa mɔgɔjuguw bɛɛ firi i ko ɲamaɲama; o kosɔn ne bɛ i ta ciw kanu.

¹²⁰Ne bɛ siran i ɲa fɔ ne fari bɛ yɛrɛyɛrɛ; i ta kolatigɛninw ɲasiran bɛ ne ra.

¹²¹Ne bɛ can ni terenninya sira tagama; i kana ne labla ne tɔɲɔbagaw ye.

¹²²Kɛ ne ta hɛra sarati ye; i kana a to yɛrɛyirabagaw ye ne minako juguya.

¹²³Ne ka i ta kisiri ko ɲanaflɛ, ka i ta darakuma terennin ɲanaflɛ fɔ ka na ne ɲadenw baraka ban.

¹²⁴I ta jɔn mina ka kaɲa ni i ta ɲumanya ye, i ye ne karan i ta cifɔninw na.

¹²⁵Ne ye i ta jɔn le ye, faamuri di ne ma, k’a to ne ye i ta ciw lɔn.

¹²⁶Matigi Ala, wagati sera i ye i ta setigiya yira, sabu mɔgɔw bɛ i ta sariya cɛnna.

¹²⁷Nin le kosɔn, ne bɛ i ta kumakan kanu, ka tɛmɛ hali sanin kan, hali sanin yɛrɛworo kan.

¹²⁸O kosɔn ne bɛ i ta sariya ta kumaw bɛɛ jate ko kuma terenninw lo; ne bɛ faninyasiraw bɛɛ kɔninya.

¹²⁹I ta ciw ye fɛnɲumanba ye; o kosɔn ne bɛ o mara.

¹³⁰I ta kuma faamuri bɛ mɔgɔ bla yeelen na; a bɛ faamuri di kolɔnbariw ma.

¹³¹Ne bɛ ne da yɛlɛ ka ŋuna, sabu i ta kumaw lɔgɔ bɛ ne ra.

¹³²I ɲa munu ka ne flɛ, ka makari ne ra i n’a fɔ i b’a kɛ i kanubagaw ye cogo min na ka kaɲa ni i ta kolatigɛnin ye.

¹³³Ne tagamacogo sabati ka bɛn ni i darakumaw ye; i kana a to terenbariyako si ye se sɔrɔ ne kan.

¹³⁴Ne kisi mɔgɔw ta tɔɲɔri ma, janko ne ye i ta sariya ta kumaw sira tagama.

¹³⁵Sabari ka i ta jɔn flɛ ni ɲumanya ye, ka ne karan i ta cifɔninw na.

¹³⁶Ne bɛ kasira ka ɲaji caman le bɔ, sabu mɔgɔw tɛ i ta sariya sira tagamana.

¹³⁷E, Matigi Ala, i terennin lo, i ta kolatigɛninw fana ka ɲi.

¹³⁸I ka i ta ciw fɔ ni terenninya ye, ani kankelentigiyaba.

¹³⁹Sɔnja ka ne baraka bɛɛ ban, sabu ne juguw bɛ ɲina i ta kumaw kɔ.

¹⁴⁰I darakumaw bɛɛ kora ka o saninya kosɛbɛ; i ta jɔncɛ bɛ o le kanu.

¹⁴¹Ne ka dɔgɔ, mɔgɔw tɛ ne jate, nka ne tɛ ɲina i sariya ta kumaw kɔ.

¹⁴²I ta terenninya ye terenninya banbari le ye, i ta sariya fana ye can le ye.

¹⁴³Degu ni kɔnɔnɔfiri sera ne ma, o bɛɛ n’a ta, i ta kumaw ko ka di ne ye kosɛbɛ.

¹⁴⁴I ta ciw terennin lo tuma bɛɛ; o faamuri di ne ma, janko ne ye si sɔrɔ.

¹⁴⁵Ne bɛ i wele ni ne jusukun bɛɛ ye, ne jaabi, Matigi Ala; ne bɛna to i ta cifɔninw kan.

¹⁴⁶Ne bɛ i wele ko i ye ne kisi, janko ne ye i ta ciw sira tagama.

¹⁴⁷Ne bɛ kɔn dugugbɛda ɲa ka kasi ka i wele, sabu ne jigi bɛ i ta kuma le kan.

¹⁴⁸Ne ɲadenw bɛ yɛlɛ k’a sɔrɔ dugu ma gbɛ ban; ne bɛ to ka miiri i darakumaw ra.

