Read Jula Zaburuw kitabu 137 Bible Online

Zaburuw kitabu 137 - Jula bible

Zaburuw kitabu 137

¹Ka an to Babilɔni badaw ra, an hakiri jigira Siyɔn dugu ko ra minkɛ, an siginin tora yi, ka to ka kasi.

²Yirimisɛn minw tun bɛ o yɔrɔ ra, an tun ka an ta gɔniw dulon olugu ra.

³Ka an to yi, an minabagaw tun b’a fɔra an ye ko an ye dɔnkiri dɔ la olugu ye; an tɔɔrɔbagaw tun b’a fɔra ko an ye olugu ninsɔndiya. O ko: «Aw ye Siyɔn dugu dɔnkiri dɔw la an ye kɛ!»

⁴An bɛ se ka Matigi Ala ta dɔnkiriw la jamana wɛrɛ dugukolo kan cogo di sa?

⁵E, Zeruzalɛmu, ni ne ka ɲina ele kɔ, o tuma ne kininboro ye ɲina gɔnifɔ kɔ!

⁶Ne nɛn nɔrɔnin ye to ne da kɔnɔ, ni ne ma ne hakiri to ele ra, ni ne ma ele Zeruzalɛmu jate ka tɛmɛ ne ta ɲagariko tɔw bɛɛ kan.

⁷Matigi Ala, Edɔmukaw ka min kɛ an na, i hakiri to o ra: Zeruzalɛmu dugu minalon na, olugu le tun b’a fɔra ko: «Aw y’a ci, aw y’a ci ka se fɔ bonw jusiginanw ma!»

⁸Ele Babilɔni, ele min bɛna halaki, ele ka kojugu min kɛ anw na, ni mɔgɔ min ka i sara ni o ɲɔgɔn ye, Ala ye o tigi ta ɲa.

⁹Ni mɔgɔ min ka aw ta denfitiniw mina ka o gbasi fara kan ka o ɲɔɲɔ, Ala ye o tigi ta ɲa.