Read Jula Zaburuw kitabu 122 Bible Online

Zaburuw kitabu 122 - Jula bible

Zaburuw kitabu 122

¹Ala ta batoso yɛlɛnsira ta dɔnkiri. Dawuda ta Zaburu. Ne bɛ ninsɔndiya, n’a fɔra ne ye ko: «An ye taga Matigi Ala ta so kɔnɔ!»

²An tagara fɔ ka taga an sen lɔ ele Zeruzalɛmu dugu dondaw le ra!

³Ele Zeruzalɛmu dugu min lɔra, ka kɛ dugu ye min donna ɲɔgɔn na ka ɲa.

⁴Gbaw bɛ taga yi le, Matigi Ala ta gbaw bɛ taga yi le. O ye ci le ye min dira Izirayɛlimɔgɔw ma, ko o ye taga Matigi Ala fo k’a waleɲumanlɔn a tɔgɔ kosɔn.

⁵Sabu kititigɛbagaw ta masasiginanw bɛ yi le, Dawuda ta so ta masasiginanw.

⁶Aw ye Ala daari ko a ye hɛra kɛ Zeruzalɛmu ye: «Zeruzalɛmu, i kanubagaw ye ɲasuma!

⁷Hɛra ye kɛ i ta sow kɔnɔ, ɲasuma ye kɛ i ta masabonw kɔnɔ.»

⁸Ne balemaw ni ne teriw kosɔn, ne b’a fɔ ko: «Hɛra ye kɛ i ta sow kɔnɔ!»

⁹Matigi Ala, an ta Ala ta so kanuya kosɔn, ne bɛ i ta hɛra le ɲini Ala fɛ.