Read Jula Zaburuw kitabu 139 Bible Online

Zaburuw kitabu 139 - Jula bible

Zaburuw kitabu 139

¹Dɔnkirilabagaw kuntigi. Dawuda ta Zaburu. Matigi Ala, i ka ne jusukun sɛgɛsɛgɛ, i ka ne jusukunnakow bɛɛ lɔn.

²I ka ne sigiwagati lɔn, i ka ne wuriwagati lɔn; i ka ne ta miiriyaw lɔn kabini wagatijan.

³Ni ne bɛ tagama ra, walama ni ne lanin lo, i ka o lɔn; i bɛ ne ta kow bɛɛ kala ma.

⁴Hali k’a sɔrɔ kuma ma bɔ ne da ra fɔlɔ, Matigi Ala, o y’a sɔrɔ ko ne bɛna min fɔ, ele ka o bɛɛ lɔn ka ban.

⁵I bɛ ne kɔ fɛ, i bɛ ne ɲa fɛ, i boro fana bɛ ne kan.

⁶O lɔnniyaba ɲɔgɔn ka bon ne ta hakiri ma, a tɛmɛna ne ta faamuri dan kan pewu.

⁷Ne bɛ se ka taga min le, ko ne bɛ faran ka mabɔ ele ra? Ne bɛ se ka bori ka taga dogo min le, ele ɲa tɛna ne ye yɔrɔ min na?

⁸Ni ne ka yɛlɛn ka taga sankolo ra, i bɛ yi; ni ne jigira fɔ dugukolo jukɔrɔ, i bɛ yi.

⁹Ni ne wurira ka taga fɔ terebɔyanfan dan na, walama ni ne tagara sigi terebenyanfan na fɔ kɔgɔji dan na,

¹⁰hali o yɔrɔ ra, i boro bɛ ne tɛmɛsira yira ne ra, i boro barakaman bɛna ne mina.

¹¹Ni ne ko, ko dibi ye ne datugu, hali su bɛ yɛlɛma ka kɛ tere ye ka ne lamini.

¹²Hali dibi tɛ se ka dibi don ele ma; ele fɛ su gbɛnin lo i ko tere, dibi bɛ i ko yeelen ele fɛ.

¹³Ele le ka ne kɔnɔnɔyɔrɔw bɛɛ dan, ka ne fari yɔrɔw tugutugu ɲɔgɔn na ne bamuso kɔnɔ.

¹⁴Ne bɛ i fo ka i waleɲumanlɔn, sabu i ka ne kɛ danfɛn kabakoman ye, ani danfɛn ɲumanba. I ta danfɛnw bɛɛ ye fɛnɲumanbaw le ye; ne yɛrɛ ka o lɔn kosɛbɛ.

¹⁵Ne farikolo yɔrɔ si tun dogonin tɛ ele ma, wagati min i tun bɛ ne farisogo danna dogo ra, wagati min i ka ne fari yɔrɔw tugutugu ɲɔgɔn na dugukolo jukɔrɔ.

¹⁶Hali wagati min ne fari tun ma labɛn fɔlɔ, i ɲa tun bɛ ne ra. Tereda minw tun latigɛra ne ye, o bɛɛ tun sɛbɛra i ta kitabu kɔnɔ ka ban, k’a sɔrɔ o lonw si tun ma se fɔlɔ.

¹⁷E, Ala, i ta miiriyaw kɔrɔ ka dun ne ta faamuri ma! O hakɛya ka ca ne ma!

¹⁸Ni ne ko ne bɛ o jate mina, o ka ca ka tɛmɛ hali kɔgɔji kɛnkɛn kan. A flɛ, ni ne kununa tuma o tuma, ne ni ele belen bɛ ɲɔgɔn fɛ.

¹⁹E, Ala ni i tun bɛ sɔn ka mɔgɔjuguw faga, ka o mɔgɔfagabagaw gbɛn ka o mabɔ ne ra!

²⁰Olugu bɛ ele ko fɔ ni ŋaninyajuguya le ye; o bɛ i tɔgɔ fɔ gbansan le, sabu i juguw lo.

²¹Matigi Ala, yala ne man kan ka i kɔninyabagaw kɔninya wa? Minw bɛ wuri i kama, yala olugu ko man kan ka gboya ne ye wa?

²²Ne bɛ o kɔninya fɔ ka se kɔninya dan ma; ne juguw lo.

²³Ala, ne sɛgɛsɛgɛ, ka ne jusukunnakow lɔn! Ne kɔrɔbɔ ka flɛ, ka ne jusukunnakow lɔn.

²⁴A flɛ, ni ne bɛ sirajugu kan, i ye ne bla i ta ɲanamanya banbari sira kan.