Read Jula Zaburuw kitabu 135 Bible Online

Zaburuw kitabu 135 - Jula bible

Zaburuw kitabu 135

¹Aw ye Matigi Ala tando! Aw ye Matigi Ala tɔgɔ tando! Matigi Ala ta baaradenw, aw y’a tando!

²Aw minw bɛ baara kɛ Matigi Ala ta so kɔnɔ, aw minw bɛ baara kɛ an ta Ala ta batoso lu kɔnɔ, aw y’a tando!

³Aw ye Matigi Ala tando, sabu Matigi Ala ka ɲi. Aw ye dɔnkiri la k’a tɔgɔ tando, sabu a tɔgɔ ka di.

⁴Matigi Ala ka Yakuba ta mɔgɔw ɲanawoloma ka o kɛ a ta ye, a ka Izirayɛli ta mɔgɔw ɲanawoloma ka o kɛ a ta mɔgɔw ye.

⁵Ne kɔni k’a lɔn ko Matigi Ala ka bon, ko an Matigi bɛ ala tɔw bɛɛ kunna.

⁶Ni ko o ko ka Matigi Ala diya, a bɛ o kɛ, sankolo kɔnɔ, ani dugukolo kan, ani kɔgɔji n’a dunmanyɔrɔw bɛɛ ra.

⁷A bɛ sankabaw lawuri ka bɔ fɔ dugukolo danw na, a bɛ sanmanamana bɔ, ka sanji ben; a bɛ fɔɲɔ lana ka bɔ a marayɔrɔw ra.

⁸A ka Misirankaw ta dencɛ fɔlɔw halaki, k’a ta adamadenw na, ka taga se bɛganw ma.

⁹A ka tagamasiyɛnw, ani kabakow kɛ ele Misiran jamana cɛ ma, Farawona ni a ta jamana ɲamɔgɔw bɛɛ kama.

¹⁰A ka siya caman halaki, ka masacɛ barakamanw faga.

¹¹Amɔrikaw ta masacɛ Sihɔn, ani Basan masacɛ Ɔgi, ani Kanaanakaw ta masacɛw bɛɛ.

¹²A ka o ta jamana di Izirayɛli ma, a ka o ta jamana kɛ a ta mɔgɔw ta ye.

¹³Matigi Ala, ele tɔgɔ kɔni tɛ tunu ka ye fiyewu! Matigi Ala, mɔgɔw hakiri bɛ to i tɔgɔ ra wagati bɛɛ, ani tuma bɛɛ.

¹⁴Matigi Ala bɛna a ta mɔgɔw ta kiti tigɛ ka jo di o ma; a bɛna hina a ta jɔnw na.

¹⁵Siya tɔw ta batofɛnw ye fɛn warigbɛramanw ni fɛn saninlamanw le ye; adamadenw yɛrɛ boro le ka o lalaga.

¹⁶Da bɛ o fɛ, nka o tɛ kuma, ɲa bɛ o fɛ, nka o tɛ yeri kɛ,

¹⁷toro bɛ o fɛ, nka o tɛ mɛnni kɛ; dafɔɲɔ si tɛ bɔ o da fɛ.

¹⁸O lalagabagaw ni olugu yɛrɛ bɛɛ ye kelen ye, ani minw bɛɛ bɛ o jigi la o kan.

¹⁹Izirayɛli ta somɔgɔw, aw ye baraka la Matigi Ala ye! Haruna ta somɔgɔw, aw ye baraka la Matigi Ala ye!

²⁰Levi ta somɔgɔw, aw ye baraka la Matigi Ala ye! Matigi Ala ɲasiranbagaw, aw ye baraka la Matigi Ala ye!

²¹Matigi Ala baraka, ele min bɛ Siyɔn, ele min siginin bɛ Zeruzalɛmu! Aw ye Matigi Ala tando!