Read Jula Zaburuw kitabu 124 Bible Online

Zaburuw kitabu 124 - Jula bible

Zaburuw kitabu 124

¹Ala ta batoso yɛlɛnsira ta dɔnkiri. Dawuda ta Zaburu. Ni Matigi Ala tun tɛ ni an ye, Izirayɛli y’a fɔ ten,

²ni Matigi Ala tun tɛ ni an ye wagati min mɔgɔw wurira an kama,

³o tun bɛna an bɛɛ ɲanaman le latunu, tuma min na o tun dimina an kɔrɔ kosɛbɛ.

⁴Jibaw le tun bɛna an datugu, jiwoyoba dɔ tun bɛna woyo ka tɛmɛ an kunna.

⁵Ji barakamanw le tun bɛna woyo ka tɛmɛ an kunna.

⁶Nka Matigi Ala baraka! Ale ma sɔn k’a to o ye an domu.

⁷An nin bɔsira o boro i ko kɔnɔ bɛ bɔsi ka bɔ kɔnɔminabaga ta jɔ ra cogo min na; jɔ tigɛra, an bɔsira.

⁸An ta dɛmɛri bɛ sɔrɔ Matigi Ala tɔgɔ le ra, min ka sankolo ni dugukolo dan.