¹⁴⁹Ne kan lamɛn i ta ɲumanya kosɔn! Matigi Ala, a to ne ye ɲanamanya ka kaɲa ni i ta kolatigɛninw ye.

¹⁵⁰Dabarijuguw siribagaw bɛ nana yi; o bɛ o yɛrɛ mabɔ i ta sariya ra.

¹⁵¹Nka ele yɔrɔ ka surun ne ra, Matigi Ala! I ta kumaw bɛɛ ye can ye.

¹⁵²Kabini wagatijan, i ta ciw k’a yira ne ra ko ele ka o sigi, o fana tɛ yɛlɛma tuun fiyewu.

¹⁵³Ne ta ɲani flɛ, i ye ne bɔsi, sabu ne tɛ ɲina i ta sariya kɔ.

¹⁵⁴Lɔ ni ne kunko ye, i ye ne kunmabɔ; a to ne ye ɲanamanya i darakuma sababu ra.

¹⁵⁵Kisiri yɔrɔ ka jan mɔgɔjuguw ra, sabu olugu tɛ i ta cifɔninw ɲini.

¹⁵⁶I ta hina ka bon, Matigi Ala; a to ne ye ɲanamanya i ta kolatigɛninw baraka ra.

¹⁵⁷Ne nɔgbɛnbagaw, ani ne juguw ka ca, nka ne tɛ jɛngɛ ka bɔ i ta ciw sira kan.

¹⁵⁸Ne bɛ janfamɔgɔw flɛ fɔ ka ɲigi o ra, olugu minw tɛ i darakuma lamɛn.

¹⁵⁹Ne bɛ i ta sariya ta kumaw kanu cogo min na, o jate, Matigi Ala, k’a to ne ye ɲanamanya i ta ɲumanya kosɔn.

¹⁶⁰I ta kuma ju sigira can le kan, i ta kolatigɛninw bɛɛ terennin lo, o si tɛ ban ka ye.

¹⁶¹Kuntigi dɔw wurira ne kama gbansan, nka i ta kuma dɔrɔn le ɲasiran bɛ ne jusukun na.

¹⁶²Ne bɛ ninsɔndiya i darakuma kosɔn, i ko mɔgɔ min ka naforoba cɛ.

¹⁶³Mɔgɔ o mɔgɔ bɛ faninya fɔ, ne bɛ o kɔninya, k’a haramuya; ne bɛ i ta sariya le kanu.

¹⁶⁴Ne bɛ i tando fɔ siɲaga wolonfla tere kɔnɔ, i ta kolatigɛninw kosɔn, sabu o terennin lo.

¹⁶⁵Hɛra caman le maranin bɛ i ta sariya kanubagaw ɲa; o sen tɛna talon foyi ra.

¹⁶⁶E, Matigi Ala, ne bɛ i ta kisiri le makɔnɔna! Ne bɛ i kumakan le lamɛn.

¹⁶⁷Ne bɛ i ta ciw sira tagama, ne bɛ o kanu kosɛbɛ.

¹⁶⁸Ne bɛ i ta sariya ta kumaw, ani i ta ciw sira tagama, sabu ne ta kow si ma dogo i ma.

¹⁶⁹A to ne kasikan ye se i ma, Matigi Ala! Faamuri di ne ma i ta kuma kosɔn.

¹⁷⁰A to ne ta makarikanw ye se i ma! Ne bɔsi i darakan kosɔn!

¹⁷¹Tandori camanba ye bɔ ne da ra, sabu i bɛ ne karan i ta cifɔninw na.

¹⁷²Ne da ye dɔnkiri la ka i darakuma tando, sabu i ta kumaw bɛɛ terennin lo.

¹⁷³I boro ye ne dɛmɛ, sabu ne ka i ta sariya ta kumaw le ɲanawoloma.

¹⁷⁴E, Matigi Ala, ne bɛ kasi i ta kisiri nɔ fɛ, i ta sariya ko le ka di ne ye kosɛbɛ.

¹⁷⁵Ne ye to si ra ka i tando, i ta kolatigɛninw ye baraka don ne ra.

¹⁷⁶Ne bɛ yaalara ne kun fɛ i ko sagaden tununin: i ta jɔn yɔrɔɲini, sabu ne tɛ ɲina i kumakanw kɔ.