Read Jula Zaburuw kitabu 140 Bible Online

Zaburuw kitabu 140 - Jula bible

Zaburuw kitabu 140

¹Dɔnkirilabagaw kuntigi. Dawuda ta Zaburu.

²Matigi Ala, ne bɔsi mɔgɔjuguw boro, ne tanga mɔgɔ farimanw ma.

³Olugu minw bɛ kojugu ŋaninya o jusukun na; lon o lon o bɛ kɛrɛ lawuri.

⁴O bɛ o nɛnkun dabɔ k’a kɛ i ko sa; o darakan ka jugu i ko fɔnfɔnnin baga. [1]

⁵Matigi Ala, ne kɔrɔsi, janko mɔgɔjugu boro kana se ne ma; ne tanga mɔgɔ farimanw ma, minw bɛ janfa siri janko ka ne laben.

⁶Yɛrɛbonyabaga dɔw ka jɔ siri, ka juruw siri ne ɲa; o ka jɔw siri ne ɲa sira kan, o ka minarijanw lala ne ɲa. [2]

⁷Ne b’a fɔ Matigi Ala ye ko: «Ele le ye ne ta Ala ye! Matigi Ala, i toro malɔ ka ne ta makarikanw lamɛn!»

⁸Matigi Ala, ne Matigi, ne ta baraka tigi, ani ne kisibaga, ele le ka ne kɔrɔsi kɛrɛ wagati ra.

⁹Matigi Ala, i kana a to mɔgɔjugu diyanyako ye kɛ! I kana a to a ta kolatigɛninw ye ɲa, ni o tɛ, a bɛna a yɛrɛ kɔrɔta. [3]

¹⁰Ne jugu minw ka ne lamini, olugu da tun ka kojugu minw labɛn, o kojuguw ye ben olugu yɛrɛ le kun na ka o datugu!

¹¹Tasumakamiw ye bɔn o kan, o ye o firi tasuma ra, dingadun dɔw kɔnɔ, o kana se ka bɔ tuun.

¹²Kumajugufɔbaga kana lɔyɔrɔ sɔrɔ jamana kɔnɔ! Mɔgɔ fariman kɔni, kojugu le ye gban ale kɔ tuma bɛɛ.

¹³Ne k’a lɔn ko Matigi Ala bɛna ɲanibagatɔw ta kiti tigɛ o ye, a bɛna fagantanw ta jo di o ma.

¹⁴Can lo, Matigi Ala, mɔgɔ terenninw bɛna i tɔgɔ fɔ ka i fo ka i waleɲumanlɔn, mɔgɔɲumanw bɛna to i ɲa kɔrɔ.