Read Jula Zaburuw kitabu 130 Bible Online

Zaburuw kitabu 130 - Jula bible

Zaburuw kitabu 130

¹Ala ta batoso yɛlɛnsira ta dɔnkiri. Ka ne deguninba to, Matigi Ala, ne bɛ i wele ko i ye ne dɛmɛ!

²Matigi, ne kan lamɛn, i toro malɔ ka ne ta makarikanw lamɛn.

³Matigi Ala, ni i tun bɛ an ta terenbariyakow mara i yɛrɛ kɔnɔ, Matigi, jɔntigi le tun bɛna se ka kisi?

⁴Nka ele kɔni bɛ yafa, o kosɔn mɔgɔw bɛ siran i ɲa ka i bonya.

⁵Ne bɛ Matigi Ala le makɔnɔna, ne nin b’a makɔnɔna; ne jigi bɛ ale ta kuma le kan.

⁶Dugu kɔrɔsibagaw bɛ sɔgɔmada makɔnɔna, dugu kɔrɔsibagaw kɔrɔtɔnin bɛ sɔgɔmada makɔnɔna, nka ne kɔrɔtɔnin bɛ Matigi makɔnɔna belen ka tɛmɛ olugu kan.

⁷Izirayɛli, i jigi la Matigi Ala kan; sabu ɲumanya bɛ sɔrɔ Matigi Ala le fɛ; a bɛ mɔgɔ kunmabɔ ko bɛɛ ma.

⁸Ale le bɛna Izirayɛli kunmabɔ a ta terenbariyakow bɛɛ ra.